1/E si’da/ jin ta ya/m pem mo, ’bithi /e is mo eya ’the jin di’d eya Ḵrisṯẖos jin ta’da Yesus mo,
2dhali a’di jin ciḵkina /e ’peni aha/ nṯwa/a/ mo ka ma’diny iman/o gwo mo tani c̱iki uni ’kwani kun ta ku isiŋ gana/ mo mmodhu mo, uni kun mini mish tiyan tiya gwo ṯor si’da/ mo be.
3Budhi isa nyor pini jin pwaḵu /e mo me’da thuruḵ gana/ ma Ḵrisṯẖos jin ta’da Yesus mo be.
4Athuruḵa kamu/ yisa di’da jin midi re’d is piti ki to gi monyc̱a’b piti mo me’d jin dina a’di mmomii to ma thuruḵ mo, haali/ tom piti jin guna a’di ki e mo tani ta mii jin mina a’di mii mo mmokap̱ a’di adu mo, a’di jin kar a’di aṯu’c ma thuruḵ mo be.
5Wathiŋ kamu/ jin ishki’da bor ka ’cesh mo e mo ma lo’b mo tani minu ’koki shum ki toŋ’kup̱ mo isi ciki/ a’di midi mii thim isi gwo jin ḵanuwa ḵan mo gom mo ma lo’b yansan mo be.
6A’di ta’da mansi to jin mii’da ṯu’c jin ’batha’ba’th mo, a’di ḵa ba/ iminu pwaḵki ’kup̱ to jin ’ciṯẖu/ nṯwa/a/ mo.
7Kulumi gwo ibwa mo gom gwo kun oka/ mo haali/ Tap̱a a’di midi c̱i /e mo jin mishu gwo ’ban mo goma ris to ’baar mo be.
8Kayi aYesus Ḵrisṯẖos e mo a’di jin pikunu mo ’peni mowu mo, a’di jin ta emen ’pena Dawuu’d mo, me’d gwom pem jin c̱ikika/ e gwom ’borga/ mo,
9a’di jin ta gwom ’borga/ a’di jin ’koshka/ is ka nyor mo dhali rash mo ka maḵḵiya m’bame’d mo me’da manṯẖu’th to mii mo. Hili Gwo ma Arumgimis mo tani a’di yisa ta gwo jin deḵu mowa.
10Wakan aha/ ’dimkina ’kup̱ mo eya ris to ’baar mo gom gway gi uni kun kwanykunu mo, ki uni si’da/ mini ’taki bu’th bway mowoṯẖ yan jin diki’d eya Ḵrisṯẖos jin ta’da Yesus mo jin midi nyaḵ ya ki monyca ki sule/ sule/ ya ye ’ba/ mo.
11Gwo yan jin onu mo tani ta gwo jin ta isiŋ gana/ mo be ki: Waḵki/ ana wuna mo nyaḵki a’di mo tani ana si’da/ mina ’ko ki e nyaḵki a’di mo be.
12Waḵki/ ana ’dima ’kup̱ mo tani ana si’da/ mina nyaḵ tap̱a ta ki a’di mo be. Waḵki/ ana mina waṯ a’di gway mo tani a’di si’da/ midi waṯ ana gway mo be.
13Waḵki/ ana dara gi moŋgam gwo is mo tani a’di di’d kan mmota ji gi isiŋ gana/ mo be – haali/ a’di midi mol is piti waṯ mo be.
14Rogomi uni ki gwo yan mo dhali ḵan uni gwo mo ibwambori Tap̱a mo mmotheṯẖ gwo jin sugu mo gom gwo mo, a’di jin diki ḵal miiŋ kamu/ ’kup̱ pa mo, hili a’di jasi ’ce’d uni sho’k mo, uni kun ciḵ a’di mo.
15Miiyi miim pini ki dher mo mmoc̱i buŋgwar is pini ka Arumgimis mo me’d a’din ’de/ jin ṯesu mo, mmota wathi/ ma ṯu’c mo, a’di jin mina isi mii diki ’the mo, a’di jin midi dher bway ka ḵar/e mo e gwoŋ gana/ mo, mmoṯor a’di ki ’twaŋ gwocon mo.
