1Peroveta taudia edia orea tauna ta ena vabu ese Elisaia dekenai ia tai henia, ia gwau, “Oiemu hesiai tauna, egu adavana be ia mase vadaeni. Oi ese oi diba vadaeni, ia be Dirava ia gari henia tauna ta. To ia be mai ena abiatorehai, bona ia heniatorehai tauna ese unai abiatorehai abia lou totona, egu natuna mero ruaosi do ia abia lao, iena hesiai memero, mai guia danu idia do ia halaoa totona.”
2Elisaia ese vabu ia nanadaia, ia gwau, “Oi durua totona dahaka do lau karaia? Oiemu ruma dekenai dahaka ia noho?” Hahine ia gwau, “Lohia e, egu ruma dekenai be gau ta lasi, olive dehoro kavabu maragina tamona sibona.”
3Elisaia ese ia hamaoroa, ia gwau, “Do oi raka lao, oiemu badibadinai idia noho taudia, bona oiemu turana ibounai dekena amo kavabu momo, anina lasi gaudia do oi abia.
4Bona unai neganai, ruma do oi raka vareai, iduara do oi koua, bona oi, bona oiemu natuna ruaosi danu ese olive dehoro be kavabu ibounai edia lalonai do oi bubua. Idia ta ta ia honu neganai do oi atoa siri.”
5Vadaeni, hahine ese Elisaia ia rakatania, bona mai ena natuna ruaosi danu ruma idia raka vareai, iduara idia koua. Iena natuna memero ese kavabu haida idia mailaia noho neganai, vabu ese unai iena kavabu maragina dekena amo, olive dehoro ia bubua noho, bubua noho.
6Kavabu ibounai idia honu, vadaeni vabu ese iena natuna ta ia hamaoroa, ia gwau, “Kavabu ta ma do oi mailaia.” Mero ia gwau, “Ta ia noho lasi.” Vadaeni olive dehoro ena heau ia doko.
7Hahine be Elisaia dekenai ia giroa lou. Elisaia ese hahine ia hamaoroa, ia gwau, “Oi lao, unai olive dehoro do oi hoia, bona oiemu abiatorehai ena davana do oi henia. Bona olive dehoro orena, oi hoia lasi gauna, be oi bona oiemu natuna ruaosi emui mauri totona aniani gauna.”
8Dina ta Elisaia be Suneme dekenai ia lao. Kohu momo hahine ta be unuseni ia noho, bona ia ese Elisaia ia boiria, iena ruma dekenai do ia aniani. Unai dainai, unai dala dekena amo ia raka lao negadia ibounai, Elisaia be unai ruma dekenai ia noho, ia aniani.
9Unai hahine ese iena adavana ia hamaoroa, ia gwau, “Lau diba momokani inai iseda ruma ia raka hanaia nega momo tauna, be Dirava ena tau helagana ta.
10Mani emu kara ataiai daiutu maragina ta do ita karaia, unuseni mahuta patana bona pata, helai gauna bona lamepa do ita atoa. Vadaeni ita dekenai ia vadivadi mai neganai, ia be unuseni do ia daekau.” Vadaeni inai daiutu idia karaia.
11Dina ta Elisaia be Suneme dekenai ia ginidae, bona iena daiutu dekenai ia daekau, ia laga-ani.
12Elisaia ese iena hesiai tauna Gehasi ia hamaoroa, ia gwau, “Inai Suneme hahine do oi boiria.” Ia boiria, vadaeni hahine be Elisaia ena vairanai ia gini.
13Vadaeni Elisaia ese Gehasi ia hamaoroa, ia gwau, “Hahine dekenai do oi henanadai, oi gwau, ‘Oi ese oi hekwarahi bada ai dainai, dahaka do ai karaia oi dekenai? Oi dainai, Elisaia ese king dekenai, o tuari biaguna badana dekenai do ia lao, oiemu ura gauna do ia abia, a?’ ” Hahine be ia haere, ia gwau, “Lauegu varavara taudia edia huanai lau noho, egu gau ibounai be hegeregere vadaeni.”
