Deuteronomio 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹Moisés bela Israel-dulemarse gochad, ega sogded: “Israel-dulemar, emi-ibagi an bemarga Igar-sognaid, degine, an Igar-uknaid nue be itomar. Be durdakmalo, nue be ebinsadii gumalo, adi, a-sogedba be nanamalagar.

²”Anmar-Bab-Dummad-Jehová, anmarbogwa Horeb-yargi Igar mesisad.

³Bab-Jehová anmar-babganbo we-Igar mesissulid, anmarbo Igar-Mesisad. Emi anmar bela dula-bukwamaladbogwa igar mesisad.

⁴Bab-Jehová bemar-asabin yar-birgi soo-abalagi bemarga sunmaksad.

⁵A-ibagangine, ani an Bab-Jehová-ibmar-sognaid bemarga-sogegala, bemar-irwa an gwichigusad. Ar bemar, soo-dobgusmarsoggu, a-ular, bemar yarse nakwissurmalad. ”Deunni, Bab-Jehová weyob sogsad:

⁶‘Ani an be-Bab-Dummad-Jehová gued. Bemar Egipto-yargi maiga-wilebukmargu, ani an bemar-onosadid.

⁷” ’Melle bab-dummad-baid an-asabin be nikumalo.

⁸Melle be ibmar-wilubgan sobmalo, nibneggi ibmar-nikad-wilubgandibe, napneggi ibmar-nikad-wilubgandibe, demargi ibmar-nikad-wilubgandibe.

⁹A-ibmar-wilubgan-asabin dulluu be imakosurmalad, degine, Bab-Dummadyob ese be golosurmalad, ar ade, ani an be-Bab-Dummad-Jehová gued. An, be-Bab-Dummad gadi-nobguedid. Ar an dule-isganamar-isdarsunna-dakmalad sabsur-odurdakedid. Degi, e-mimmigan, e-wagan, e-wagan-yokorbarmaladsega an sabsur-odurdakbalidid.

¹⁰Ar dulemar-an-sabmaladdi, dulemar-an-Igarmar-Mamaidba-nanamaladdi, an bela-e-waganmar-danimaloed e-ibe nue-sabguedid.

¹¹Melle be-Bab-Dummad-Jehová-nug yogasaar be obaro. Ar dule yogasaar Bab-Dummad-nug obarisale, a-dule, Bab-Dummad-Jehováʼse sabsur-odurdaklegedsegad.

¹²Obunnoged-ibagi be obunnogo, adi, a-ibagi, be Bab-Dummad-e-nug odummogegar. Igi be-Bab-Dummad-Jehová bega Igar-uksa, aba be imako.

¹³Ibanergwa (6) be arbaoed. A-ibagangi bela ibmar-imakbied be imakoed.

¹⁴Ibagugledgindi (7) obunnoleged-ibad, be-Bab-Dummad-Jehová-e-nug-odummolegedid. A-ibagi bipisaale be arbaosulid. Be-machi, be-bunagwa, bega-arbaed-machered, bega-arbaed-ome, be-moli-bebe-nikad-alugwasualed, be-moli-uayasuid, be-ibdurgan, a-ibagi, arbaosurmarmogad. Deginbali, dule-be-yarginedsulid be-negyagi-gudiid, a-ibagi arbaosurmarmogad. Ar obunnoged-ibagi igi be obunnomoga, beyobi bega-arbaed-machered, degine, bega-arbaed-ome, obunnomarmogoed.

¹⁵Egipto-yargi be maiga-gusmogad be ebinsao. Ar a-yargi be-Bab-Dummad-Jehová e-gangued-nikadba-be-onosadi, be ebinsao. A-ulale, be-Bab-Dummad-Jehová, bega igar-uksad: Obunnoged-ibagi be obunnogoye.

¹⁶Be-daedbali be-bab-nug-odummodii, degi, be-nan-nug-odummodii be nanamalo. Adi, be-Bab-Dummad-Jehová we-napneg-bega-uknaidgi sereddii be megegar, degi, bela bega ibmar-nueganbi gubaligar.

¹⁷Melle be dule-oburgo.

¹⁸Melle be be-abirginsulid-ebo galagwensuli nanao.

¹⁹Melle be ibmar-atursao.

