Annabi Mika 2

1

2

3

4

5

6

7

¹Ɲaxankatɛ na mixie bɛ, naxee e maɲɔxunma maifuya nun fe ɲaaxi rabafe ma e sa tɛmui, kuye nɛfɛ iba, e fa fe kobie raba, barima na nɔɛ na e yi ra.

²E na milɛ xɛe ma, e nee ba e kanyie yi ra. E na milɛ banxie ma, e nee tongo e sɛnbɛ ra. E fu mixi ma, e a xa banxi muɲa. E fu mixi ma, e a kɛ rasuxu a yi.

³Na xa fe ra, Marigi Alatala naxɛ, «N ɲaxankatɛ dɔxɔma nɛ na mixi mɔɔli ma, wo mu nɔma wo ratangade naxan ma. N fama wo xun gorode na ɲaxankatɛ tɛmui.

⁴E wo xa fe ifalama taali daaxi nɛ na lɔxɔɛ, e wo masigi a mayele ki ma, e nu fa a fala, ‹Muxu xa fe bara kana feo. Muxu xa bɔxie bara ba muxu yi ra. A bara e ba muxu yi, a e so muxu yaxuie yi ra.›»

⁵Na nan a ra, wo mu mixi yo sɔtɔma Alatala xa ɲama ya ma, naxan nɔma bɔxi itaxunde wo bɛ Ala xa tɔnxumae saabui ra.

⁶E xa namiɲɔnmɛe a falama, «Ba yi masenyi mɔɔli tife, namiɲɔnmɛ mu lanma a xa na fala. Won mu fama lude yaagi yo kui.

⁷Yaxuba bɔnsɔɛ, a lanma a xa fala, Alatala xɔnɔma a bɔɲɛ ma? A darixi na wali mɔɔli raba ra?» Alatala naxa e yaabi, «N ma masenyie mu fanxi xɛ tinxintɔɛe bɛ?

⁸Yi waxati n ma ɲama bara lu alɔ n yaxui. Wo donma fanyi bama dangi mixie ma, naxee fafe bɔɲɛsa kui kelife gere sode.

⁹Wo n ma ɲama xa ginɛe kerima e xa banxi fanyie kui, wo e xa die xa xunnakeli bama e yi ra n naxan fi e ma.

¹⁰Wo keli, wo siga, n bara yi bɔxi ba wo yi ra sabatide ra, barima a mu sɛniyɛn, a bara kana kerenyi ra.

¹¹Xa wule falɛ nun mixi madaxui fa a fala wo bɛ, ‹Wo fama beere nun wɛni sɔtɔde›, na mixi mɔɔli nan nafan wo ma namiɲɔnmɛ ra.»

¹²«Yaxuba bɔnsɔɛ, n wo birin malanma nɛ. Isirayila mixi dɔnxɔɛe, n wo xun lanma nɛ. N wo malanma nɛ, alɔ yɛxɛɛe naxee malanma gɔɔrɛ kui, alɔ xurusee naxee na fiili ma e dɛ madonde. Ɲama gbegbe sabatima nɛ naa.

¹³E xa mangɛ fama nɛ taa tɛtɛ ibɔɔde, a fa ti ɲama ya ra, a e birin naminima nɛ naa. Alatala nan findi e xunyi ra.»