1Macawtaco nama ka sawtei, Khri Zisu letei a ungpaw ningdonah thong khei na thaw a tlungsah my lo.
2Mataico, bia hnikhuitu mehlupui hme letei ka reipaw na thuipaw hming sahlo khah cawngsaw hringpaw a cawngpah khypaw he, na zingpaw cawngsaw sahlo khah kaisah my lo.
3Khri Zisu a raekeh chaw hratah kaaning khahei ruhanah khah ing hrah my lo.
4Raekeh rai a hre leimeipaw taco alailang rai a cangpaw lekhei a thlah lai be, abuipaw lungtong khah a zawng hri.
5Ma hraco asaipasinah letei a zongpaw cawh a phunglang naning tei hratah a zong ly caco, tetu cangnah mai lukhu cawh hmuh khy be.
6Raisah a hrepaw, ly a thlopaw taco ly taitei a chuhpaw saze a tinghangpaw khah a hmuh tawcai ruapaw a cang.
7Ka reipaw bia heh pacang my lo. Zecawtamaw tatah Abuipaw taco ma vytei hnithainah heh a ca pae a.
8David pathlah a cangpaw Zisu Khri thihnah taitah pa thokawpaw khah a thui paria thlang my lo. Ma heh ka thawngchawbia cawh a cang.
9Ma rawng tahei mehsua hratah bahrairui tah khinah tai heh ka ingpaw a cang hi. Canghrasala, Khazing bia cawh bahrairui tah khi cang be.
10Macawtaco Khazing tah a thingpaw sahlo aa cawtah zezong maikaw heh ing neh ka, ma cawh Khri Zisu letei a ungpaw pachahnah khah chaizaw rungnawnah khatah aa hmuh khy hrah nápaw cawtah a cang.
11Ma heh zing tlang a tlahpaw bia cawh a cang. “Ama khatah kaa thih caco, Ama khatah ka hring kaw he peh,
12kaa ing caco, Ama khatah kaa uh hrá a. Ama kaa paphahsai caco, Ama zong tah a ma paphahsai hrá a.
13Zing tlang kaa cang ly zong tah Ama cawh zing tlang a cang. Zecawtamaw tatah Ama le Ama cawh a paphahsai khy be,” tahpaw hratah.
14Aaning sahlo khah ma hming heh thuisah leimei my lo. Bia rawng tah a hrychae ly pawtah Khazing a hme letah raering pei my lo. A mai ung be ca ka, naw aa thliapaw sahlo khah a rorang he.
15Khazing tei naw a tlah khuipaw raihretu cang rua pawtah biatah teitah a hlai my lo. Biahmuisui khah a ningcang teitah ahmangpaw raihretu cawh ningzaw ruapaw zehmai a ung lypaw hratah na hlai a.
16Khazing tlechai lynah bia rei cakhawngnah khah cahri my lo, zecawtamaw tatah ma hratei bia aa rei cakhawngpaw he cawh Khazing khatah a hlah vy tima he.
17Mataico, aa cawngpahnah cawh hmawchia hratah kaipaza ka, ma sahlo hrong leco Humenai le Fileta a tae hrah he.
18Ma sahlo he cawh biahmuisui taitei lang a pavepaw a cang he. Thokawnah cawh atoheh a cang thah tah he ka, mehthaikheh sahlo zingnah khah aa rorang.
19Zekhatah a cang zong tah Khazing tei a bingpaw a thahrang cawh a cy paria thlang ka, “Abuipaw taco, ama a tei a cangpaw khah a hni he,” tah le, “Abuipaw ming ka zing a tahpaw maikaw taco chahlynah khah a huisai he seh,” tatah cakhai a cang.
20Ing alaipaw chung letah a ungpaw hming le bo cawh sui le ngung tah tuapaw longtei cang lytah thing le alui tah tuapaw sahlo zong a ung hrah. Chykheh cawh pasungpanaw teitah hmang ruapaw tah cang ka, chykheh cawh hmang cakhawng thlangpaw tah a cang.
21Macawtaco, cawngsaw pakheh tah ama khah a pialuipaw taikhei a pathai a pahling teitah a tua caco, pasungpanaw tlangpaw hmingbo, a pathaipaw, Khazing tei a hmang ruapaw, hmingchaw maikaw tuanah cawtah hmang a tlahpaw a cang a.
22Mehny cangning tei sua dunah achaw lypaw khah saisai la, dingnah le, zingnah le, donah le, denah khah lungthing pathai hmo tei Abuipaw a y leimeipaw sahlo khakhei a cadai lai my lo.
23Canghrasala, hru a chuipaw bia a eilainah letah a pahlawh kheh lo, ma hming taco a hrychaenah a chuakhui tei tahpaw na hni thlang kho.
24Abuipaw sae a cangpaw cawh a hrychae be, ming maikaw cung letah donah a hnui a, cawngsaw a cawngpah khypaw cang a ka, a lung a sy a.
25Ama a cakhaepaw sahlo zong khah ningnai teitah cawngpah he seh la, Khazing tah a ngepachihsah he seh la, biahmuisui hninah lang khah a chui khy he seh tahpaw hnabeisuinah khah hnuipaw a cang.
26Mataico aaning sahlo cawh aa lung va haa ka, Setan tah ama a dunah tuasah rua pawtei a tlenah pawhe ahui taikhei a chuhthlah he a.
