6मिनु मेको ठेयब कोव़ब निक्शी नु पारसी रागी कली हुकुम पाइब नेल्ल लोव़सी पा गारशा, पिप आ दरवारमी जाक्शा पिप कली “हजुर, पिप दारा, गे गेना हना यो ब्रोंइशा बाक्कीन।
7गो इन राज्य ङा ठेयब कोव़ब, आइक्च नु ठेयब हुकुम पाइब, अर्ती गेब नु इन रागी ङा ठेयब मुर नेल्ल नु गारशा, गे पिपमी, कानुन का सेल्चा माल्नीनी। मार कानुन सेल्चा माल्नीनी देंशा हना, मुल ३० नाक्त सम्म इन क्येङा लाक्शा, सुइ मुरपुकीम आंम देवी देवता नु मुर आन कली मारेइ पुंइने मचाप्नीम। इन क्येङा लाक्शा अरु सुइ कली पुंइतेक्म हना, मेको मुर गुप्स वोइक्तीकेमी ताइक्चा पुंइसीब, दे ब्रेक्शा छाप थोक्शा वोतीन।
8हजुर पिप, मोपा कानुन का सेलीन। मिनु छाप थोक्तीन। मादी नु पारसी आन कानुन मफांइसीब” देंमा बाक्त। एस्तर १:१९; एस्तर ८:८
9मिनु पिप दारामी मेको कानुन ब्रेक्पा छाप थोक्शा ग्रुंइताक्व।
10मिनु दानीएलमी पिप दारामी मोपा ब्रेक्शा छाप थोक्शा ग्रुंइशो तुइश्शा, यरूसलेम गे कोव़शा सेल्शो खिं आ तला तारी लशा, पोक्च थेक्शा आ परमप्रभु कली प्रार्थना पाप्तु। मोपा नाक्त किंत किंत सां खेयप पार्थना पाप्तु। मिनु ङोंइती खोदेंशो पा परमप्रभु कली ठेयब सेल्तु। १रजा ८:४८
दानीएल 6
दानीएल 6:6-10