Deuteronomio 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹Bab-Dummad-e-dule-Moisés, burgwed-iduale, Israel-dulemargi ise-nued-binsanaidba weyob sogded:

²“Bab-Jehová Sinaí-yalagi danikid, Seir-akar anmarga gwallu-oganonikid, Parán-Yalagi anmarga gwallu-mee imaknonikid. E-dule-islidikmalad-miliambed-abalagi (10,000) nonikid, Igar-narmakaled sooyobi gwabunyemai e-argan-nuedsik sedanikid.

³Bab-Dummad, e-dulamar nue-sabed, e-argan-yaurgi bela dulemar-egadga-gued ganikid. Degisoggu, e-dulamar e-sogedba nadapi gumalad. Bab-Dummad, e-dulemarga Igar ukmaiguad.

⁴Anmar Jacob-wagan-guedba, we-Igar, ani Moisés, an bemarga uksagusad.

⁵Neggwebur-e-dummagan, Israel-dulemar-sogambe-gakabogwadmala (12) danar-ambikunonimargu, Bab-Jehová, Jesurúnʼgi reyga maigusad.”

⁶Moisés, Rubén-waganga sogded: “Rubén-wagan, be ichegumar-inigwele, be degisadegu dula-gudii gumaloed. Be-dulamar mergumai gumarsun.”

⁷Moisés, Judá-wagangi ise-nued sunmakdegu, weyob sogded: “Bab-Jehováʼye, Judá-wagan-bese-binnasuli-goled be itoge, e-dulemarse gannar be sede. Be-garganguedgi be Judá-wagan-bendakdage.”

⁸Moisés, Leví-wagangindi sogded: “Bab-Jehováʼye, Tumim, degine, Urim begadid, Leví-wagangi-nued-binsasadga be uksad. Israel-dulemardi, Masahʼye-neg-nugadgi, Meriba-diigi bebo ulusgu, be-wilubdaksad.

⁹Leví-wagan, e-babgi, e-nangi, sogsagusad: ‘Bipisaar an-babgandeeye an binsassurye.’ Leví-wagan, e-gwenadgan-akudake gusad, degine, e-mimmiganbela akudake gusbalid. Ar Leví-wagan be-gayaburbabardi nanasmalad, Be-Igar-Mesisad-sogedba gudigusmalad.

¹⁰Leví-wagan, be-Igarmar-sogedba Jacob-wagan-odurdakoed, Be-Igar-Maidgi Israel-dulemar-odurdakoed. Leví-wagan, be-asabin ina-wawadikmalad obupurmakmaloed, degine, ibmar-ogumakar-ukleged-ailagi bega ibmar ogumakar ukmaloed.

¹¹Bab-Jehováʼye, Leví-wagan-ibmar-imakmaladgi ise-nued be binsae, e-ibmar-imakmalad nue-weligwaledgi be abingae. E-isdarmalad-e-gangued be obeloge, sae-e-dakmalad, mer bar egi-gwisguega be imake.”

¹²Moisés, Benjamín-wagangindi sogded: “Bab-Jehová we-dule-na-nue-sabed, bensulidgi e-walikaa gudii imakoed. Bab-Dummad we-dule-edarbedii guoed, angaagwale sedii imakoed.”

¹³Moisés, José-wagangindi sogded: “E-napagi Bab-Jehová ise-nued binsasun. Nibneggi dii-bomied bur-nued uksun, degine, napa-urba bur dii-nued-nika imaksun.

¹⁴Birgagi, bur-ibmar-nued-sanmake gusun, degine, niigi, bur-ibmar-nued-sanmake gusun.

¹⁵Yala-sergangi bur-ibmar-nued-sanmake gusun, yala-matusurmalad-degisadeguadgi bur-ibmar-nued-sanmake gusun.

¹⁶Napagi ibmar-sanmakmalad bur-nuegan nikusun, degi, sapi-bipi-zarzaʼye-nugadgi-gusadid egi nued binsasun. Bela we-ibmar-nuegan José-waganga uklesun. We-José-wagande, na e-gwenadgan-abargi bur sulealidid.

