Hebreos 12

1

2

3

4

5

6

7

8

9

10

11

12

13

¹Inchawei øyeeg købene, tru isubigwan Tiusweinug pasra tøgargøbelø nørrø køptø kan wañi lataig namuim pøtøgatan namun ashib purrabelan namgucha tøgagúig køppe, namun chiguen tab ambamgaig chigøben kwatsiiranøbelanba, tru kaig marøbig namun iløsrkøptø iløsrkønrrai marøb pasrabigwanba webetøgun. Incha tru nam luløb ambamig Tius namui merrab may trarrig tsubig nam tøga pønrraiwan maikkucha kørrømisrmø, luløbig lulgun,

²namui kaptøgabe Jesúswan ashib, tru nømerrig treegwan pera marøb, katø tru namui isubigwan nuinug pasra tøgagúigwan newanig kønrrai marøb inchibigwan. Pøs Jesúsbe nø pumsrø kasrag kømdiig pasrabigwan asha pasraikkurri kurusyu mesraig kweetsig kwamigwan awentawa, tru kørig marinab pasramigwan chi trunun isua ashmøtø, truyu puraya, Tius wamisra wainug kusrmaygatømay wamisrig køn.

³Incha tru kaig marøb misaamera Jesúswan chine kaig maren, treegu ka awentab purayaigwan, trunun ñimguen isuy, ñim chi muraaramøwei, chi kaima kørrømisrmøwei indamig kønrrai.

⁴Pøs tru kaig mariiba ñim kwayab melaigu, ñimbe katøgucha ñimui aniwan lusamnegatiibe mara pønrrømøn.

⁵¿Tius nui ureg kuimba tab wamdøga waminchib purugúigwan ñimbe yandø pesannabguen inda chindah? “Nai nusrkai, ñi mur pasram kusrenrrai Señor ñun murelan kusrennene, kagatørre inditamab treeg isua tøgagømøwei, Señor ñun isua mørtrai marene, truyutø kørrømisrmøwei indamig køn.

⁶Kaguende tru nui undaaraigwane Señorbe nune mur pasram kusrenrrai kusrennøb, mundøgucha nui nusrkain kuitamab isua tøgagúigwane nøbe kalø marigwan ølmartrab murba tranøbig køn” cha, trenchibig køn.

⁷Maramga murig latailø Señor ñun maringaruigwane mur pasram kusrenrrai kusrennrrab inditamab isua awentau. Kaguende Tiusbe ñimune nui nusrkain kuimba øyeeg maran. ¿Kan nusrkawan møskai mur pasram kusrenrrai kusrenniimíig mu treeg nusrkai kø chinderah?

⁸Inchen tru kanelø mayeelø mur pønrram kusrenrrai kusrenniilø latawei ñimun kusrenniimeelø kuisruandøbe, trube, Tiuswei trag nusrkalø kømøtø, ka menda ureemera kuin kønrrun.

⁹Inchagucha namma yu pirau namui møskalø namun mur pasram kusrenrrai kusrennøbelø nambe tøgar kua, truilanma maig købash inchimøtø, tab inchib tøgagøbelø kuibe, ¿tru namui espíritumerai Møskai Tiuswane treetøguen kømø, masken maig taigwan tru kuindø mørøb meløwa, øsig kømigwan tøgagømig kømønrraitarru?

¹⁰Namui møskaløma nam mur pønrram kusrenrrai nømbe kan maya yanagatiitø namun kusrenanøb tøgagøbelø købig køn, nømun maig maramdiig køben, treeg. Trune Tiusbe nam mur pønrram kusrenrrai kusrennøppe namunguen tab kønrrai maran, nø newan tabig kuigwan namgucha tøgagønrrai.

¹¹Tru mur pønrram kusrenrrai murigwan kusrenanene, ke kan tru urastøbe chiguen chi kasrag kømdiig kømøtø, mur kui mørøb pasramibe købig køn. Inchendø tru øyawan kusrenaninab puraambubelaimbe tsøndatøbe sølgandø tabig amønamiba, chi isumgaig tab amønamiba tøgaig arrubig køn.

¹²Inchawei ñimui kwalmera kullaarailan chishmisrtrai kønøgøb, ñimui tømmera itønapteelan katøle mur misrtrai maray.

¹³Katø ñim tab punab ambamig kønrrai putur maymeran ølmaray, tru ñimui kørriindi srøb wetunshimø, tammisrtrai.

¹⁴Ñimbe maya misaameraba ambugurri igurri lata tab kømigwanba, katø Tiusweyasiitø tarømisra tabig amønamigwanba martrab inchib kuy. Kaguende Tiusweyasiitø tarømisra tabig amøñimøwabe, muguen Señorwane ashchaamøn.

