1Ahaba ena natuna tau 70 be Samaria dekenai idia noho. Unai dainai Iehu ese revareva haida ia torea, ia siaia lao Samaria dekenai, hanua lohia taudia, bona tau badadia, bona Ahaba ena natuna idia naria taudia dekenai, ia gwau,
2“Umui ese Ahaba ena natuna umui naria noho, bona umui be mai emui kariota, hosi, tuari gaudia, bona hanua mai magudia danu. Unai dainai inai revareva umui abia neganai, maoromaoro
3Ahaba ena bese tauna ta, king dagi totona do ia namo herea tauna, do umui abia hidi, emui king do umui halaoa, bona ia hamauria totona do umui tuari.”
4Samaria ena lohia taudia idia gari bada herea, idia gwau, “King Iorama bona king Ahasaia ese Iehu idia koua diba lasi, ita be edena bamona do ita koua diba?”
5Unai dainai king ena ruma ena biaguna, bona hanua ena lohia tauna, bona hanua tau badadia, bona king ena natuna naria taudia ese Iehu dekenai inai hereva idia siaia: “Ai be oiemu hesiai taudia, oiemu oda ibounai ai dekenai, be do ai kamonai henia. To ai ese aiemai tau ta be king do ai halaoa lasi, oi sibona oiemu laloa hegeregerena do oi karaia.”
6Vadaeni Iehu ese revareva ta ma idia dekenai ia torea, ia gwau, “Bema umui be lauegu kahana dekenai, bona bema egu oda umui ura kamonai henia momokani, king Ahaba ena natuna tau edia kwarana ibounai do umui utua oho, bona kerukeru, nega inai bamona neganai, lau dekenai do umui mailaidia, Ieserele dekenai.” Unai neganai unai king ena natuna tau 70 be Samaria hanua tau badadia ese idia naridia noho, tau badadia edia ruma ta ta dekenai.
7Vadaeni revareva be idia dekenai ia ginidae neganai, tau badadia ese king Ahaba ena natuna tau 70 idia alaia mase. Edia kwarana ibounai be bosea haida lalonai idia udaia, bona Iehu dekenai idia siaia, Ieserele dekenai.
8Hereva mailaia tauna be Iehu dekenai ia ginidae, ia gwau, “Ahaba ena natuna tau edia kwarana ibounai idia mailaia vadaeni.” Vadaeni Iehu ese oda ia gwauraia, ia gwau, “Unai kwaradia ibounai be senu rua dekenai hanua ena magu iduara raka vareai gabuna dekenai do umui haboua, bona unuseni do idia noho ela bona dabai.”
9Daba neganai, Iehu be magu iduara gabu dekenai ia lao, ia gini, bona taunimanima dekenai ia hereva, ia gwau, “Momokani lau ese king Iorama hadikaia dalana lau tahua, bona lau alaia mase, umui be mai emui kerere ta lasi. To inai iena natuna ibounai be daika ese idia alaia mase?
10Unai dainai do umui diba momokani, Lohiabada ena hereva ibounai Ahaba ena bese totona gaudia be do idia vara momokani. Lohiabada ese iena hesiai tauna Elia ena uduna dekenai ia gwauraia hereva ena kara be ia karaia vadaeni.”
11Vadaeni Iehu ese Ahaba ena famili taudia oredia Ieserele dekenai ia alaia mase. Ahaba ena opesa taudia ibounai, bona iena turana momokani taudia, bona iena hahelagaia taudia, be Iehu ese ia alaia ore, ta ia mauri noho lasi.
12Iehu be Ieserele dekena amo ia toreisi, Samaria dekenai ia lao gwauraia. Dala dekenai, Betekede dekenai ia ginidae. Unai be mamoe naria taudia edia gabu ta.
13Unuseni king Ahasaia ena bese taudia be Iehu ese ia davaria, ia nanadaia, ia gwau, “Umui be daika taudia?” Idia haere, idia gwau, “Ai be Ahasaia ena varavara taudia, bona ai be Ahaba ena bese taudia bona Iesebele ena natuna do ai vadivadi henia totona ai mai.”
14Iehu ese iena tuari taudia ia oda henia, ia gwau, “Idia ibounai do umui dogoatao!” Vadaeni ibounai idia dogoatao, bona Betekede ena ranu guri ena badinai idia alaia mase. Mase taudia be 42. Ta ia mauri noho lasi.
15Iehu ese ma ia toreisi, bona dala dekenai Iehonadaba Rekaba danu idia hedavari. Vadaeni Iehu ese Iehonadaba ia hanamoa, ia gwau, “Oi ese lauegu kara oi ura henia momokani noho, lau ese oiemu kara lau ura henia momokani hegeregerena, a?” Iehonadaba ese ia haere, ia gwau, “Io.” Iehu ia gwau, “Bema unai bamona, oiemu imana lau dekenai oi henia.” Vadaeni Iehu, ese iena kariota dekenai Iehonadaba ia abia daekau.
16Iehu ma ia gwau, “Oi mai, ita lao, bona do oi itaia dahaka siahu karadia Lohiabada dainai lau karaia noho.” Vadaeni idia ruaosi be kariota dekenai Samaria dekenai idia lao.
17Samaria dekenai idia ginidae neganai, Iehu ese Ahaba ena bese taudia, do noho taudia, ia alaia mase, ela bona ibounai ia haorea, Lohiabada ese Elia ia hamaoroa hegeregerena.
