1Timotiga navesinegantoa ne'nimoka, Krais Jisasimpi hagerfino asunkuma hunegantegu hunka hanavetinka manio.
2Kagra nentahinke'na maka vahe zamufi huzmasmino'a kema amage nentaza vahera huzamasmige'za, zamagra anazanke hu'za ruga'a vahera rempi huzamiho.
3Kagra nagrama enerua kna kataza enerinka, Krais Jisasina knare sondia vahe'agna huo.
4Kraisi sondia ne'mo'a mopafi mani'zampina uvazi evazia nosie. Na'ankure huhampri ante'no sondia eri'za ami'nea ne' azeri muse hugahie.
5Ana zanke huno mago ne'mo zokagopi taragino nevuno, kasege amage' ontesimo'a muse'zana kini fetorira e'origahie.
6Hanavetino hoza enerisia ne'mo hoza'afi fore hania ne'zana ese'zana erino negahie.
7Negasmua naneke antahi ani' huo, Ra Anumzamo ana kemofo agafa'a hunegasmina, hakare zana antahigahane.
8Jisas Kraisinku kagesa are'are huo, fripinti eteno oti'ne, Daviti negeho'e, knare musenke (gospol) huama nehue.
9Na'ankure nagra ana zanteku hu'na knazana eneri'na hazenke vahe kna hu'na kina nehue. Hu'neanagi Anumzamofo nanekemo'a kina osugahie.
10Na'ankure ana agafare maka vahe'mo'za knare hanazegu kna zampina mase'na oti'na nehue. Ana hanuge'za hamprima zamante'nea nagamo'za Krais Jisasi'a zamaresige'za manivava konariri msa'a (glori) erigahaze.
11Ama'i tamage naneke, Jisasi'ene fri'nomota, agrane ksefa huta manigahune.
12Knazama hanavetita mani'neta tagrama erisunana, henka'a Agrane kini kva vahe tro huta manigahune. Agriku ontahi'none huta tagrama hanunkeno'a, tagrikura ontamage'noe huno Agra nena hugahie.
13Tagra tamentintia nosunanagi, Agra ke'a ruotagregahie, na'ankure Agra havigea osugahie.
14Maka vahera huzmagesa huge'za ama ana nanekea antahiho. Kazigazi hunka Anumzamofo avufina zamazeri atru nehuge'za, ana nanekegura ke hakare osu'za fra ovaziho. Fra nevazisage'za antahisaza vahe'mokizmia zamazeri havia hugahie.
15Eri'zanka'a kazigzi hunka e'nerigeno, Anumzamo negageno erizanka'agu muse hunegantena, kagazegura osugahane. Ana nehinkenka tamage naneke'a hufatgo hunka huama hugahane.
16Hianagi avufa'a omne mopafi zante hantaka hantoko naneke hanafina manigno, na'ankure ana zamo'a zamaza osnige'za havi anumzamofo avu'ava hugahaze.
17Ana naneke zamimo'a zamufgafi (gengrin, kensa), fugo namumo tera huno via kna nehie. Ana nanekema nehaza vahe'pina, tare netre mokizni znagi'a Himenasi'ene Filetusike,
18tamage naneke atre'ne hzagrena'a netremoke fri'zanpinti oti'zana hago fore hu'ne nehune, mago'a zamentintine vahera zamarimpa kna erinezmi'e.
19Ana hu'neanagi Anumzamofo nanekemo avempa huno arafuna reno me'ne, azanko avo (seal) me'negeno amanage huno kre'ne, Ra Anumzamofo nagare hu'za mani'naza vahera zamantahino keno hu'ne. Maka agi hanta nevaziza Ra Anumzane nehaza vahe'mo'za kefo mani'zampina maniagetagi'za maniho.
20Menia mago ra nompina kolire ene silivareke tro hu'naza tinkvogera omne'ne, hagi mago'a zafare ene mopare trohu'naza tinkvone me'ne, mago'a kavomo'a ra agi amigahie. Hanki mago'a kavomo'a, ra agi'a omigahie.
21Hu'negu, mago'mo ana kefo zampinti agu'a sese hanimo'a, ra agi ami' tintafe kna hugahie. Zamazeri otage hanige'za, ozafa zamimofo eri'zampina knare hu'za eriga nehu'za, maka knare eri'zama erisagu zamu ante'za manigahaze.
22Menia kahefa vahe'mo'za kefo avu'avazanku zamagesa nentahizankna osunka atrenka fro, fatgo zamofo nevaririnka, kmentinti nehunka, vaheku kvesinezmantenka fru hunka manio. Iza'o fatgo huno nemnino, Ra Anumzamofo agihanta nevzisia vahe'ene manio.
23Hu'neanagi negi neno antahi'za omne vahe knara osuo, antahi sankeno'ma hafra huga hu'nesia kegura kamefi humio.
24Ra Anumzamofo vahemo'za kefra ovazi snaze, hianagi vahera zamesi nezmante'za, rempi hunezmi'za, hazenke huzmante'saza vahe enena agzone hu'za maniho,
25Fru huta fru kefinti ke hakare hurmantesamokizmia zamazeri fatgo hiho. E'ina hanageno ana ke ontahisaza vahera Anumzamo zamaza hina, zamagu'a rukrahe nehu'za tamage kea antahi'za keza hugahaze.
26Anahina zamagu'a ante fatgo nehu'za, Sata kifopima ahe'nazana katufegahaze. Sata'a kina huzmante'nege'za avesi'zama nevaririza zampintira atre'za vugahaze.
