2 Ḡaliḡalibona 2

2

4

5

17

18

21

22

23

¹Sauginemo Bada maso yavala vilivilitoto Elaidiya i saḡe i nawena malamo ba Elaidiya bi Elisa Gilgal a ḡose bi a nawa.

²Bi ḡome Elaidiya, Elisa i giuwena gado, “Niga ḡome kwa miyamiya, Bada i giukamaḡegu te yà nawa Betel.” Geḡa te Elisa i giuwena gado, “Bada miyamiyana isanemo yà giugiu te mote yàma gosem.” Taunana aubaina labuidi a nawa Betel.

³Bi ḡome taugiuwatana dubudi Betelmo a miyamiyana Elisa a giuwena gado, “Kuna sibe ee geḡa te niganana Maimaituwa em bada ya nawe malamo?” Bi Elisa i giuwedina gado, “Ei, e sibe bi koma giugiuwata.”

⁴Kamaina bi Elaidiya, Elisa i giuwena gado, “Elisa, niga ḡome kwa miyamiya, Bada i giuwegu te yà nawa Deliko tauninemo.” Bi geḡa te Elisa i giuna gado, “Bada miyamiyana isanemo yà giugiu te mote yàma gosem.” Kamaina bi a nawa Deliko.

⁵Bi Deliko tauninemo taugiuwatana dubudi a miyamiyana a tava Elisa lisinemo bi ai talayena gado, “Kuna sibe ee geḡa te niga laḡanina ba Maimaituwa em bada ya nawe malamo?” Bi Elisa i giuwedina gado, “Ei, e sibe bi koma giugiuwata.”

⁶Kamaina bi Elaidiya, Elisa i giuwena gado, “Elisa niga ḡome kwa miyamiya bi Bada i giuwegu te yà nawa Diyoudan gaubinemo.” Bi Elisa i giuwena gado, “Bada miyamiyana isanemo yà giugiu te mote yàma gosem.” Kamaina bi labuidi a nawanawa,

⁷ba taugiuwatana dubudi nopodimo olooloto wapedi 50 muliḡa a nawa. Bi Diyoudan gaubina diyanemo Elaidiya bi Elisa a vamoito bi taugiuwatana ba ḡotona manekemo a vamoito bi tedi a wai kitawatedi.

⁸Bi Elaidiya ena kwama i kaikamaḡe, i vilinoku bi kwamanemo gauba i kwapu. Kamaina bi gauba i nuwadaili te doḡa ḡasaḡasalinaḡa labuidi a damana noi nevanemo.

⁹Sauginemo noi nevanemo a tava, Elaidiya, Elisa i giuwena gado, “Kwa giuwegu bai aubaim yà voiye, muliḡa kaka Bada ya nawegu malamo?” Bi Elisa i giuwena gado, “Aee, ḡailisi wailautawina lisimmo kwa vitegu bi gabum yà vai te taugiuwatana edi bada.”

¹⁰Bi Elaidiya i giuwena gado, “Kauwa dididiga kunai baḡaye. Bamoda kwa kitagu bi Bada ya vai naweguna, kaka bai kunai baḡaena kwa vai. Bamoda mote ima tubuḡa ba geḡa.”

¹¹Tedi etaḡa ai giugiu bi a nawanawa te osi bi seliot mavavavanidi ai maḡemoti te Elaidiya bi Elisa i dailidi. Bi yavala vilivilitoto i yovo te Elaidiya i vilivai te i nawe malamo.

¹²Elisa mainana i kitakita ba i binauna gado, “Aiyoi Tamagu! Tamagu! Islael edi seliot bi osi tauvelauyedi tagu e kitedi.” Bi Elaidiya mote i kita munaḡe. Kamaina te nuwaboya matailina ba ena kwama i lisi labu.

¹³Bi sauginemo Bada, Elaidiya i nawenawe ba ena kwama i kuluva doḡamo. Ḡome Elisa kwama i vai bi i munaḡa, Diyoudan gaubina diyanemo i moito.

¹⁴Bi tana Elaidiya ena kwama i kuluva bi i vaivaina, kwamanemo gauba i kwapu bi i binauna gado, “Bada, bamo, Elaidiya ena Maimaituwa?” Sauginemo Elisa gauba i kwapukwapu ba i nuwadaili bi i damana munaḡa noi nevanemo.

¹⁵Bi Delikomo ḡome taugiuwatana dubudi bi tedi ḡotona manekemo, a kita te bai i tubuḡa bi a giuna gado, “Elaidiya ena ḡailisi ba niganana i damana Elisa lisinemo!” Kamaina bi a nawa Elisa lisinemo bi matanemo a laudune yovo doḡamo,

¹⁶bi a giuwena gado, “Tama ḡaiḡailisimai bi wapamai 50. Bi kwai aninemai te ka nawa em bada ka tavuḡe. Bada Aluwina male em bada i avali nawe oya dabanemo e gwagwamo i sako.” Bi Elisa i giuwedina gado, “Geḡa, koma nawa.”

¹⁷Bi tedi a lauyaviyavi bi a voiye te i waidabauba taunana aubaina i waianinedina gado, “Kamaina ko nawa.” A nawa bi laḡan faiona ai tavutavu bi mote a banavi.

¹⁸Bi Elisa Delikomo i miyamiya bi sauginemo a tava munaḡa ba i giuwedina gado, “E giuwemi te maso mote ko nawa.”