18Vadaeni Iehu ese Samaria hanua taudia ibounai ia haboua, idia dekenai ia hereva, ia gwau, “Ahaba ese Bala ena hesiai gaukara ia karaia sisina, to lau Iehu ese Bala ena hesiai gaukara do lau karaia bada.
19Unai dainai Bala ena peroveta taudia, bona Bala dekenai idia tomadiho henia taudia, bona Bala ena hahelagaia taudia ibounai do umui boiria, idia mai, ta ese iena ruma dekenai do ia noho lasi, badina be boubou karana badana ta do lau karaia, Bala ena. Bema tau ta ia hedinaraia lasi, unai tau be do lau alaia mase.” To Iehu ese idia ia koia, ia ese Bala dekenai idia tomadiho taudia ibounai do ia alaia ore gwauraia.
20Iehu ia gwau, “Hebou badana ta, Bala hanamoa totona do umui gwauraia hedinarai.” Vadaeni inai hebou idia gwauraia.
21Bona Iehu ese hereva gwauraia taudia ia siaia lao, Israela gabu ibounai dekenai, unai hebou dinana idia gwauraia loaloa. Vadaeni Bala idia tomadiho henia taudia ibounai idia mai, ta iena rumai ia noho lasi. Idia be Bala ena dubu dekenai idia raka vareai, ela bona Bala ena dubu ia honu momokani, duduna ia lao bona duduna.
22Unai neganai, Iehu ese dabua helaga ia naria tauna ia hamaoroa, ia gwau, “Dabua helaga do oi abia mai, Bala idia tomadiho henia taudia ibounai edia.” Vadaeni ia ese unai dabua helagadia be idia dekenai ia henia.
23Unai neganai Iehu be Bala ena dubu ia raka vareai, Iehonadaba Rekaba danu. Iehu ese Bala dekenai idia tomadiho taudia ia hamaoroa, ia gwau, “Mani do umui itaia namonamo, bona do umui tahua, Lohiabada tomadiho henia taudia ta umui emui huanai ia noho lasi, to Bala tomadiho henia taudia sibona.”
24Vadaeni Iehu bona Iehonadaba be idia raka vareai, boubou bona gabua boubou danu, Bala dekenai do idia henia gwauraia. Iehu ese tuari taudia ibounai 80 dubu ena murimurinai ia atodia, unuseni idia gini, bona ia ese idia ia hamaoroa, ia gwau, “Umui ese inai dubu lalonai taudia ibounai do umui alaia mase. Bema umui emui orea tuari tauna ta ese dubu lalonai taudia ta ia hamauria neganai, lau ese unai tuari tauna do lau alaia mase.”
25Unai dainai Iehu ese iena boubou gauna ia henia vadaeni murinai, ia ese iena tuari taudia bona opesa taudia ia hamaoroa, ia gwau, “Umui raka vareai, ibounai do umui alaia mase, ta do ia heau mauri lasi.” Vadaeni, mai edia tuari kaia edia imana dekenai tuari taudia be dubu lalonai idia raka vareai, tomadiho taudia ibounai idia alaia mase, bona edia tauanina be murimurinai idia negea. Unai murinai Bala ena dubu ena lalona momokani daiutu dekenai idia raka vareai.
26Bona unai au tubua helagana, Bala ena dubu lalonai ia noho gauna, idia abia isi, murimuri dekenai idia huaia lao, idia gabua ore.
27Bala ena nadi laulauna, bona ena dubu danu idia hamakohia, bona idia hadikaia ore momokani, bona mei rumana dekenai idia halaoa, ia mai bona hari danu.
28Unai dala dekenai, Iehu ese Bala tomadiho henia kara be Israela dekena amo ia haorea momokani.
29To Iehu be Ieroboama Nebata ena kara dika, Israela ia hakererea kara dikana, ia rakatania lasi. Unai dika be inai: Betele dekenai bona Dano dekenai boromakau natuna ena laulau, golo gaudia, idia tomadiho henia noho.
30Vadaeni Lohiabada ese Iehu ia hamaoroa, ia gwau, “Oi ese kara namo oi karaia vadaeni. Egu vairana dekenai kara maoromaoro oi karaia vadaeni, bona egu ura ibounai oi karaia vadaeni danu, Ahaba bona iena bese taudia dekenai. Unai dainai oiemu natuna bona tubuna be Israela ena king dagi do idia abia ela bona uru 4.”
31To Iehu ese Lohiabada, Israela ena Dirava ena Taravatu, be mai ena kudouna ibounai danu ia badinaia lasi. Ia ese Ieroboama ena kara dika, Israela ia hakererea kara dikana, ia rakatania lasi.
32Unai dinadia lalonai, Lohiabada ese Israela ena tano ia hamaragia hamatamaia. Hasaele, Suria ena king ese Israela taudia ia halusia inai Israela tanodia dekenai:
33Ioridane Sinavai ena dina ia daekau kahana tano ibounai, Gileada tano, Basana tano, Gado, Rubena bona Manase taudia edia tano, ela bona Aroere hanua, Aranona Sinavai ena badinai.
34Iehu ena kara orena, bona iena boga auka karadia ibounai be Israela Ena King Edia Sivarai Buka ena lalonai idia torea vadaeni.
35Iehu be ia mase, bona Samaria dekenai idia guria. Iehu ena gabu dekenai iena natuna tau, Iehoahasa, ese king dagi ia abia.
36Iehu ese lagani 28 lalonai Israela ia naria, Samaria hanua dekenai.
