Mikias 7

1

3

4

5

6

7

¹Magay namnama! Kamanak din nadagaangan ay magay maanapanas nabay-an ay lames di kaiw ya lames di obas. Enggay naboras amin din lames di obas ya din laylaydek ay damo ay lames di igos.

²Enggay maga polos di nalinteg ay ipogaw ay kanayon ay mantongpal en Diyos. Nakasagana da amin ay manpese. Man-asiaanop da amin din sinkakailian.

³Nalaing da amin ay man-amag si lawa. Din oopisyal ya howis yan mankedaw da si pasoksok. Basta ibagan di mabigbigbig ay ipogaw din laydena yan mantotolag da ay mangikillo si nalinteg.

⁴Olay din kasigedan ay ipogaw et maiarig das tombek ay logam ono kaiw ay napagatan. Dinomteng din agew ay panosaan Diyos en daida ay kaman met laeng din indadaan di mamadto ay namanbantay en daida, et adi da ammo mo sinoy amagen da.

⁵Adi kayon mantalek sin tinokmang ya gayyem yo. Annadan yo din kali yo, olay en asawa yo.

⁶Tan enggay adi banolen din an-ak ay lallalaki din am-a da, ya din anan-ak ay babbabai yan kontraen da din iin-a da. Din manogang ay babai yan ibawena din katogangana ay babai. Din kalaban di esay ipogaw et din pamilya na met laeng.

⁷Ngem mo sak-en pay, sedsed-ek si Diyos. Sisya di namnamaek ay omisalakan. Ammok ay si Diyos ay daydayawek et patgana din kararag ko.

⁸Magay panragsakan di kalaban tako, tan olay naisokba tako, bomangon tako kasin. Ed wani, tinmotokdo tako sin mabolinget, ngem si Diyos di kapoan di silaw tako.

⁹Nanbasol tako en Diyos, isonga masapol ay anosan tako din bonget na. Ngem awni et salaknibanas datako sin kalaban tako. Dosaenas daida gapo sin ligat ay inpalak-am dan datako. Ibala nas datako sin mapat-a et maila tako din kinalinteg na sin pangisalakanana en datako.

¹⁰Mo ilaen din kaibaw tako din iyat Diyos ay omisalakan, palalo ay mabainan da. Daida met laeng di nanglaslasoy en datako ed idi ay nangwani, “Into ngin si Yahweh ay Diyos yo?” Edasan tako din kaabakan da et boyaen takos daida ay maipababa ay kaman pitek ay magatgatinan sin kalsada.

¹¹Dakayo ay taga-Jerusalem, omalin to di timpo ay pangisaadan yo kasin sin alad di ili yo ya paannawaen yo din beddeng di daga yo.

¹²Sin timpo ay sana, omali sin kad-an yo di mapod Assyria ya din ginawang ay Eufrates ay maibandas belaan di agew, mapod Egipto ay maibandas abagatan, ya mapo sin addawi ay baybay ya kadondontogan.

¹³Tan dana ay kailiili isnan daga et madadael da ya manbalin da ay kadardaratan begew sin lawa ay inam-amag di omili.

¹⁴Apo Diyos, ayowanam komas dakami ay pinilim ay ipogaw mo ta ipastol mos dakami ay kaman karnero. Ang-anggoy mi sin kada, ngem nanliniked sin kad-an mi di mayat ay pastolan. Ipastol mo komas dakami ed Basan ya Gilead ay kaman ed idi.

¹⁵Ipailam koma kasin di nakaskasdaaw ay kaman sin nangipangoam en dakami ay komaan ed Egipto.

¹⁶Ilaen to din odom ay nasyon et magay bael da olay mo pigay pigsa da. Gapo sin palalo ay masdaawan da, masngang ya mateweng da.

¹⁷Pakiokmon dan to di tapok ay kaman din eweg. Bomala dan to sin naaladan ay ili da et manpayegpeg das egyat da ay somag-en en sik-a ay Diyos mi.

¹⁸Magay odom ay diyos ay makaiso en sik-a, Apo. Tan pakawanem din basbasol mi ay ipogaw mo ay nakalasat. Baken eng-enggana din bonget mo, mo adi et malaydan ka ay mangipaila en dakami sin layad mo ay adi manbalbaliw.

¹⁹Maseg-ang ka kasin en dakami. Abakem din basbasol mi ay kaman mon in-gatin ya kaanem ay ikosnong mo sin lanad di baybay.

²⁰Ipailam din adi manbalbaliw ay layad ya seg-ang mo en dakami ay ipogaw mo ay polin da Abraham en Jacob, ay kaman din inkarim ed nabaon sin ap-apo mi.