2 Timoteo 2

1

2

3

4

¹Ma u, natugu, una dekdek vanavana ta ra varmari tai Kristo Iesu.

²Ma ra lavur magit u ga valongore tagu ta ra mata i diat ra mangoro na tena valavalongor maravut, una tar ia ta diat ra umana dovot na tutana, nina ba na tale diat upi diat a tovo ta ra na bula.

³Una kairane maravut iau ta ra kaina kini, da ra bo na tena vinarubu kai Kristo Iesu.

⁴A tena vinarubu pa i taviviai mulai ta ra lavur balaguan ure go ra nilaun; upi na vamororo nina i ga pilak pa ia upi na tena vinarubu.

⁵Ma ona tikai i ongor ta ra varkaul, pa di toke tar ra kere tana, ba tumu pa i mur ra lavur varkurai tana.

⁶A tena ongor ta ra uma na vatur value vake ta vuaina.

⁷Una nuk pa go iau tatike; tago ra Luluai na vaminana iu ta ra lavur magit parika.

⁸Ma una nuk vatikene pa Iesu Kristo, nina i ga tut mulai kan ra minat, a bul mur tai David, da kaugu bo na varvai;

⁹ma nam iau kairane ra kinadik tana, da ra tena varpiam, ma di tar vi iau; ma go ra tinata kai God pa di vi ia.

¹⁰Kari go iau pidik tar ta ra magit parika ure diat di ga pilak pa diat, upi diat a vatur vake bula ra nilaun tai Kristo Iesu varurung ma ra minamar tukum.

¹¹Go ra tinata i dovot muka: Ba tumu da tar mat varurung me, dat a laun varurung me;

¹²ba tumu da kairane ra kinadik, dat a varkurai varurung me; ba tumu dat a pue vue, ia na pue vue bula dat;

¹³ari ona pa da dovot, ia i dovot vatvatikai; tago i dekdek upi na pue mule.

¹⁴Go ra lavur magit una vanuk tar mule ta diat, ma una manga vargat diat ta ra mata i ra Luluai, upi koko diat a varpuapuai ta ra lavur tinata, tago pa i topa ta magit ma i varara ka diat, dia valongore.

¹⁵Una ongor upi una tul tar mule u tadav God da ra dovot na tena papalum ba pa ta magit na vavirvir pirana, tago i palum bulu ra tinata i ra dovotina.

¹⁶Una vana irai kan ra lavur kaina pir maul; tago dia vatavua ra varpiam,

¹⁷ma kadia tinata na ngangar da ra kaina manua; Imeneo ma Pileto dir ta diat;

¹⁸dir rara kan ra dovot na vartovo, ma dir biti ba i tar par ra tinut mulai kan ra minat, ma dir tar vue pukue vue ra nurnur kai ta ra umana.

¹⁹Ma ra dekdek na vunapaina, ba i vuna tai God, i tur padikat, ma go ra vakilangina: A Luluai i nunure diat kana tarai; ma: I boina ba diat par, dia vatang ra iang i ra Luluai, diat a vana kan ra lavur varpiam.

²⁰Ta ra ngala na pal ta umana la dia tur tana, diat di pait ia ma ra goled ma ra silva, ma diat bula ba di pait ia ma ra davai ma ra pia; ta umana ure ra magit i ruru, ma ta ra umana ure ra magit pa i ruru.

²¹Ma ona ta tikai i ki varbaiai ma go diat, da tibe upi ia a la i ruru, nina di tar vagomgom ia, ma na topa ra luluai, ma di tar vaninare ure ra lavur bo na papalum parika.

²²Una vilau kan ra kaina mamainga na barmana, ma una mur ra mangamangana takodo, a nurnur, a varmari ma ra malmal, varurung ma diat dia kail upi ra Luluai ma ra gomgom na bala i diat.

²³Una ole vue ra lavur tinir na papaua ba pa ta kabinana tana, tago u nunure ba dia vuna ta ra varngangar.

²⁴Ma i tabu upi ra tultul kai ra Luluai na varngangar, na madu ra maukuana pire diat a tarai par, na tale ra papalum na vartovo, na ki vovovon,

²⁵ma na tovo diat ra umana tena varongongoi ma ra madu na bala; kan God na tul tar ra nukpuku ta diat ma diat a nunure ra dovotina,

²⁶ma upi diat a laun mulai kan ra kun kai Satan, nina i tar kinim vake diat upi kana mamainga.