AONEGA HEREVADIA 15:18-30

¹⁸Badu haraga tauna ese heai ia havaraia noho, to haheauka tauna ese maino ia havaraia noho.

¹⁹Lahedo tauna ena dala, be mai hekwakwanai gaudia momo danu, to gaukara momokani tauna ena dala, be namo bona mai daradara lasi.

²⁰Aonega merona ese iena tamana ia hamoalea noho, to kavakava tauna ese iena sinana ia negea noho.

²¹Kavakava taudia be edia kavakava dekenai idia moale noho, to aonega taudia ese kara maoromaoro idia karaia noho.

²²Sisiba momo do oi tahua noho, bona do oi kwalimu, to sisiba do oi abia lasi neganai, do oi moru.

²³Iena haere maorona ese tau ta do ia hamoalea, bona ena nega korikori dekenai, hereva namona ta ia gwauraia, be namo bada!

²⁴Aonega tauna ese mauri dekenai ia lao dalana, ia raka daekau noho. Ia be mase dekenai ia lao dalana, ia raka diho noho lasi.

²⁵Lohiabada ese hekokoroku tauna ena ruma ia veria diho noho, to vabu ena tano do ia naria namo herea.

²⁶Lohiabada ese kara dika taudia edia laloa gaudia, be ia badu henia noho, to laloa maoromaoro taudia edia hereva, be Lohiabada ese ia moalelaia noho.

²⁷Bema koikoi dekena amo moni oi abia neganai, oiemu famili taudia dekenai hekwakwanai do oi havaraia. Kara dika karaia totona moni do oi abia lasi, unai neganai do oi mauri daudau.

²⁸Kara maoromaoro taudia ese, haere idia henia neganai idia laloa namonamo guna. Kara dika taudia ese idia haere henia haraga, to kerere idia havaraia noho.

²⁹Lohiabada ese kara namo taudia edia guriguri be ia kamonai henia noho, to kara dika taudia edia noinoi, be ia kamonai henia lasi.

³⁰Iena vairana be mai kiri tauna ese, oi ia hamoalea noho, bona sivarai namodia ese, oiemu lalona ena mamina do ia hanamoa.