2 ፂሞቶሳ 2

1

2

3

4

¹ሲሚ ታ ናዓው፥ ኪሪስቶሲ ዬሱሳን ዴዒያ ኣꬎ ኬካቴꬃን ሚና።

²ቃሲ ዳሮ ማርካቱ ዴዒያሳን ታፔ ኔኒ ሲሴዳ ዬዋቱዋ ሃራቱዋ ታማሪሳናው ዳንዳዪያ ኣማኔቴዳ ኣሳቱዋሲ ሃዳራ ኢማ።

³ኪሪስቶሳ ዬሱሳው ኣማኔቴዳ ዎታዳራዳን፥ ታናና ዋዬታ።

⁴ኦላ ቢያ ዎታዳራይ ባሬ ካፑዋ ናሼቻናው፥ ዎታዳራ ጊዴና ኣሳይ ኦꬂያ ኪታን ዋላኬቴና።

⁵ቃሲ ዎꬃን ኬሴቲያ ኡራይካ ዎጋዳን ዎፃና ꬋዮፔ፥ ዎይታ ኣኬና።

⁶ዳሮ ዳቡሪዴ ኦꬄዳ ቢታ ጎሺያ ቢታኒ ሺቄዳ ካꬃፔ ባሬና ጋኪያዋ ኮይሮ ኣካናው ቤሴ።

⁷ኔኒ ኡባባ ኣኬካናዳን፥ ጎዳይ ኔና ዳንዳዪሳና ዲራው፥ ታኒ ጊያዋ ቆፓ።

⁸ታኒ ዎንጋላ ሚሺራቹዋ ኦዲያዋዳን፥ ሃይቁዋፔ ዴንዴዳ ዳዊቴ ዛሪያ ዬሱሲ ኪሪስቶሳ ቆፓ።

⁹ታኒ ዎንጋላ ሚሺራቹዋ ኦዲያ ዲራው፥ ኢታባ ኦꬄዳዋዳን፥ ሃራይ ኣቶ ቃሼታና ጋካናው ዋዬታይ። ሺን ፆሳ ቃላይ ቃሼቴና።

¹⁰ሄዋ ዲራው፥ ታኒ ፆሳይ ዶሬዳ ኣሳቱካ ኪሪስቶሲ ዬሱሳን ዴዒያ ኣቶቴꬃ ሜꬊና ቦንቹዋና ዴማናዳን፥ ኡንቱንቱ ዲራው፥ ታኒ ኡባባን ዋዬታይ።

¹¹ሃዌ፥ «ኑኒ ኣናና ኢቲፔ ሃይቄዳዋ ጊዶፔ፥ ኣናና ኢቲፔ ዴዓና።

¹²ኑኒ ጌንጮፔ፥ ኣናና ኢቲፔ ካዉታና። ኑኒ ኣ ካዶፔ፥ ኢካ ኑና ካዳና።

¹³ኑኒ ኣማኔቴናን ኣጎፔካ፥ ኢ ኣማኔቲያዋ ጊዲዴ ዴዓናዋ። ኣዪሲ ጎፔ፥ ኢ ባሬና ባሬ ሁጴው ኤሪኬ ጋናው ዳንዳዬና» ጊያዌ ቱሙ ሃሳያ።

¹⁴ኔኒ ኔ ኣሳ ሃዋ ሃሳዪሳ፤ ኡንቱንቱ ቃላን ፓሉሜቴና ማላ፥ ፆሳ ሲንꬃን ዞራ። ሄዌ ሲሲያ ኣሳ ባዪዚያዋፔ ኣቲን፥ ኣይኔ ጎዔና።

¹⁵ኔኒ ፆሳ ቱማቴꬃ ቃላ ሱሬቴꬃን ኦዲያዋኔ ቃሲ ኣ ኦሶ ዬላቴና ኦሳንቻ ጊዳዴ፥ ፆሳይ ሳቢያ ኣሳዳን፥ ኔ ሁጲያ ፆሳው ኢማናው ሚና።