14Elisaia ma ia gwau, “Vadaeni dahaka do lau karaia, oi do lau durua totona?” Gehasi be ia haere, ia gwau, “Hahine be mai ena natuna mero lasi, bona iena tau be ia buruka vadaeni.”
15Elisaia ia gwau, “Do oi boiria mai.” Gehasi ese ia boiria, vadaeni hahine be iduara dekenai ia gini.
16Elisaia ia gwau, “Vaira lagani, nega inai bamona neganai, oiemu natuna mero be oi ese do oi rosia.” Hahine ia gwau, “Lauegu lohia, Dirava ena tau e, lasi, mani emu kara lau do oi koia lasi.”
17To hahine be ia rogorogo, vadaeni vaira lagani neganai, ia ese natuna mero ia havaraia, Elisaia ese ia hamaoroa hegeregere.
18Lagani haida murinai, mero be sisina ia bada neganai, ia ese iena tamana danu uma dekenai ia gaukara, uiti idia utua taudia danu idia noho.
19Vadaeni mero ese iena tamana dekenai ia tai henia, ia gwau, “Tamagu e, lauegu kwarana ia hisihisi, lauegu kwarana ia hisihisi!” Vadaeni iena tamana ese hesiai tauna ia hamaoroa, ia gwau, “Mero be sinana dekenai do oi huaia lao.”
20Hesiai tauna ese ia abia isi, iena sinana dekenai ia abia lao. Mero be iena sinana ena mamuna dekenai ia helai ela bona dina tubua, vadaeni ia mase momokani.
21Hahine ese mero ia abia daekau, Elisaia ena daiutu dekenai. Ia ese mahuta patana dekenai mero ia atoa, bona iduara ia koua.
22Vadaeni ia ese iena adavana ia boiria, ia gwau, “Hesiai tauna ta lau dekenai do oi siaia, bona doniki ta danu. Lau be Dirava ena tau dekenai do lau lao haraga, vadaeni do lau giroa mai.”
23Iena tau ia gwau, “Badina dahaka hari dina oi lao, inai be hua matamata dinana o dina helagana ta lasi?” Hahine ese ia haere, ia gwau, “Vadaeni, ia namo, oi laloa lasi.”
24Hahine ese doniki ia abia hegaegae, bona iena hesiai tauna ia hamaoroa, ia gwau, “Doniki do oi haheaua haraga. Iena raka do ia metairametaira lasi ela bona lau ese oi do lau hamaoroa.”
25Vadaeni hahine ese doniki ia guia lao, ela bona Elisaia dekenai ia ginidae, Karamele Ororo dekenai. Elisaia ese hahine ia itaia, ia mai noho. Ia ese iena hesiai tauna Gehasi ia hamaoroa, ia gwau, “Oi itaia, Suneme hahine be unai.
26Do oi heau lao haraga, ia dekenai do oi nanadaia, oi gwau, ‘Oi be namo, a? Bona oiemu adavana bona natuna danu idia namo, a?’ ” Hahine ese Gehasi ia hamaoroa, ia gwau, “Gau ibounai be namo.”
27To ororo dekenai ia ginidae neganai, hahine ese Elisaia ena vairanai ia tui diho, Elisaia ena aena ia dogoatao. Gehasi ia raka vaira, hahine do oi doria lao totona, to Elisaia ia gwau, “Oi koua lasi, badina be iena lalona be ia hisihisi bada noho. Bona Lohiabada ese lau dekena amo ia hunia, lau dekenai ia hadibaia lasi.”
28Vadaeni hahine ia gwau, “Lohia e, lau ese natuna mero oi dekena amo lau noia, a? Lau gwau, ‘Lau oi koia lasi, ani?’ ”
29Elisaia ese Gehasi ia hamaoroa, ia gwau, “Oi heau lao haraga! Lauegu au do oi abia lao! Bema tau ta danu oi hedavari neganai, do oi haere henia lasi. Hahine ena ruma dekenai maoromaoro do oi lao, lauegu au be mero ena vairana dekenai do oi atoa.”
30To mero ena sinana be Elisaia dekenai ia gwau, “Mauri Lohiabada ena ladana dekenai, ia dekenai bona oi dekenai lau gwauhamata inai, oi do lau rakatania lasi momokani.” Vadaeni Elisaia ia toreisi, hahine ena murinai ia raka.
