1Hobede ya, ena dwai mu bidibao. Ena te nasi ebo bidi tiwai elama, te tuabo wiegi yai nedu du me deli gegebeo. Te tigidali wain ni du me, ni kaya fik du me, augwa te tigidali sela silalio.
2Te po digi wabo po page e dao. Te dago bulu tǫ kantride te doloba pai bidi me deli me bidibeo, te bidi me deligo te God wali me pabo meni. Mu menio. Tigidali bidigo te gasa bidi ela muabo sunumi naga gegebo dao. Te tigidaligo augwa abagi dabeba boi bidi ebo sę ebo dao.
3Augwaligo te dwai sę ebo kolesaga mu koneani. Te ofisa dabego me jas dabego te bidi dabeba i weyu, te augwaliba te mone menama, te po tų dolainu ebo dao. Augwaligo deli homu ebo dao. Te genuai nogi elalubo bidi dabego te jas dabeba te homu wei godolo ebo po obaso, te po tų doloyu, te jas dabego te bidi dabego wabo po wali peyu ebo dao.
4Te gasa bidi dabe mebago homugo te augwali wiegi yai doloba pai kolesaga ebo bidi da, te homu yali, Godigo suali, augwali te dwai bidi dabe da wali. Augwali te dwai nosai tiwai, te sesani elalubo bono tiwai yali. Te bodolu si pedalubo sogo, te Godigo aga we bidi dabeba te dwai dene ilaibao homu yali, te agai te profet dabego pedauwalide dąų wali po tiwai gilama yaibao. Godigo tama tibao, te augwa homu kolesaga kone tųą palama, te augwali umuna paibao.
5Awe, te sogo te ogwa dabego te augwa aya dabeba posobo po dwai weyu, te wegi dabego augwa ida dabego po sela sąyu yaibao. Te bidigo sali we dabego te augwa auwa dabe dali konila po weyu yaibao. Te bidi aga we wai dali te boi bidi pedelaibao. Tibaso, nago te naga abagigo wabo po me, hai namugo po me, te osola suao, dua dao. Tama nago te naga we dali wabo po tigidali me, te bugagia tonalu te yao.
7Tialima, ena da, ena digi dwagi yai homu eyu, eno konealubo homu Genuai Bidiba dąų walio. Te Godigo eno gedu haluasa po wabo odama, tama eno te eno God agai ena tau sagasobo tonalubo dao.
8Te dago boi bidi dabego te dabolo posobo po omainu me ilamuo. Mu tama, da tulaluali, tiali goli, te da ma hodaluaibao. Da be hulia side megi bidibao, tiali goli te Genuai Bidigo ula dabolo mawaibao.
9Dago dwai sęgę sabo sę te Genuai Bidigo gedude yali, tialima te dwasianu sogo naga tama te Genuai Bidigo haliga sębę elama, te dabolo dene mabo sę yaibao. Tiali goli, agai da tau saibao, tama te gasa bidi dabego da dali yali dwai sę agai dodolaibao. Te hulia side agai da selama, te da ulaba odasa asaibao. Te da bidibadi digi, te agai da boi bidi dabego nogode ma saibao, tama dago agai ebo doloba pai kolesaga sueibao.
10Polobadu te boi bidi dabego dabolo te tiwai posobo po wali, “God, duga Genuai Bidi, menade bidibawe?” wali. Tiali goli, nosali te Genuai Bidigo da tau sabo augwa sulama, te augwali hale dwai mu saibao. Te Genuai Bidigo augwali aiyaba elaluama, te augwaligo te tǫ pu aiyana pai, te bidi dabego sągągo agabo tiwai ebo sueibao.
11Dage te Jerusalem we bidi dabe, te sogo bodolu si pedalubo si da, te dagego te taun bagulubo masigi obo sę ma yabo bodolu si pedelaibao. Tama te sogo augwaligo te taun sesege badu te ibaba tegasa peyu, te genuai igi paibao.
12Tama nago we bidi te gasa tǫ kantride kalabus igi pali, te augwali ma asaibao. Augwali te wę Yufretis pedai badu te tǫ kantri Asiria, te giliga pedalubo badu asaibao. Te augwali Isip te saut badu asaibao. Tama augwali te tigidali habude te digibulu bidali te asiyu, te tǫ kantri te nambis badu elaluai, te genuai tamu ąį, me te bulu du pesage dabede bidali tagalama, asaibao.
13Tiali goli, te tǫ kantri dabe te olo masigi kemi tǫ pesage pedelaibao, magi baso meni, tede bidali we bidi dabego te dwai kolesaga hauwa yalio.
14Genuai Bidi, naga digi te naga dąų olama, sa muani we bidi dabe te naga tonalubo bidi bidao. Augwali te moni genuai dulu te wiegi yai tǫ elalubo bulu du dabe bagede bidibao, tama te gi bulabo wiegi yai tǫ me aiyadu elalubao. Tialima, nago augwaliba te wiegi yai tǫ elalubo madiba te gi bulugi pomainu yao, te Basan me Gileatde, te polobadu yali tiwai yao.
15Genuai Bidigo te po wei ponoyu, te po wai, “Te eno dage tau siyu, te bomai sę meba yaibao, te dagego sueibao, te eno dage Isipde selama, odasa asiyu yali sę tiwai yaibao,” po wai.
16“Te gasa hani bage augwaligo te bomo elalubao, tialima te augwaligo eno bomo sulama, te augwali dwai noma saibao. Te augwali wi elama, te augwa nogogo pedauwali pania siyu, me olo si pania saibao,” wali.
17“Te augwali eno gedude tǫba degasa dulama, te tabi bulu gigi paibao, te hasamani haliga bulu pabo tiwai yaibao. Te augwali wi elama, noma siyu, te augwali geme duala sali pesage tagalama, te pepeli deliba teda aselama, te dagego Genuai Bidi God enaba asaibao,” wali.
18Genuai Bidi, te god me deli nage tiwai me menio. Nago te naga we bidi dabe, te augwali kalabus igi peyu, meba ma asali bage, te augwaligo sęgę nago sela sądubadi gebao. Nago wado po wabo homu sębę te sesemane me elaludubeo. Menio. Sesemane sogo nago wiegi yai pemene eyu, te da godolo mu eyu, tau sabo dao.
19Te nago olo mu tau sabo wiegi yai kolesaga dabolo ma yaibao. Te nago dago sęgę aiyaba elalu, te magi nai me deli nago sągągo agabo tiwai ebao, tama te sęgę nago te tamu ąį ge aiyanu mu dulaliba te sąwaibao.
20Te nago naga po tigidali wali pelama, te nago da Israel dabeba te olo mu tau sabo wiegi yai kolesaga yaibao, te Abrahamgo wąį nǫų hani, te nago we bidi dabe dao. Te nago polobadu dago wąį nǫų dabebolo te dąų walali po tigidali te mu usu nubo dao.