16Theṯẖi/ mo ’peni gwo kun ’kon ki p̱e’th mo haali/ a’di midi sus ’kwani ka ris mo e mo jin ushuwa Arumgimis ki nyanye/ mo dhali ki nyanye/ mo
17dhali gwom buni mini shwa bway mo me’d jama/ mo. E bwam uni gwansan mo tani ta iHiminayus mo dhala P̱ilitus mo,
18uni kun wanykin mo ’peni gwoŋ gana/ mo mmobu’th gwo ki wup̱ mo mmo/o ki mompinu a’di peki’d mo hila/. Uni ki kum moŋgam gwo is gi ’kwanin tiya ’twa/a ’cesh mo.
19Hili moŋḵa’b ma Arumgimis ṯelkunu sho’k mo mmodosh mo, mmoḵal mo jin dina gwo yan ka ’dan’dap̱ mo ki: Tap̱a mishi uni gwansan kun ta kum piti mo, dhali, Dhalka ris ’kwani ’baar ka ’deṯe/ ’deṯe/ mo uni kun yeri gway gi Tap̱a mo, ḵwa/ is buni bwa mo ’peni miinthus kun shi/ashi/ mo.
20Dhali eya dhan gu’ba caaga/ mo tani toŋ’kul bwa ’kon si’da/ mo, kun ’koki ta jasi ’dolkon gana/ mo dhali ’dolkon kush mo, hili si’da/ toŋ’kul bwany cwa si’da/ mo dhali toŋ’kul bwa ma je kun ’thosu mo si’da/ dhali kun tiya kun tana ajji kun dhunu ki she/ ki dhuŋ gana/ mo dhali kun tiya si’da/ kun dhunu mmota abar mo.
21Waḵki/ wathin ṯal ’deŋ kamu/ midi dhelel is piti mo ’peni mii kun waḵu mo tani a’di midi ta toŋ’kul bwa mo jin karu ki she/ ki kar gana/ mo goma ṯu’c gi montaḵ mo, mmota ji gi karu ki she/ mo dhali mishi to mii mo gom tap̱a gi gu’b mo, mmonyoŋkina a’di is mo goma risa ṯuca ’borga/ gunn mo.
22Wakan ship̱iṯi/a ŋwac̱a/ mo ’peni miin dhuru’c pini jin karkina /e e ki ’thir ’thir mo dhali guyi mo ma ḵar/e ki e mo, dhali moŋgam gwo is mo, dhali mo/en mo dhali moŋḵu’th is mo nyaḵki uni gwansan kun yuḵki gway gi Tap̱a ’pena dum buni kun dheleladhelel mo.
23Dhalka hirdhe/ ki c̱i mo gom mo jin doṯu/ gwowa doṯ mo kun ta gwom p̱us mo dhali gwo kun ’konuki ye’th sho’k mo. /E mishin ki uni c̱isina le’d jin walu ki ṯas ṯas mo.
24Dhali amanmii to gom Tap̱a mo tani a’di midi mii diki mii ta amanwala le’d ki ṯas ṯas mo, hili a’di mina bwa mii ta gi kush gom ’kwani ’baar ka ’deṯe/ ’deṯe/ mo, dhali jin midi mish ta amanṯor gwo ki ’twaŋ gwocon mo, mmothona thon me’di ’ko’d mo,
25mmoḵucur unim piti gwahan ki gwo mo kun cesh a’di mo ki thiṯẖ mo, ki mii jin ’thup̱u e ki ’thup̱ mo. Arumgimis wari midi ’taki c̱i uni mo jin rijuwa du is mo dhali p̱u’du/ mo mmomish gwoŋ gana/ mo,
26dhali uni mini ’taki ye mo ’pena gume/ gi tap̱a ma ruma ’cesh mo ’ko’di mom piti jin bu’thkina a’di uni mo mmomii bwam piti mo be.