²⁰Melle be gakansaar aimargi sunmako.

²¹Melle be dule-baid-ibmarbina sogo: Dule-baid-omebina, dule-baid-negbina, dule-baid-nainubina, dule-baid-mai-macheredbina, dule-baid-mai-omebina, dule-baid-moli-bebe-nikad-alugwasualedbina, dule-baid-moli-uayasuidbina. Bipisaale dule-baid-ibmarbina be sogosulid.’ ”

²²Moisés Israel-dulemarga sogdebalid: “Bemar yar-dikarba bukwamargu, we-gayaburba Bab-Jehová bemarga binnasuli soo-abalagi sunmaksagusad, mogir-gudureged-abalagi, negasichid-abalagi sunmaksagusad. Ibmar-baid bemarga bar obarissulid. Geb Bab-Jehová akwa-matabogwadgi narmaksagusad. Agi anga uksad.

²³”Ar bemar, negasichid-naigusgu, yargi soo-gwabunye-maigua, gayaburba itosmalad. Agine, bemar-danar-danar-bukwad-e-dummagan, degi, bemar-girmar-dummagan, bela anse noni gusmalad.

²⁴”Geb agi anga sognoni gusmalad: ‘Anmar-Bab-Dummad-Jehová anmarga e-gangued-yeerdakleged, degine, e-dummarba-gued anmarga oyosye. Bab-Jehová soo-abalagi anmarga-sunmaksadi anmar itosbarye. Emi, anmar daksaye, Bab-Dummad sunna dulebo sunmakye, degine, dule amba sunna dula-gudii guye. Ar dule burgwewilubbinye.’

²⁵”Ar anga sogsamarbalid: ‘Emide, ¿ibiga anmar binsarsunna we-soo-gwabunye-gwichidse burgwebimarsunye? Ar anmar Bab-Dummad-Jehová-anmarga-sunmaknaid gannar itononibalile, anmar ese oburgwilegoye.

²⁶Ar ade, ¿doa-dule anmaryob Bab-Dummad-e-gayaburba soo-abalagi-sunmaksad itosye, degi, gwen burgwissur be ebinsaye?’

²⁷”Anga sogsamarbalid: ‘Moisés, be, anmar-Bab-Dummad-Jehováʼse be naye. Bela anmar-Bab-Dummad-Jehová-ibmar-sogoed be itogoye. Be, anmar-Bab-Dummad-Jehová bega-ibmar-sogoed bela be anmarga sogmogoye. Anmar geb itononimogoye. Geb Bab-Jehová-ibmar-sogedba anmar ibsaoye.’

²⁸”Bemar anga ibmar-sognaigusgu, Bab-Jehová bemar-itosad. Agi, anga Bab-Jehová sogsad: ‘We-dulemar-bega-sunmaksamalad, an bela itosye. Bela-bega-sogsamalad an nueganbi itoye.

²⁹Bitigi ulubgi degibi an-dobee-nanamalana gadinye, degine, bela an-Igarmar-Mamaidba nanadigumalana yeerbanye, adi, we-dulemala, degine, e-mimmigana bela ega degisadegu ibmar-nueganbi gumalagarye.’

³⁰”Anga Bab-Jehová sogdebalid: ‘Moisés, be naye, dulemarga be sognaye: Be-dordonegse be gannar namarye.

³¹Bedina, wegi an-walik be beoye. An bega bela Igarmar-Mamaid an bega ukoye, adi, a-Igarmargi be Israel-dulemar-odurdakoye. Adi, bemarga-yar-uklesokalidgi, a-Igarmar-Mamaid-sogedba be nanadii gumalagarye.’

³²”Degisoggu, Israel-dulemar, nue salakarmar. Ar igi bemar-Bab-Dummad-Jehová bemarga-sogsa, aba be nanadii gumarsun. A-Igargan mer be soggwensaale obemalo, bela eba be nanamalo.

³³Bemar, Igarmar-be-Bab-Dummad-Jehová-bemarga-uksadba degisadegu nanadii gumalo, adi, bemar dula-gudii gumalagar. Deyobile, bemarga ibmar-nueganbi gumaloed, adi, yar-bemargadga-gusokalidgi suitibaksaar be gudii gumalagar.”