1Kaburutiti maranai, bodu patepatena kamonai, tautaupauma si kasikasibau abiya kairavina, David ana abiya badana Joab, ba taupauma ana pipiya ba Israel abiabiyisi ereonowasi i poraisi. Kata Ammon biyisi si poporisi ba Rabbah si garapipini, saba David wai Jerusalem yai i madamana.
2Rabisi kesana nubanai, David ana aba dudauwa gawarinai i bomsiri ba, taupauma yovena wadakupunai i yewoyewo neubuwa, ba i kinana i gakira wai wasike i bitowatowa wai i kinani. Wasikena wai kepamara pusona.
3Ba pipiya kesana i porai iti toiruba kata kona kotoi. Pipiyina i wona, “Kona wai Eliam natuna, Bathsheba ba Hitti sebare Uriah kaowana.”
4Damanina ba David kawariyonayona i porai sita urabai. Ba wasikena i botu kurina wai yabata si dauwa ba i nae ana ku yove.
5Bathsheba i bopanani kata i manawa wai, David ana wara i porai, i wona, “Yauku a manawa.”
6Damanina, David wara nikasike i porai Joab kurina, “Hitti biyina, Uriah ki porai kuriku.” Kata Joab i porai David kurina.
7Maranai Uriah i verakasibau wai, David i toirubai, kata Joab ba abiabiyisi damanina kona, ba abiya si riuni wai mekabage e veravera. Ba Uriah i kaobeyei i wona, “Damanina wata.”
8Damanina ba David i wona, “Ke gakira am ku yove ba kuni yakam mara yogina.” Kata Uriah, taupauma yovena i kasibau taveyei ba kana puyo murinai David i porai.
9Saba Uriah kega i nae ana ku yove ba, taupauma yovena matam ketanai, aba potapotasi yabata si dauwa.
10Maranai David i nonori kata Uriah kega i nae ana ku yove wai, i toirubai, “Awaika i goyo? Niko mara veoromina rabarabai ku mamana ba, awaika kairavina kega ku nae am ku yove?”
11Ba Uriah i kaobeya, “Israel ba Judah abiabiyisi ba Bidamanina Maragasina Dedewagina wai tent kamonai te mamana ba au bada Joab ana pipiya yabata matarai si rubasekwa te mamana. Mekabage yauku ata nae au ku yove ba ata kam ba ata toma ba, kaowaku yabata kata dauwa? A bisuwonim nikona kega rubana ana wosei!”
12Damanina David kurina, i wona, “Karaku nina ke mana ba maram ani poraim kuna veramaga.” Kata Uriah Jerusalem yai i mana kao ruwamo.
13David ana waina wai i bababai yabata si kamdauwa ba i toma neganegai. Ba yebo kona pomnai kega i nae ana ku yove ba ana bada, ana saibisaibirisi yabata si dauwa mena.
14Mara i tom wai, David wara pepai i kirumi Joab kurina ba, Uriah i porai i kabari i nae.
15Warana kamonai i kiruma i wona, “Abiya memena i rakata saki ba e boborabora wai Uriah naonai ke terei ba koi sumarei sina kasibunui.”
16Joab i kuiri memena abiabiyisi maragata sakiyisi, meyaga kaikapona parinai si biabiya wai Uriah namai i terei.
17Maranai meyaga kaikapona kana pipiya si kasibau ba Joab ana pipiya yabata si rauwa wai David ana abiabiyisi mutusi si rabobo. Hitti biyina Uriah, yebo i rabobo.
26Maranai Bathsheba wara i nonori kata kaowana Uriah i rabobo wai, kairavina i nuwapoya ba i tou.
27Ba kaowana kairavina i nuwapoya ba i tou i kakaba murinai, David wara i porai wai i botu ana ku yove ba i yauni i kaowanei ba, natuna sebare i tuwei. Saba niko wose i wosei wai Bada kega i nuwagaire.