31Gehasi be ia raka guna, Elisaia ena au be mero ena vairana latanai ia atoa. To mauri ena regena ta o mauri ena toana ta ia hedinarai lasi. Unai dainai Gehasi be Elisaia dekenai ia giroa lou, ia hamaoroa, ia gwau, “Mero be ia noga lasi.”
32Elisaia be ruma dekenai ia ginidae, vadaeni iena mahuta patana dekenai mero ia itaia, ia hekure noho, ia mase vadaeni.
33Daiutu lalonai ia raka vareai, iduara ia koua, vadaeni ia ese Lohiabada dekenai ia guriguri.
34Vadaeni Elisaia be ia lao, mero ena latanai ia hekure diho, iena uduna be mero ena uduna latanai, iena matana be mero ena matana latanai, iena imana be mero ena imana latanai. Vadaeni Elisaia be unai bamona mero ena latanai ia hekure neganai, be mero ena tauanina ia siahu sisina lao.
35Elisaia ia toreisi, daiutu lalonai ia raka lao, bona ia raka mai, vadaeni mahuta patana dekenai ma ia daekau lou, mero ena latanai ma ia hekure lou. Vadaeni mero be nega 7 ia asimana, unai murinai iena matana idia kehoa.
36Elisaia ese Gehasi ia boiria, ia gwau, “Suneme hahine do oi boiria.” Vadaeni ia boiria. Hahine be ia mai, bona Elisaia ia gwau, “Oiemu natuna do oi abia isi.”
37Hahine be Elisaia ena aena badinai ia tui diho, iena vairana be tano dekenai ia atoa diho. Vadaeni ia ese iena natuna ia abia isi, ia raka lao.
38Nega ta Elisaia ese Gilegala dekenai ia giroa lou, bona unai neganai, unai kahana tano dekenai hitolo bada ia vara. Gilegala dekenai Elisaia ese peroveta taudia orea ta ia hadibaia noho neganai, ia ese iena hesiai tauna ia hamaoroa, ia gwau, “Uro badana be lahi dekenai do oi atoa, vasiahu do oi nadua inai peroveta taudia totona.”
39Orea tauna ta ese uma gabudia dekenai ia lao, aniani avadia haida do ia haboua totona, bona uda ena varovarona ta ia davaria, vadaeni ena huahua ia gogoa, iena dabua lalonai ia udaia. Ia giroa lou neganai, ia ese ia utua maragimaragi, bona vasiahu ena uro lalonai ia udaia. Ia diba lasi unai gau be dahaka.
40Vadaeni vasiahu idia bubua, unai orea taudia do idia inua totona. To idia mamia neganai idia boiboi bada, idia gwau, “Dirava ena tau e, inai uro lalonai poisini ia noho!” Idia ania diba lasi.
41Elisaia ia gwau, “Paraoa taina do oi mailaia.” Vadaeni uro lalonai ia udaia. Ma Elisaia ia gwau, “Ma do umui bubua, orea taudia do idia inua.” Bona dika ta be unai uro lalonai ia noho lasi.
42Ma nega ta, tau ta be Bala Salisa dekena amo ia mai, Dirava ena tau Elisaia totona, beredi ibounai 20 ia mailaia. Inai beredi, be idia utua bali ena anina ginigunana dekena amo, bona uiti anina matamatadia dekena amo danu. Elisaia ese iena hesiai tauna ia hamaoroa, inai beredi be peroveta orea taudia dekenai do ia henia, do idia ania.
43To hesiai tauna ia gwau, “Inai peroveta orea be tatau 100, inai beredi ena bada be hegeregere lasi.” Elisaia ia haere, ia gwau, “Idia dekenai do umui henia, do idia ania, badina be Lohiabada ia hereva vadaeni, idia be do idia aniani ore murinai, beredi haida, idia ania lasi gaudia do idia noho.”
44Vadaeni hesiai tauna ese unai beredi idia edia vairana dekenai ia atoa, bona idia aniani, ia hegeregere vadaeni idia dekenai. Aniani ia ore neganai, do ania lasi gaudia idia noho, Lohiabada ese ia hereva hegeregerena.
