2 ፂሞቲዮሳ 2

1

2

3

4

¹ሂዛ፥ ታ ናዓው፥ ኪሪስቶስ ዬሱሳን ዴዒያ ማሮቴꬃን ሚና።

²ዳሮ ማርካታ ሲንꬃን ታኒ ኔና ታማርሲዳ ቲሚርቲያ፥ ሃራታ ታማርሳናው ዳንዳዒያ ኣማኔቲዳ ኣሳስ ሃዳራ ኢማ።

³ዬሱስ ኪሪስቶሳስ ኣማንꬂያ ዎታዳሬ ጊዳዳ ታራ ሜቶ ኤካ።

⁴ኦላ ዎታዳሬይ ባ ሃላቃ ኡፋይሳናው ጊጌቴሲፔ ኣቲን ሃራ ኦሶን ባና ፔሼና።

⁵ሄሳዳካ፥ ጋዴ ዎፂያ ኦኒካ ቤሲያ ኦጌራ ጋዴቶና ኢፂኮ ዎይቶ ኤኬና።

⁶ጎሻን ዳቡሪያ ጎሻንቾይ ባ ዳቡራ ኣይፊያፔ ሚያ ኮይሮ ኣሲ ጊዳናው ቤሴስ።

⁷ኔ ኣኬካና ሜላ ጎዳይ ኔና ማዳና ጊሾ ታ ኔው ኦዲዳባ ኔ ዎዛናን ናጋ።

⁸ታኒ ማርካቲያ ዎንጌላ ሜላ ሃይቆፔ ዴንዲዳ፥ ዳዊቴ ዜሬꬂ ጊዲዳ ዬሱስ ኪሪስቶሳ ቆፓ።

⁹ታኒ ዎንጌላ ኦዲያ ጊሾ ኢታባ ኦꬂዳ ኣሳዳ፥ ቃሼታዳ ሜቶ ኤካስ። ሺን ፆሳ ቃላይ ቃሼቴና።

¹⁰ሄሳ ጊሾ፥ ፆሳይ ዶሪዳ ኣሳቲ ኪሪስቶስ ዬሱሳን ዴዒያ ኣቶቴꬃ ሜሪና ቦንቹዋራ ኤካና ሜላ ኤንታ ጊሾ ኡባባን ዋዬታይስ።

¹¹ሃይሳዳ ያጊያ ቱማ ቃሊ ዴዔስ፤ «ኑኒ ኢያራ ሃይቂዳባ ጊዲኮ፥ ኢያራ ኢሲፌ ዴዓና።

¹²ኑኒ ጌንጪኮ፥ ኢያራ ኢሲፌ ካዎታና። ኑኒ ኢያ ካዲኮ፥ ኢ ኑና ካዳና።

¹³ኑኒ ኣማኔቶና ኢፂኮ፥ ኢ ኣማኔቲዳይሳ ጊዲዲ ዳና። ኣይስ ጊኮ፥ ኢ ባና ካዳናው ዳንዳዔና» ያጌስ።

¹⁴ኔኒ ኤንታ ሃይሳ ኣኬኪሳ፤ ኤንቲ ቃላታ ጋሶን ፓላሞና ሜላ፥ ጎዳ ሲንꬃን ኤንታ ዞራ። ሄሲ ሲዔይሳታ ꬋይሴሲፔ ኣቲን ኣይኮካ ማዴና።

¹⁵ኔኒ ቱማ ቃላ ሱሬቴꬃን ታማርሴይሳኔ ዬላዮና ኦሳንቾ ጊዳዳ፥ ፆሳይ ናሺያ ኣሳዳ፥ ኔናቴꬃ ኢያው ኢማናው ሚና።

¹⁶ሺን ሃ ኣላሚያስ ኢንጄቲያ ጎዖና ኦዳፔ ባቃታ። ሄሳ ሜላ ኦዳይ ኣሴ ፆሳፌ ሃሴስ።

¹⁷ሄሳ ሜላ ኦዳይ ኣሳቴꬂ ሚዲጊያ ፓፆና ዎይዛዚሬ ማዱንꬃ ሜላ። ሄሳ ሜላ ኦዳ ኦዴቴይሳታ ጊዶፌ ሄሜኔዮሲኔ ፊሊፆሲ ዴዖሶና።

¹⁸ሃ ኣሳቲ ቱማ ኦጊያ ኣጊዲ፥ «ሃይቂዳ ኣሳይ ሃይቆፔ ቤኒ ዴንዲዶሶና» ያጊዲ ጉꬃ ኣሳታ ኣማኑዋ ꬋይሲዶሶና።

¹⁹ጊዶሺን፥ ፆሳይ ሚኖ ዛላ ሂፂዳ ጊሾ ቃፃናው ዳንዳዔና። ኢያ ቦላ፥ «ጎዳይ ባይሳታ ኤሬስ። ጎዳ ሱንꬃ ፄጊያ ኦኒካ ኢታ ኦሶፔ ሃኮ» ያጊያ ቃላይ ፃፌቲስ።

²⁰ኢሲ ጊታ ኬꬃን ዎርቃፌ ዎይኮ ቢራፔ ኦሴቲዳ ሚሼታ ፃላላ ጊዶናሺን ሚꬃፌ ዎይኮ ኡርቃፌ ኦሴቲዳ ሚሼቲካ ዴዖሶና። ሄሳታፔ ባጋቲ ቦንቾ ኦሶስ፥ ቃሲ ባጋቲ ቶሼቲያ ኦሶስ ፔዖሶና።

²¹ሄሳ ጊሾ፥ ኦኒካ ኢታ ኡባ ኣጊኮኔ ባና ጌሺኮ፥ ቦንቾ ኦሶ ኦꬂያ ሚሼ ጊዳና። ኤንታ ዴዖይ ጌሺኔ ጎዳ ኡፋይሲያባ፥ ቃሲ ኤንቲ ሎዖ ኦሶ ኡባ ኦꬃናው ዳንዳዔይሳታ ጊዳና።

²²ናዓቴꬃ ኢታ ኣሙዋፔ ባቃታ። ጌሻ ዎዛናን ጎዳ ፄጊያ ኣሳታራ ኢሲፌ፥ ፂሎቴꬃ፥ ኣማኑዋ፥ ሲቆኔ ሳሮቴꬃ ካላ።

²³ሺን ኦሺ ሜꬌይሳ ኤራዳ ኤያቴꬂኔ ሃዳ ጊዲዳ ፓላማፔ ሃካ።

²⁴ጎዳ ኦሳንቾይ ኣሳ ኡባስ ኬሃ፥ ሎዖ ታማርሴይሳኔ ዳንዳዓንቾ ጊዳናው ቤሴሲፔ ኣቲን ኦዬታናው ቤሴና።

²⁵ኢ ባራ ኤቄቴይሳታ ኣሽኬቴꬃን ሴሬይሳ ጊዳናው ቤሴስ። ኤንቲ ባንታ ናጋራፔ ሲሚዲ ቱማ ኤራናዳ ፆሳይ ኦꬃኔኮ ኦኒ ኤሪ።

²⁶ኤንቲ ባንታ ዎዛናኮ ሲሚዲ ባ ሼኒያ ኦꬃና ሜላ ኤንታ ኦይኪዳ ፃላሄ ፂሂያፔ ኬሲ ኤካና።