APOSETOLO EDIA KARA 21:23-30

²³Ai laloa inai oi dekenai ai hamaoroa gauna oi karaia be namo: Ai dekenai tau 4 idia noho, gwauhamata idia karaia vadaeni, Dirava dekenai.

²⁴Idia danu Dubu Helaga dekenai oi lao, bona hagoevaia kara do oi karaia idia danu. Idia edia davana oi karaia, vadaeni edia kwarana huina idia utua diba. Inai bamona oi karaia, vadaeni taunimanima ibounai do idia diba, inai oi dekenai idia herevalaia sivarai be momokani lasi. Ibounai do idia diba oi be kara maoromaoro, bona Mose ena taravatu oi naria tauna.

²⁵To idau bese taudia, Iesu dekenai idia abidadama henia vadaeni taudia dekenai aiemai laloa gauna ai torea vadaeni, revareva dekenai. Ai gwau, kaivakuku dekenai henia aniani, bona rara, bona aiona idia gigia gaudia ena hidio do idia ania lasi, bona heudahanai karadia do idia karaia lasi.”

²⁶Vadaeni, Paulo be inai taudia danu ia lao. Bona kerukeru, hagoevaia ena kara ibounai ia karaia idia danu. Gabeai Dubu Helaga lalonai Paulo ia raka vareai, bona ia ese hahelagaia tauna dekenai ia gwauraia, dina hida do ia lao ela bona idia edia hagoevaia kara do ia doko. Bona Paulo ese danu ia gwauraia edena negai boubou gauna do ia henia, unai tau 4 ta ta edia latanai.

²⁷Inai dina 7 be kahirakahira idia ore neganai, Iuda taudia haida Asia dekena amo ese Paulo idia itaia Dubu Helaga lalonai. Idia ese taunimanima idia habadua, vadaeni idia ese Paulo idia dogoatao.

²⁸Idia boiboi, idia gwau, “Israela taudia e, umui durua ai. Inai tau ese taunimanima ibounai gabu ibounai dekenai ia hadibaia noho, iseda bese bona Mose ena taravatu bona inai Dubu Helaga do idia ura henia lasi. Bona inai danu ia karaia: Ia ese Helene taudia Dubu Helaga lalonai ia hakaua vareai, bona inai Gabu helagana ia hamiroa.”

²⁹Inai bamona idia hereva, badina be guna idia ese Tropimo, Efeso tauna, hanua lalonai Paulo danu idia itaia. Bona idia laloa, Paulo ese Dubu Helaga lalonai Tropimo ia hakaua vareai vadaeni.

³⁰Hanua ena kahana ibounai dekenai hoa mai badu danu ia vara, bona mai boiboi bada danu hanua taudia idia heau hebou, Paulo idia dogoatao, Dubu Helaga dekena amo idia veria lao murimuri. Vadaeni, nega tamona iduara ibounai be idia koua.