Annabi Mika 7

1

2

3

4

5

6

7

¹N na tɔɔrɔfe yi ki! N luxi nɛ alɔ mixi naxan sigama sansi bogi bade a ba tɛmui, kɔnɔ a mu wɛni bogi toma naa, a mu xɔrɛ fanyi lima wuri kɔn na alɔ a wama a xɔn ma ki naxɛ.

²Ala xanuntenyie bara ɲɔn bɔxi ma, tinxintɔɛ keren mu luma naa. E birin na e boore tɔɔrɔfe a ɲaaxi ra, kankan gantanyi tema a ngaxakerenyi bɛ.

³E birin fata fe ɲaaxi rabade. Mangɛe, nee wama buɲa tinxintare xɔn ma. Kiitisae, nee kiiti sama kɔbiri nan tun ma fe ra. Kuntigie, nee fan e xa wasabaliya masenma. E birin na fe keren nɛ.

⁴Naxan na fisamante ra wo ya ma, na tan luma nɛ alɔ tunbe xɔnɛ. Ala xa kiiti lɔxɔɛ bara a li, alɔ ɲama makantɛ a fala ki naxɛ. Ɲama bɔɲɛ mini tɛmui bara fa.

⁵Wo naxa la wo dɛ fan boore ra, wo naxa la wo xanuntenyi ra, hali wo xa ginɛ naxan a sama wo fɛ ma, wo naxa wo xa gundo birin masen a bɛ.

⁶Na waxati di xɛmɛ a baba maberema nɛ, di ginɛ ti a nga kanke i, mamadi nun a xa mɔri nga kɔnɲɛma nɛ. Kankan yaxui findima a bari boore yati nan na.

⁷Kɔnɔ n tan, n ya tima Alatala nan na, n na n xaxili tima n nakisima Ala nan na, barima n Marigi n xui suxuma nɛ.

⁸I tan Isirayila yaxui, i naxa ɲɛlɛxin n ma tɔɔrɛ ra. Hali n bira nɛ, n man kelima nɛ. Hali n lu nɛ dimi xɔɔra, Alatala nan na n ma yanbɛ ra.

⁹N to yunubi raba Alatala ra, n fama nɛ a xa xɔnɛ sɔtɔde han a kamali, a fa n xun mafalade, a a xa tinxinyi masen n bɛ.

¹⁰N yaxuie na na to, e yaagima nɛ. Singe e nu a falama, «I Marigi Alatala na minden?» Kɔnɔ na tɛmui n tan nan e xa birɛ toma, e maboron sanyi ra alɔ boora naxan na kira ra.

¹¹I tan Isirayila, wo xa tɛtɛ rakeli lɔxɔɛ fama nɛ, wo xa naaninyie igboma nɛ.

¹²Na lɔxɔɛ mixie fama nɛ wo yire, kelife Asiriya nun Misira taae kui, kelife Misira bɔxi han Efirati xure, kelife baa nde ma a sa dɔxɔ baa gbɛtɛ ra, kelife geya nde ma a sa dɔxɔ geya gbɛtɛ ra.

¹³Duniɲa bɔxi fama nɛ kanade mixie xa wali ɲaaxie xa fe ra.

¹⁴Mɛɛni i xa ɲama ma, barima e findixi i kɛ nan na, naxee sabatixi e kerenyi ma fɔtɔnyi kui fiili fanyi sɛɛti ma. E xa e dɛ madon a fanyi ra, alɔ e nu a rabaxi Basan nun Galadi bɔxi ma tɛmui dangixi ki naxɛ.

¹⁵N kaabanakoe masenma nɛ e bɛ, alɔ e mini Misira bɔxi ra lɔxɔɛ naxɛ.

¹⁶Sie na wo sɛnbɛ to, e yaagima nɛ e xa sɛnbɛtareya kui.

¹⁷E xube donma nɛ alɔ bɔximase, e luma gaaxui nan kui won Marigi Alatala ya ra, e fa sɛrɛn.

¹⁸Ala mundun na naxan maniya i ra, naxan yunubi xafarima, naxan diɲɛma a xa kɛ tongomae dɔnxɔɛe ma? I mu xɔnɛ ragatama abadan, barima dugutɛgɛya masenfe muxu bɛ a rafan i ma.

¹⁹I man kinikinima nɛ muxu ma, i fama nɛ muxu xa yunubie lude naa, i fa e woli baa bɔtini ma.

²⁰I i xui rakamalima nɛ Yaxuba bɔnsɔɛ bɛ, i hinnɛma nɛ Iburahima bɔnsɔɛ ra, alɔ i i kali a ra muxu benbae bɛ ki naxɛ tɛmui dangixi.