AONEGA HEREVADIA 12:13-25

¹³Kara dika tauna be sibona ena hereva ese, do idia hadikaia, tarapu ese do ia hadikaia bamona, to kara maoromaoro tauna ese, kerere dekena amo ia roho mauri noho.

¹⁴Oiemu davana be oiemu hereva bona oiemu kara hegeregerena, ma oiemu gaukara hegeregerena ahuna do oi abia.

¹⁵Kavakava tauna ese ia laloa iena dala be maoro, to aonega tauna ese sisiba do ia kamonai henia.

¹⁶Kavakava tauna ese iena badu ia hedinaraia haraga noho, to laloa kehoa tauna ese, ia dekenai idia hereva dika henia neganai do ia laloa lasi.

¹⁷Hereva momokani tauna ese, hereva maoromaoro ia gwauraia hedinarai noho, to hereva koikoi gwauraia tauna ese, kara maoromaoro dalana ia hadikaia noho.

¹⁸Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.

¹⁹Hereva koikoi be nega sisina sibona do idia abia dae, to hereva momokani be do idia noho, ela bona hanaihanai.

²⁰Kara dika karaia dala idia tahua taudia, edia kudoudia be mai koikoi danu, to kara namodia karaia dala idia tahua taudia ese, moale bada do idia davaria.

²¹Kara maoromaoro taudia dekenai dika ia vara noho lasi, to kara dika taudia be idia hekwakwanai momo noho.

²²Lohiabada ese hereva koikoi taudia ia badu henia noho, to idia kara momokani noho taudia dekenai, Lohiabada ia moale noho.

²³Aonega taudia ese edia diba idia hunia noho, to kavakava taudia ese, edia kavakava idia gwauraia hedinarai noho.

²⁴Bema oi gaukara auka neganai, siahu bona goada do oi davaria, to oi lahedo neganai, hesiai tauna mai guia danu do oi lao.

²⁵Laloa metau ese oiemu moale do ia koua, to hereva namodia ese oi idia hamoalea diba.