¹⁶ሺን ሃ ሳዓው ኢንጄቲያ ማዴና ሃሳያፔ ኔና ናጋ። ኣዪሲ ጎፔ፥ ሄዌ ፆሳፔ ኣሳ ሃሴ።

¹⁷ቃሲ ኡንቱንቱ ታማሪሲያዌ ቦላ ጪቱዋዳን ኡባሳ ጋካናሳ። ሄ ታማሪሲያዋንቱፔ ላዓቱ ሄሜኔዮሳኔ ፒሊፆሳ።

¹⁸ኡንቱንቱ ቱሙዋ ኦጊያ ኣጊዴ፥ «ሃይቁዋፔ ዴንዲያዌ ካሴ ኣꬊዲጌዳ» ያጊዴ ኣማሬዳ ኣማኒያ ኣሳቱዋ ኣማኑዋ ባዪዚኖ።

¹⁹ጊዶፔካ፥ ፆሳይ ኤሴዳ ሚኖ ቱሳይ ቃፃና ዳንዳዬና። ቃሲ ኣ ቦላን፥ «ጎዳይ ባሬዋንታ ኤሬ»፤ ቃሲ «ጎዳዋ ጊዲያ ኦኒኔ ኢታ ኦሱዋ ኣጎ» ያጊያ ቃላቱ ፃፌቴዲኖ።

²⁰ኢቲ ዎልቃማ ጎሌን ዎርቃፔኔ ቢራፔ ሜꬌቴዳ ሚሻ ፃላላ ጊዴናን፥ ሚꬃፔኔ ኡርቃፔ ሜꬌቴዳ ሚሻቱካ ዴዒኖ። ሄዋንቱፔ ባጋቱ ቦንቾ ኦሱዋ ኡንቱንቱን ኦꬃናው፥ ቃሲ ባጋቱ ቶሼቲያባ ኡንቱንቱን ኦꬃናው ሜꬌቴዲኖ።

²¹ሄዋ ዲራው፥ ኦኒኔ ሃ ኢታባ ኡባፔ ባሬና ጌሾፔ፥ ኢ ባሬ ጎዳ ጎዒያ ኦሱዋ ኦꬃናው ባሬና ኢሜዳ ዲራው፥ ቦንቾ ኦሱዋ ኦꬂያ ሚሻ ጊዳናዋ። ቃሲ ሎዖ ኦሱዋ ኡባ ኦꬃናው ጊጌቴዳዋ ጊዳናዋ።

²²ሺን ኔኒ ኢታ ዎዳላቴꬃ ኣሙዋፔ ባቃታ። ባሬንታ ማዳናው ጌሻ ዎዛናፔ ጎዳ ፄሲሲያዋንቱና ኢቲፔ፥ ፂሎቴꬃ፥ ኣማኑዋ፥ ሲቆቴꬃኔ ሳሮቴꬃ ሚኒሳዴ ካላ።

²³ሺን ኤያቱዋ ፓሉሚኔ ኣይኔ ኤሬናዋንቱ ፓሉሚ ዋላሳ ካሌꬂያዋ ኤራዴ ኣፔ ባቃታ።

²⁴ጎዳ ቆማይ ኡባው ኬኪያዋ፥ ሎይꬂ ታማሪሲያዋኔ ዳንዳያንቻ ጊዳናው ቤሴፔ ኣቲን፥ ዋላቄታናው ቤሴና።

²⁵ቃሲ ኢ ባሬና ኢፂያዋንታ ኣሺኬቴꬃን ሴሪያዋ ጊዳናው ቤሴ። ኡንቱንቱ ባሬንቱ ናጋራፔ ሲሚዴ፥ ቱማቴꬃ ኤራናዳን ፆሳይ ኦꬃኔንቶ፥ ኦኒ ኤሪ።

²⁶ቃሲ ኡንቱንቱ ባሬንቱ ዎዛና ቆፋው ሲሚዴ፥ ኡንቱንታ ባሬ ኮዬዳባው ኣዛዜታና ማላ ኦይቄዳ ፃላሂያ ካፑዋ ዳባፔ ኬሲ ኣካና።