¹⁵Ñimbe purø tab isua ashib amønay Tiuswei tru ka yandø tab indigwan ñim møikkøben wendøbasrøb pønrrabgunmab, inchippa ñim møigwan køben kan møb srølgølig lataig kal-lawa nurab ya, truig pesriig iløsrkønrrai maren, misag purø nuwan tru kaitøga mindisailø kømønrrai.

¹⁶Mugucha møg lata ishug lata trømbøig marøb uñchab kømøwei, kabe Tiusweimburabigwane chigucha kømui lataig inchibig kømøwein kuy, tru Esaú latawei. Truima kan mamig nindagweindø kan mayor nusrkai maig tøgagømigwan yanig køn.

¹⁷Kaguende ñimbe yandø asiinrrun, Esaúbe mas wendøbe tru mayanguen tab indig kønrrai keta tranigwan katøle møskawan utønrrab inchen, nune yandø ka taig købigwan. Tru mayanguen tab indig kønrrai tranigwan tøgagønrrab kappin kørrøgøb lawa, yandø treeg kønrrai chab marigwane ni chinchaguen lliskamgaig kuig køn.

¹⁸Pøs ñimbe, israelitasmera Sinaí Tunyu kemalla pønrrab latawei, kan nu tun katøramdiigu nagurømera naarabig tøgaigu kemalla kømøwei, kabe løstiig, tru purø trømbø løstiigu kemalla kømøwei, kabe kørig kømdiig isig ichibigu kemalla kømøwein køn.

¹⁹Katø ñimbe tru trompeta mur wanrrøbigu kemalla kømøwei, kan wam wamindiilan mørtrab kemallmøwei indig køn. Inchen tru wam wamindiilan mørøbeløma: “Tiusmanda yandø waminncha” chibelø køn,

²⁰kaguende yandø mas awentawa pønrramgaig køben, Tius tru øyeeg karua pasren: “Kan animaldøguen tru tunwan kebachibiibe sruutøga peta kweetsig kønrrabig køn cha” trenchiben.

²¹Inchen tru treeg pureb pasrabiibe purø trømbøig kørig kømdiig køben, Moisésbe trenchibig køn: “Kwaarøsraig kørig købiitø ke itønab pasrar” cha.

²²Ñimbe treegu kemalla pønrrømøtø, møimbe ñimuimburappe tru Sion Tun tainug, Øsig wab Tiuswei ciudasrø, srømbala Jerusalénsrø, muguen mundzamgaig ángelesmera tulundzuna kasrag purraisrø, treegu kemalla pønrran.

²³Katø Tiuswei tru srøsrø kal-lawa ureemera nømui munchimeran srømbalasrø pørig tøgarmera kanbalatø purraisrø, katø Tius tru maya misagwan maig maramigwan asha marøbig waisrø ñimbe kemalla pønrrab, katø mayeelø sølgandø tabig misaamerai espíritumera yandø newan tabelø kønrrai kørrømariilø purraisrø kemalla pønrran.

²⁴Katø tru srø acuerdo marigwan misagweimburø purøbasramisrøbig Jesúswangucha kemalla pønrrab, katø tru Abelwei ani ‘tru kaig marøbigwan ñi, Tius, ulø pay’ chib, ani lataikken kømøtø, Jesúswei tru ani itøtsurig mas purø tabig ‘tru kaig marøbigwan ulø paymø, ñi, Tius, pesannau’ chib waminchib aniyu kemalla pønrran ñimbe.

²⁵Inchawei tru waminchibigwan kaashib kønrrab kømø ashiptø kuy. Kaguende Tius Moiséskurri isuptø kønrrai wamindigwan kaashibeløma yu pirauguen chi indiimíig ka yandø wegørrømuibe, trube, tru srømbalasrøngurri isuptø kønrrai waminchibigwan tarømisrabe, nambe truyugurrimbe ni chinchaguen wegørramgaig kønrrun.

²⁶Tru Moisés tsub urassrøma Tiuswei wamdøgabe pirøwane kønøgagutsig kuibe, møimbe øyamay maramønrrun cha kørrømisrig køn: “Nabe katøle pirøwane kønøgagutsamønrrun cha, trurrigu pirøwandø kømøtø, srømbalameranbañau.”

²⁷Tru, “katøle kønøgagutsamønrrun” cha, tru trendaibe, tru ka mara pønsraindeelø kønøgagutsiilane kerranrrab kui tørgandø eshkan, tru kønøgagutsamgailø, truiløtø pønrrabig pønrrønrrai.

²⁸Inchawei tru nam ashib tøga purramig tru kønøgagutsamgaigwan nambe utab kuig købene, nambe ‘mayanguen ungwa, ungwa’ chigun, Tiuswan tab kui wanrrai marøppe, nun køriibala tabig waminchib, kan yeeg tabig kønrrabmab isub.

²⁹Kaguende namui Tiusbe kan nag lataig køn, chigucha kørrømisrtraingaig parrøbig.