Text copied!
CopyCompare
Paipel - 2. Samuel

2. Samuel 3

Help us?
Click on verse(s) to share them!
1Iwe, ewe maun lefilen pelien Saul me pelien Tafit a fis lon fansoun langatam. Iwe, Tafit a pöpöchökülela, nge ekewe chon ü ngeni ra akapwangapwangala.
2Iwe, ikkei ir nöün Tafit kewe mwän mi uputiu me lon Hepron: Iten ewe mwänichi Amnon, a nöüni me won Ahinoam seni Jesreel.
3Iten aruomanün Chileap, a nöüni me won Apikael piin pwülüen mä we Napal seni Karmel. Iten aülümanün Apsalom, a nöüni me won Maka, nge Maka nöün Talmai we fefin, ewe kingen Kesur.
4Iten afömanün Atonia, a nöüni me won Hakit, iten alimanün Sefatia, a nöüni me won Apital.
5Iten awonomanün Itream, a nöüni me won Ekla. Ikei ir nöün Tafit kewe mwän meinisin mi uputiu me lon Hepron.
6Iwe, lupwen a fis maun lefilen pelien Saul me pelien Tafit, Apner a apöchöküla an nemenem won pelien Saul.
7A wor eman ülüpwülüen Saul itan Rispa nöün Aia fefin. Lon eu rän Isiposet a üreni Apner, “Pwota ka kon ren ülüpwülüen semei?”
8Mürin, Apner a fokun song ren mine Isiposet a apasa. Iwe, a üra, “Ifa usun, ka wesewesen ekieki pwe üa angang ngeni Juta? Tori ikenai üa pwärala ai allükülük ngeni chon leimwen Saul semom we, ngeni pwin kewe pwal ngeni chiechian kewe. Üsap föri met Tafit epwe akufuk ren. Nge ikenai ka atipisiei ren eman fefin.
9Kot epwe nieila, are üsap afisätä fän iten Tafit mine ewe Samol mi Lapalap a pwon ngeni fän akapel.
10Üpwe angei ewe wisen king seni Saul me mwirimwirin kana o seikätä Tafit pwe epwe king won Israel me Juta, pwe epwe nemenem seni Tan tori Persepa.”
11Nge Isiposet a fokun niuokusiti Apner, iei mine esap tongeni apasa och fos ngeni.
12Iwe, Apner a tinala chon künö ren Tafit lon Hepron o apasa, “Iö a nemeni ei fanü? Sipwe eäni eu pwonen atipeeufengen, nge ngang üpwe alisuk le aliwini ngonuk aramasen Israel meinisin.”
13Tafit a üra, “Men öch, sipwe eäni eu pwonen atipeeufengen. Nge eu chök üa mochen kopwe föri. Kopwe emwenato Mikal nöün Saul we fefin, pun kosap tongeni küna mesei, are kosap emwenato.”
14Mürin, Tafit a tinala chon künö ren Isiposet nöün Saul we mwän o apasa, “Kopwe ngeniei pwülüei Mikal üa liwinietiu ipükü ünüchen ewe kükün inis seni ekewe re Filistia fän itan pwe üpwe pwülüeni.”
15Iei mine Isiposet a titi Mikal o angei seni pwülüan Paltiel nöün Lais we mwän.
16Nge Paltiel a eti Mikal fän kechü won unusen ewe al tori Pahurim. Mürin, Apner a üreni, “Kopwe liwinla.” Iwe, a liwinla.
17Iwe, Apner a churi ekewe souakomwen Israel o üreniir, “A fansoun langatam ämi mochen pwe Tafit epwe ämi king.
18Iei otun oupwele apwönüetä. Pun ewe Samol mi Lapalap a pwon ngeni Tafit o apasa, ‘Ren nei chon angang Tafit üpwe amanaua nei armasen Israel seni ekewe chon Filistia, pwal seni chon oputeer meinisin.’”

