1Yawe täŋo meni jinomtä jukunaken ŋode äpmoŋkuk;
2Ämawebetä Isrel äbotta yäŋpäŋ man wärani ŋode yäk täkaŋ uwä goret yäk täkaŋ; Naniyetä imaka jägämi naŋirä nanakiyetä meni jiwät täkaŋ.
3Ude nämo! Ekäni Yawe näkä bureni-inik ŋode gäwetat; Isrel ämawebetä man ude wari nämo api yäneŋ.
4U imata, ämawebe täŋo bänepi kuduptagän uwä näkŋogän. Nan ba nanaki täŋo bok u näkŋogän. Unita ŋode nadäwut; Äma momi täŋpeko äma u ini-tägän uyaku api kumbek, nanaki nämo. ...
19Täŋpäkaŋ imata ŋode näwet täkaŋ? Nanitä momi täŋpeko unitäŋo kowata imata nanaki terak bok nämo ärowek? Ude nämo. Bureni ŋode täwetat; Nanakitä kudän siwoŋi täŋpäŋ näkŋo man kudup buramikta ket täŋpäŋ kuŋat täŋpeko unita kodak irek.
20Äneŋi ŋode gäwetgän täŋpa; Äma momi täŋpeko äma u ini-tägän uyaku api kumbek. Nanitä momi täŋpeko unitäŋo kowata nanaki terak bok nämo ärowek. Ba nanakitä momi täŋpeko unitäŋo kowata nani terak bok nämo ärowek. Nämo, äma siwoŋi täŋo siwoŋi kuŋat-kuŋattä iŋamnaken api täŋkentäŋ imek. Täŋ äma waki täŋo wakinitä manken api tewek.
21Täŋpäkaŋ bureni ŋode täwetat; Äma waki kubätä momi kädet mäde ut imiŋkaŋ näkŋo man kudup buramiŋpäŋ kudän siwoŋi terak kuŋarayäŋ täko uwä kodakigän api irek, nämo api kumbek.
22Momi ätu bian täŋkuko unita näk api guŋ täwet. Täŋ imaka siwoŋi täŋpayäŋ täko unita yäŋpäŋ kodak api irek.
23Jide? Ekäni Yawe näkä äma waki kumäŋirä gäripi nadäwet? Nämo! Momi täŋpanitä momi kädet mäde ut imiŋirä irit säkgämän yäpmäkta gäripi nadäk täyat.
24Täŋ äma siwoŋi kuŋarani kubätä siwoŋi kuŋat-kuŋat kädet peŋpäŋ kudän taräki, äma wakitä täk täkaŋ u täŋpayäŋ täko uwä täga api irek? Nämoinik. Imaka tägatäga bian täk täŋkuko unita kubä nämo api juku piwet. U täŋnäkŋarani täŋpäŋ momi kädet iwatak unita u kaŋ kumbän.
25Upäŋkaŋ ŋode yäk täkaŋ; Ekänitä kudän ude täk täyak uwä siwoŋi nämo! yäŋ yäk täkaŋ. Unita Isrel ämawebe in man täwerayäŋ täyat ŋo juku peŋpäŋ nadäwut. Intä näkŋo kudän unita siwoŋi nämo yäŋ yäk täkaŋ? Nämo, kudän injinken uyaku siwoŋi bureni nämowä!
26Äma siwoŋi kubätä kädet täga peŋpäŋ kädet waki täŋpäŋ kumbeko uwä, wakini unita yäŋpäŋ kumbek.
27Täŋpäkaŋ äma waki kubätä momi kädet peŋpäŋ kädet siwoŋi iwarayäŋ täko uwä nämo api kumbek. Nämo, u säkgämän api irek.
28Äma uwä täktäki kawän siwoŋi nämo täŋpäpäŋ kädet waki u peŋpäŋ unita nämo api kumbek. Nämo, u api irek.
29Näk kädet u iwarira Isrel ämawebe intä ŋode yäk täkaŋ; Ekäni täŋo kädet u siwoŋi nämo yäŋ yäk täkaŋ. Upäŋkaŋ ude nämo! Kudän injinken uyaku siwoŋi bureni nämowä!
30Eruk, Ekäni Yawe ärowani näkä Isrel ämawebe inä ŋode täwerayäŋ; In, injin kubäkubä täŋo täktäkjin terak api yäpmäŋ daniwet. Unita bänep äyäŋutpäŋ waki kädetjin u mäde ut yämut. Ude tänayäŋ täŋo uyaku momijintä in nämo api täŋpän waneŋ.
31O Isrel ämawebe, in mebäri imata kumäkta gäripi nadäkaŋ? Ude nämo. Täktäkjin waki täŋ itkaŋ u kudup peŋ moreŋkaŋ bänep kodaki ba nadäk-nadäk kodaki kaŋ yäput.
32Ekäni Yawe ärowani näkä ŋode täwetat; In kubätä kumäkta nämo nekaŋ unita momi kädet mäde ut imiŋirä nadäŋ tamiŋira säkgämän kaŋ irut.