¹⁷Moli-bebe-nikad-machered-gebegwaluleged-yeerdaklegedyobi, we-José-wagande yeerdaklemogad. José-wagande, moli-búfaloʼye-nugad-e-bebeyob nikamogad. A-bebegine, bela neggweburmar-baigan ese ibitomaloed, amba dulemar nega-dikasur-bukmaladse-bakale, ese ibitomogoed. Wegiid-dulemar, Efraín-wagangi miliambeba (10,000) nodamaloed, degine, Manasés-wagangi miliba (1,000) nodamarmogoed.”

¹⁸Moisés, Zabulón-wagangindi, degi, Isacar-wagangindi sogded: “Zabulón-wagan, be demarba node-sogele, be wergusunno. Isacar-wagan, bedi be-neggi be besa-sogele, be wergumosunno.

¹⁹Bemarde dulemar-baiganse goloed, an-yarse nakwedamarye, adi, agi Bab-Dummadga ibmar-innikigwad-ukleged ukmalagar. Demargi-ibmar-nuegan-nikmaladgi nue-wergumaloed, Ukubyaba ibmar-nuegan-sabolebukmaladgi nue-wergumarbaloed.”

²⁰Moisés, Gad-wagangindi, sogded: “Gad-wagan-yala-ganikid-odummosad-dulegi ise-nued binsalesad. Gad-wagan achumiguryobi garmakdiid, dulemar-ibe arganmar, degine, nono ichimaked.

²¹Gad-wagan bur yar-nued susad, yar-dule-idumaladgad-gued susad. E-dulemar-idumai gusad. Israel-dulemarmala igar-sogmaidba imaksad, ar igi Bab-Jehová igar-uksa, bela a-sogedba ibmar-imaksad.”

²²Moisés, Dan-wagangindi, sogded: “Dan-wagan achumigur-sapingwagwadyobid, Basán-yalagan-akar ichomakdanikid.”

²³Moisés, Neftalí-wagangindi, weyob sogded: “Neftalí-waganga ise-nueganbi ibmar-uklesad, ibiyobi, Bab-Jehová ise-nued ega ibmar imaksa. Neftalíʼde dad-argwanedsik, degine, dad-argwaned-nuedsik yar ganikid.”

²⁴Moisés, Aser-wagangindi, sogded: “¡Jacob-wagan-baiganba, Aser-wagangi bur ise-nued binsalesad! Bela e-gwenadgan Aser-wagan sabgumarsun. Olivo-gwallugi e-nag enuksun.

²⁵Esgoro, degine, esgoro-gordikidgi be-yawagakmar sobale guoed. Be-burgwedse be-gangued be nika guoed.

²⁶“Jesurún-dulemar-e-Bab-Dummadyobid, Bab-Dummad-baid sulid. A-Bab-Dummad be-bendakegala nibneg-akar gukudanikid, mogir-imbaba bela e-ganguedba danikid.

²⁷Bab-Dummad-degisadeguad, be-odukuedid. E-gangued-degisadeguad, be-ganikidid. Bab-Dummad be-isdarmalad be-asabin obelogoed. Bab-Dummad sogdegusad: ‘¡Be-isdarmalad bela be obelomar!’

²⁸Israel-dulemar dobsuli bukwagumaloed. Israel-dulemar bogidikidgi ambikumaloed. Ibmar-gwag-gulleged, degine, uvaʼmar, yaisuli be-nainumargi sanmakoed. Nibnega, yaisuli bega dii-bomimai saoed.

²⁹¡Israel-dulemar, begi ise-nued binsalesad! ¿Ar doa bemaryobi gue? Bab-Jehová bemar-bendaksayobi dule-baid-bendaksasulid. Sigu-abgamaladyob, be-irwa gwisgudiid. Bab-Jehová be-es-suid-be-onakwedga gued. Degisoggu, be-isdarmalad bela bese galakumaloed, bese wilemaloed. Bela-bela bese bingegudii gumaloed.”