8Laḡan ḡemota Elisa i nawa Sunem tauninemo. Bi ḡome waivini waiguyauna i miyamiya. Tana Elisa i giu vavasaḡe te ya nato ena vanuwemo bi ya kani. Bi laḡan muliḡa maiḡa i nawana ba maso i nato lisinemo i kanikani.
9Bi waivini mwanena i giuwena gado, “Bada, niga olotona tagu e sibe, laḡan wapawapa niga maiḡa ya nawanawa tana Maimaituwa taugiuwatana laukaina.
10Bi i visu te eda vanuwa dabanemo ena gabu ta voiye. Bi ena ani kena, ena bena, ena ani miya bi kwadam ta sivudi. Bi sauginemo i tavana ba ḡome ya kenakena.”
11Bi laḡan ḡemota Elisa i tava Sunem tauninemo ba i saḡa noke vanuwa dabanemo, ena ani kenamo bi i guliyovo i waiyawasi.
14Elisa ena taupaula Geḡasi i waitalayena gado, “Bai visuvisuna niga waivinina aubaina ta voiye?” Bi Geḡasi i giuna gado, “Tana mote i wainatuna bi mwanena kaikana i magula.”
15Kamaina bi Elisa ena taupaula i giuwena gado, “Kwa yoge ya saḡe.” Bi Geḡasi waivini i yoge te i saḡa mataetamo i moito.
16Bi Elisa i giuna gado, “Niga mainana laḡannemo bokina kwalabunemo ba gomana olotona nimamo kwa bewabewa.” Bi waivini i giuna gado, “Tam ba Bada taugiuwatana mote kuma kaiyovuḡegu bi tagu ba em taupaula.”
17Kamaina bi waivini i bwaga bi mba laḡannemo mainana kwalabu ḡesaunemo i wainatuna, maibena Elisa i giugiuwena luvanemo.
42Bi sauga ḡesaunemo oloto ḡemota Bal-Salisa tauninaḡa i tava. Bi mba kwalabunemo witi a geigei losina falawa wapedi 20 a voiyedi bi kota witi baikina Elisa i vite. Bi Elisa ena taupaula i giuwena gado, “Lava kani kwa vitedi te sa kani.”
43Bi ena taupaula i giuna gado, “Waye! Niga mote luvana te lava 100 sa kani.” Bi Elisa i giuna gado, “Bada i giu te lava sa kani bi mulinemo kani nevana ya kena gwasa, taunana aubaina kwa vitedi.”
44Kamaina bi taupaula lava kani i vitedi. Bi lava a kani te a kani nonoḡa bi kani nevana i kena gwasa, Bada i giugiuna luvanemo.
