Danie 6:6-10

⁶Eme guriŋ bapa ŋic â soŋaŋ micne jaŋe quruŋ herâ ŋicwofuŋtao fisirâ kecʒiŋuc mumbiŋ: “O ŋicwofuŋ Dariusi, jusanaŋkerâ juzemec!

⁷Go mâreŋ sâko qâhâckerâ guriŋne baekic irec maŋnao guriŋ bapa ŋic â soŋaŋ fekicne wahakicne, erâ wâc kansol â dâŋsoŋaŋ juŋgopeneŋ nâŋe sasawa maŋ mocjaha erâ dâŋ moc gazanaŋte wareŋgopeneŋ. Go dâŋ kecʒiŋuc mupaŋkerâ papiao qâreŋketec mumutâc dâŋ ezejec: ‘Ŋafe ʒoaŋ 30 irec maŋnao ŋic moczi wiac mocte numuzo murâ no mi numu‐narehuc nemu moc me ŋic moc numucneocmu e laioŋ jaŋere nombâŋko behepie huzejec.’

⁸Irec ŋicwofuŋ, go mumutâc dâŋ i âkendâŋnerâ gahacne mezi ʒâŋe qâreŋge râetec mi hehetâmirene ezejec, Mede â Perisia ŋic nâŋâcne hata sanaŋ mi qâqâsuane fokac irec sâc hâcne.”

⁹Eme ŋicwofuŋ Dariusi e mumutâc papiao ʒâŋe qâreŋ‐ticne râewec.

¹⁰Mumutâc papiao ʒâŋe qâreŋ fuame basanaŋkekicne, dâŋ i Daniezi manarâ ficticnao rawec. Ficticne feŋgaŋne moc ira maŋne moc fowec irec qâqâtâc kataŋ Jerusalem haeopec qâtiŋnekicne domawec. Eme e ira ʒoaŋ sâc arec 3 dieŋzi herâ Anutu numucnehuc daŋge âzâcne jujec, irec sâcko ewec.