Annabi Mika 1

1

2

3

4

5

6

7

¹Alatala xa masenyi nan ya a naxan ti Annabi Mika Moresetika bɛ Samari nun Darisalamu xa fe ra. A a ti a bɛ Yudaya mangɛ Yotami, Axasi, nun Xesekiya xa waxati nɛ.

²Duniɲa si birin, wo xa wo tuli mati n na. Ibunadama birin naxee na yi bɛndɛ fuɲi fari, wo xa n ma masenyi ramɛ, won Marigi Alatala fama wo kalamude naxan na, kelife a xa hɔrɔmɔbanxi sɛniyɛnxi kui.

³Wo xa a mato, Alatala na fafe kelife a xa lingira, a na gorofe geyae fari, a a ɲɛrɛ.

⁴Geyae na xunufe a sanyi bun ma, alɔ kumi dole naxan sama tɛ fɛ ma, alɔ ye naxan susufe kelife yire itexi. Geyae na ibɔɔfe, e findi gulunbae ra.

⁵Na birin kelixi Yaxuba bɔnsɔɛ xa murutɛ nan ma, a fatanxi Isirayila ɲama xa yunubie nan ma. Nde Yaxuba bɔnsɔɛe ramurutaxi? Samari xa mu a ra? Nde kuye batude tixi yire itexi fari Yudaya? Darisalamu xa mu a ra?

⁶Na kui n fama Samari findide gɛmɛ malanxie nan na, n a findi wɛni sansi side ra. N a xa gɛmɛ bilie rabira, n e radin gulunbae kui, han a xa banxie bunyi lu kɛnɛ ma.

⁷N a xa kuyee butuxunma nɛ, n a xa batu see ganma nɛ tɛ ra, n a xa ala masolixie xun nakanama nɛ. Nee fɔlɔxi bafata nan na naxan nawalixi langoe sare ra, nee man findima bafata nan na langoe sare fima naxan na.

⁸N fama sunnunde na nan ma, n na n kui iwa. N na n ɲɛrɛma nɛ n sanyi nun n fate mageli ra, n na n gbelegbele xui itema nɛ alɔ wulai bare, n na n kui iwa alɔ xundi.

⁹Samari xa fure ɲaaxi mu nɔma dandande, a man bara din Yudaya bɔxi ra, han a bara Darisalamu masɔtɔ n ma ɲama sabatixi dɛnnaxɛ.

¹⁰Wo naxa na fe rakolon Gatikae ra de wo wa xui ra. N dɔxɔxi xube xɔɔra sunnunyi kui Beti Leyafera.

¹¹Safirikae, wo xa dangi wo mageli ra yaagi kui. Saanan ɲama mu suusama minide. Wo mu nɔma wo xaxili tide Beti Eseli ra, e fan na wafe.

¹²Marotikae bara lu kɔntɔfili kui, barima gbaloe bara goro kelife e Marigi Alatala ma, a Darisalamu naadɛ li.

¹³Lakisikae, wo xa sɔɔri ragisee yailan. Wo bara a niya Siyonikae xa muruta Ala ma, Isirayila bara bira wo xa yunubie fɔxɔ ra.

¹⁴I tan nun Moreseti Gatikae fatanma na nan ma, Akisibukae fama nɛ Isirayila mangɛe yanfade.

¹⁵Maresakae, n gerefa gbɛtɛ xɛɛma nɛ a xa wo gere. Isirayila mangɛ ɲalama sigama nɛ Adulama.

¹⁶Wo wo xunyie bi alɔ yubɛ, sunnunyi xa fe ra, barima wo xa di xanuxie fama xaninde konyiya kui ɲamanɛ ma.