1Miqueas sogded: “¡An duledar-wiles! Ibmar-gwag-yorgi-weleged-abin an nonisulid. Uva-solagan-weleged-abin an nonisulid. Degisoggu, uva-san-dukgwenad bar an daksulid, degi, an higuera-san-gunnegala gwen an daksurbalid.
2Dule-wiledakmalad bela neggweburgi obelolesad, we-yargi dule-innikimalad bergusad. Bela dule-oburgwedgi-binsadimaladi, na muchub-muchub yamodidimalad.
3Ibmar-isgana-imakedgi dule gwen egi obinsulid. Dule-dummagan-negsemamaid, degi, dule-igar-nabomalad, dule-bamaladse manigi-baklegar, igar nabomalad. Dule-gandikmalad e-itolegedba ibmar egismalad, e-ibmar-abegedba ega ukdamalad.
4A-dulemar-abargi wis-dule-nuegan-gudimaladdina, bur bule sapi-ikobiidyob gued. A-dulemar-abargi dule-bur-innikigwaddina, bur bule ikomaryob gued. Suli-suli-itoleged-e-ibadi begi danikid, Bab-gayaburba-barsogmalad bega-ibmar-sogsadyobi, sabsur-odurdakleged-iba bato bega warmaksad.
5Degisoggu, melle be-ai-ibmar-soged be itogo, degi, melle dule-baid-bega-ibmar-soged be itogo. Be-ome-ebo be sunmakalile, nue-itoakwaa be sunmako.
6Ar ade, masmala, e-sergangi binsaedsuli guded, bunamala, nangangi obited, balamar, sak-omegangi obited, degi, e-isdarmaladi, e-neguyaginmalad nanaed.
7Degi-inigwele, ani Miqueas, Bab-Jehováʼgi an bensulid, Bab-Dummad-an-abonogedi, an edarbedii guoed. An-Bab-Dummadi, an-itogoed.”
8Miqueas weyob sogded: “An-isdarmalad-yar-baid-baidgi-bukmalad, mer be an-odurdaklegedgi weligwar itomala. Ar an galakus-inigwele, amba an gannar gwisguoed. An negsichidgi gudii-inigwele, ar Bab-Jehová neg-meegwadga anga gued.
9Ar Bab-Jehováʼgi an isgusad, degisoggu, Bab-Dummad-anga-igar-nudakedse, degi, anga-igar-nabogedse an e-urwed itogoed. Geb Bab-Jehová, igar-nued anga oyogoed, degi, e-an-abonosadgi an werguoed.
10An-isdarad anga sokardaed: ‘¿Bia be-Bab-Jehováʼde? A-dule, an-dakalile, bingedar itodoed.’ An-sunnagwad an-ibya-nuki e-wilegoed an dakoed. A-dule, neg-imbaba-olligi-annalegedyobi guoed.
11”Jerusalén, gannar be-galu-matusurmalad-sobledele, be-yar-abingunanaid nasgudoed.
12A-ibagangine, dule-bamalad, Asiria-yala-akale, Egipto-yalase-dulemar-bukwad, bese nonimaloed. Nilo-diwar-akale, Éufrates-diwarse-dulemar-bukwad, bese nonimaloed. Demarsik-bukmalad-akale, demar-baidsik-bukmaladse-dulemar-bukwad, bese nonimaloed. Deginbali, yar-dummagansik-bukmalad-akale, yar-dummagan-baidsik-bukmaladse-dulemar-bukwad, bela bese nonimaloed.
13Dule-isgusmalad-ular, we-napneg olloo naguoed, deyobi, neg naguoed.”
14Bab-Jehová, be-dulamar be nue ako, be-mimmigan walagwengi sapur-nuedgi-bukmalad be nue akwedii be guo. Epennegwadyobi be Basán-yalase, degi, Galaad-yalase be sede.
15Egipto-yalagi Israel-dulemar-onosgu, ibmar-dakledisurmalad-oyosayobi, be oyoge.
16Dulemar-yar-baid-baidgi-bukmaladi, be-ibmar-gegerdaklemalad dakmaloed. Be-gandikid-dakoedba bingedar itodmaloed, geger-dakedba gaya-gadmaloed, degi, uaya-atidmaloed.
17Igi-naibe napagi yaarmakar-nanae, deyobi, nanamaloed. Ibdula-unimalad-unimakedyob gumaloed. E-dukued-neggi dobed-abalagi nodamaloed, be-asabin dobedgi ainidamaloed. Anmar-Bab-Dummad-Jehová, bese, gannar we-dulemar nonimaloed.
18Bab-Dummad, ¿ar doa beyobid e-mimmigan-besmaladga isgusad-elied gudii? ¿Doa beyobid ibmar-isgana-imaksad bela ei-ieged gudii? Ar be degisadegu, urwedii guosulid, ar ade, bur bule anmar-sabguedgi be binsaed.
19Gannar wile be anmar-dake. Anmar-isgued be osuloge, anmar-isguedgi mer bar be binsae.
20Jacob-waganga, be-ibmar-inniki-imaked, be oyoge, Abraham-waganga, dule-ise-wiledaked be oyoge. Epennegwa anmar-dadganga ise-sogar-imaksayobi, be ibmar imake.
