1Me yib reb e duw ko ngiyal’ ni ba’aram ni ba ga’ nma yan e pilung ko mael, me pi’ David Joab nge yan, nge pi tolang ni bay nga tan pa’, nge salthaw nu Israel; miyad cham piyu Ammon ngar gelgad ngorad miyad m’ag e mael ko binaw nu Rabbah. Me par David u Jerusalem.
2Me reb e rran nike yan i gonowrug me od David ya i mol ni rran, nge yan ngalang nga daken e chigiy ko naun rok ntafen e pilung. Be yan u daken e chigiy, me changar me guy be’ ni ppin ni be maluk. Ma re pin nem e be’ nrib pidorang.
3Me l’oeg David be’ ni nge nang fan ko mini’ e re pin nem, minog ngak ni Bathsheba fithingan, ni Eliam e chitamngin, ma le’engin Uriah ni ba Hittite.
4Me l’oeg David bogi mol’og ni ngranod ra feked; miyad fek fare pin i yib ngak mi yow par. (Ka fini mu’ i lebuguy bangbengen e arow ko pal nike tay.) Me sul fare pin nga tafen.
5Me nang rok nike diyen me pi’ e thin nge yan ngak David ni nge nang.
6Me pi’ David e thin nge yan ngak Joab ni ga’ar, “Mu pi’ Uriah ni fare Hittite nge yib ngog.” Ma aram me pi’ Joab Uriah nge yib ngak David.
7Fa’ani taw Uriah, me fith David ngak salpen Joab nge salthaw, nge rogon e mael ni be yan.
8Me ga’ar David ngak Uriah, “Mman nga tabinaw rom ngam toffan boch.” Me pag Uriah David, me pi’ David ba tow’ath nge yan nga tabinaw rok Uriah.
9Machane de yan Uriah nga tabinaw rok; ya yan i un ngak e pi matanagen David ni Pilung ko mol u to’oben i langan e garog.
10Fa’ani rung’ag David nde yan Uriah nga tabinaw rok me fith ngak ni ga’ar, “Ke n’uw nap’an ni mman ma fin aray e kam sul; mang ndawor mm’ug nga tabinaw rom?”
11Me fulweg Uriah ni ga’ar, “Pumo’on nu Israel ngu Judah e yad bay ko mael, ni bay fare Kahol ko M’ag rok Got ni yad be fek; i Joab, ni ir e pilung ko salthaw nge pi tolang ko salthaw ni bay u tan pa’ e yad bay u daken e ted ni kar pired. Ere uw rogon ni nggu wan nga tabinaw rog ngu’ug abich ma gu be garbod, ma gu be mol rok e ppin rog? Gu be micheg nga fithingan urngin e pin’en nib thothup, nri dabiyag ni gu rin’ e binir e pa’!”
12Me ga’ar David, “Ere mpar u roy e daba’, ma gabul mu gu pi’em ngam sul ko salthaw.” Ma aram me par Uriah u lan yu Jerusalem e rofen nem nge ku reb e rran.
13Me yog David ngak ni nge yib i un ngak ko abich ko blayal’, me pi’ David e rrum ngak nge unum nge balyang ngay. Machane re nep’ i n’em e ku de yan Uriah nga tabinaw rok, machane me yan i mol nga daken e gulgul rok u lan e singgil rok girdi’en e matanagen tafen e pilung.
14Ma reb e rran riy me yoloy David bangi babyor nge yan ngak Joab ni pi’ ngak Uriah nge mang ir e fek i yan.
15I yoloy ngay ni ga’ar, “Mu tay Uriah nga mit e mael, ko gin nth’abi gel e mael riy, ma ga fulweg e salthaw nga wariyel ma ga pag ngan li’ ngem’.”
16Ere nap’an nike m’ag Joab e mael ko fare binaw, me pi’ Uriah ngabang ni manang nib gel e mael riy.
17Me yib e salthaw ko to’ogor nga wuru’ fare binaw ngar chamgad ngak e salthaw rok Joab ngar li’ed boch e pi tolang ko salthaw rok David; mi Uriah e reb e pi salthaw nem ni yim’.
18Me pi’ Joab e thin nge yan ngak David ni be weliy ngak murung’agen e re mael nem,
19me yog ngak fa’anem nike tay e thin nga l’ugun ni ga’ar, “Nap’an ni ga ra mu’ i weliy ngak David ni Pilung urngin e tin kan rin’ ko re mael ney
20ma sana ra damumuw nge ga’ar ngom, ‘Mangfan ni mmarod ngar mchugurgad ko re binaw nem ni ngam chamgad ngorad? Da mu nanged ni yad ra par ko yoror ko binaw ngar paged e gat’ing ngomed?
21Kam paged talin rogon nli’ Abimelek ni Jerubbeseth e chitamngin? I yim’ u Thebez, ni be’ ni ppin e par u daken e yoror ko binaw nge yin’ ba malang nga daken ni yima bilig e grain ngay, me aw ngak nge yim’. Ere mang nri mu chugurgad ko yoror?’ Fa’anra fith David ni Pilung e re bugithin ney me lungum ngak, ‘Fa’anem i Uriah, ni reb e tolang ko salthaw rom e ki un ko yam’.’”
22Me yan fa’anem ni kan tay e thin nga l’ugun ngak David me weliy ngak e tin keyog Joab ngak ni nge weliy.
23Me yan i ga’ar, “Pi to’ogor e yad ba gel ngomad miyad yib nga wuru’ fare binaw ni nggu maelgad u lan e tafel’fel’, machane ma gamad pi’rad i yan nga langan e garog ko fare binaw.
24Ma aram miyad par ko yoror ngu’ur paged e gat’ing ngomad, ma aram min li’ boch e tin tolang e salthaw rom; mi Uriah ni ku reb e salthaw rom nib tolang e ki yim’.”
25Me ga’ar David ngak fa’anem ni ka nol’oeg ke yib, “Ngamog ngak Joab ndabi mulan’, ya dabiyag ni ngan nang ko mini’ e ra yim’ ko mael. Mog ngak nge gelnag e mael ko re binaw nem miyad athamgiliy ngar koled.”
26Fa’ani rung’ag Bathsheba ni kan li’ e pumo’on rok ke yim’, me mowawnag.
27Ma fa’ani lebug nap’an e mowaw ko yam’, me mal’og David nga ni yan ni fek fare pin i yib nga tafen e pilung; nge mang le’engin me diyen nge gargelnag bochi pagel ni fak. Machane de fel’ u wan’ SOMOL e n’en nike rin’ David.
