13Tau ena kudouna ia moale neganai ia kiri noho, to lalohisihisi ese, unai tau ena lauma ia hamanokaia noho.
14Laloa kehoa tauna ese aonega ia tahua noho, to kavakava taudia be, kavakava sibona dekenai idia moale noho.
15Iena hisihisi ia laloa noho tauna, ena mauri dinadia ibounai be dika, to kudouna dekenai ia moale tauna ese, nega ibounai iena noho ia moalelaia noho.
16Do oi ogogami, bona Dirava do oi gari henia noho be namo, to do oi kohu momo, bona mai oiemu hekwakwanai be dika.
17Raisi sibona, oiemu lalokau taudia danu do oi ania be namo, to vamu namo herea, badu noho taudia danu do oi ania be dika.
18Badu haraga tauna ese heai ia havaraia noho, to haheauka tauna ese maino ia havaraia noho.
19Lahedo tauna ena dala, be mai hekwakwanai gaudia momo danu, to gaukara momokani tauna ena dala, be namo bona mai daradara lasi.
20Aonega merona ese iena tamana ia hamoalea noho, to kavakava tauna ese iena sinana ia negea noho.
21Kavakava taudia be edia kavakava dekenai idia moale noho, to aonega taudia ese kara maoromaoro idia karaia noho.
22Sisiba momo do oi tahua noho, bona do oi kwalimu, to sisiba do oi abia lasi neganai, do oi moru.