2 Timoteo 1

1

2

3

4

¹Paulo, ra apostolo kai Kristo Iesu ta ra varkurai kai God, da ra vamading ure ra nilaun tai Kristo Iesu,

²tadav Timoteo, a vakak na natugu: A varmari, ma ra varmaram, ma ra malmal, tai God, Tama i dat, ma Kristo Iesu kada Luluai.

³Iau pite pa God, nina iau torom tana ma ra gomgom na varkurai na bala, da ra umana tamagu, ma pa iau ngo ma ra ninunuk up u ta kaugu umana niaring, ta ra marum ma ra keake,

⁴ma iau mainge tuna pi ina gire u, tago iau nuk pa ra lur na matam upi da vabuka iau tana ma ra gugu;

⁵tago iau nuk pa ra dovot na nurnur i tur piram, ma i ga tur lua pire Loi, tubum, ma Oinike bula, tinam, ma iau nunure i tar tur piram bula.

⁶Kari iau vanuk tar mule tam upi una vamalamalapang ra tinabar kai God nam i ki piram ure ra papalagur na limagu.

⁷Tago God pa i ga tul tar ra tulungea i ra bunurut ta dat, pata, a tulungea i ra dekdek iat, ma ra varmari ma ra minatoto.

⁸Koko una vavirvir ure ra varvai kai kada Luluai, ba ure iau kana tultul di ga vi ia; una kairane maravut iau ra kinadik ure ra bo na varvai ta ra dekdek i God;

⁹nina i tar valaun dat ma i tar ting pa dat ma ra gomgom na varting, vakir ure kada papalum, ure ke kana mamainga ma kana varmari, nina di ga tul tar ia ta dat tai Kristo Iesu papa amana lua iat, ba pa ta tataun boko,

¹⁰ma go i tar tapala ta ra vinavana rikai kai kada Tena Valaun Kristo Iesu, nina i ga vuna vue ra minat, ma i ga vaarike ra nilaun tuna ma ra nilaun pa na mutu ure ra bo na varvai,

¹¹di ga tibe iau ure pi ina tena varvai ma ina apostolo ma ina tena vartovo tana.

¹²Kari go iau kairane bula go ra lavur magit; ma pa iau vavirvir tana; tago iau nunure nina iau ti nurnur tana, ma i tar ot muka ra nuknukigu ba na pait valar pa ia pi na balaure vake nam ba iau ga nur tar ia tana tuk ta nam ra bung.

¹³Una vatur vake ra valavalar ure ra bo na varvai nam u ga valongore tagu, ta ra nurnur ma ra varmari kai Kristo Iesu.

¹⁴Nam ra bo na magit di ga nur tar ia tam, una balaure vake ure ra Takodo na Tulungen, nam i ki ta ra bala i dat.

¹⁵Go ra magit u tar nunure, ba diat par maro Asia dia ga vana kan iau; Pigelo ma Ermogenes diat.

¹⁶Boina ba ra Luluai na tul tar ra varmari tadav ra kuba i Onesiporo; tago i ga valagar milate pa iau, ma pa i vavirvir ure ra agu vivi na palariam;

¹⁷ma, ba i ga ki Rom, i ga ongor ma ra tinikan upi iau, ma i ga tikan tadav iau

¹⁸(boina ba ra Luluai na tul tar ia tana upi na gire tadav ra varmari tai ra Luluai ta nam ra bung); ma u tar nunure bulu kana mangoro na papalum maramaravut aro Epeso.