19Iwe, Apner a pwal kapas ngeni chon ewe ainangen Peniamin. Mürin a feila ren Tafit lon Hepron, pwe epwe üreni meinisin mine chon Israel me unusen chon ewe ainangen Peniamin ra tipeeu won pwe repwe föri.
20Iwe, lupwen Apner me rüe mwän ra feito ren Tafit lon Hepron, Tafit a föri eu kametip fän iter.
21Mürin, Apner a üreni Tafit, “Üpwe feila o achufengeni aramasen Israel meinisin reöm, en ai samol me ai king, pwe repwe föri eu pwonen atipeeu ngonuk, pwe kopwe nemeni meinisin ükükün mochenin letipom!” Mürin, Tafit a tinala Apner pwe epwe feila fän kinamwe.
22Iwe, lon ewe otun nöün Tafit kewe aramas me Joap ra liwinto seni ar küt liaper o uwato chomong liaper. Nge Apner esap chüen nom ren Tafit lon Hepron, pun Tafit a fen tinala pwe a feila fän kinamwe.
23Lupwen Joap me unusen ewe mwichen sounfiu mi eti ra feito, eman a asile ngeni Joap pwe Apner nöün Ner we mwän a feito ren king Tafit, nge ewe king a afeilai fän kinamwe.
24Mürin, Joap a feila ren ewe king o üra, “Met ka föri? Nengeni, Apner a feito reöm. Pwota ka mwüt ngeni pwe a liwinla?
25Ka silei pwe Apner nöün Ner we mwän a feito pwe epwe atupuk, epwe pwal ouwasacha mwökütükütum o silei meinisin mine ka föri.”
26Lupwen Joap a towu seni fän mesen Tafit, a tinala chon künö mürin Apner. Iwe, ra aliwinisefälieto Apner seni ewe chönüttu lon Sira. Nge Tafit esap silei usun.
27Iwe, lupwen Apner a liwiniti Hepron, Joap a emwenala ngeni ewe asamalap pwe epwe ita fos ngeni le monomon. Ikenan a posu luken Apner pwe a mäla, pokiten Apner a niela Asael pwin we.
28Nge lupwen Tafit a rong ei pworaus me mürin, a üra, “Ngang me chon mwüi aisap fokun tipis tori feilfeilachök me fän mesen ewe Samol mi Lapalap pokiten mälan Apner nöün Ner we mwän.
29Liwinin ei tipis epwe nom won Joap me chon leimwen saman meinisin. Amwo epwe wor lein mwirimwirin Joap mi towu seni inisir chönü mi limengau, ika aramas mi rupun pwötür, ika aramas mi öüreer, ika aramas mi mäla lon maun, ika aramas mi tütüngorfetal ener.”
30Iwe, Joap me Apisai pwin we ra nimanauei Apner, pokiten Apner a niela Asael pwiir we me lon ewe maun lon Kipeon.
31Mürin, Tafit a üreni Joap me ekewe aramas meinisin mi eti, “Oupwe kamwei üfemi, oupwe üföüf üf seni tuk o kechüeiti Apner.” Nge ewe king Tafit a tapwela mürin ewe pwor ewe somä a nom lon.
32Iwe, ra peiaseni Apner lon Hepron, nge ewe king a leüömong le kechü ünükün peiasen Apner. Pwal aramas meinisin ra kechü.
33King Tafit a eäni ei kölün kechü, “Pwota Apner a mäla usun eman aramasangau a mäla?
34Poum resap ririfengen, nge pecheöm resap fötek. Usun eman a turula mwen chon föföringau, iei usun ka turula.” Iwe, aramas meinisin ra kechüeitisefäli Apner.
35Mürin, ekewe aramas meinisin ra feito ren Tafit pwe repwe pesei pwe epwe mongö, lupwen a chüen rän. Nge Tafit a pwon fän akapel o apasa, “Kot epwe nieila, ika üa mongö mwen akkar esamwo tuputiu.”
36Iwe, ekewe aramas meinisin ra küna ei lapalap o pwapwa ngeni, pwal mettoch meinisin mine ewe king a föri ekewe aramas ra pwapwa ngeni.

37Lon ewe ränin aramas meinisin lon Israel ra weweiti, pwe esap letipen ewe king pwe Apner nöün Ner we mwän epwe mäla.
38Mürin, ewe king a üreni nöün kewe aramas, “Ifa usun, oua silei pwe eman samol ika eman mi lap a mäla lon Israel ikenai?
39Inamwo ika üa eman king mi kepit, nge üa chök apwangapwang ikenai. Nöün Seruia kei mwän ra kon pöchökül mwei. Ewe Samol mi Lapalap epwe liwini ngeni ewe chon föföringau ükükün an föföringau.”