5Bi muliḡa Asaliya edi ḡalibona ena tauwaiḡaviya vaitedi a yovo Islael dobuna ai ḡaviye. Tedi Sameliya taunina ganakukuna mataetina a miya gudu bi a waiḡaviyena eete kwalabu faiona a kovi.
6Bi Oseya Islael edi ḡalibona ena waibada kwalabu wai 9-nemo, Asaliya edi ḡalibona Sameliya taunina i lauyovoḡedi bi Islael lavedi a pani nawedi Asaliyamo. Ḡome kaka ḡesaudi a nawedi Ala tauninemo, ḡesaudi a nawedi Ḡabo gaubina diyanemo dobu isana Gosen bi ḡesaudi Mediya taunidiḡa a sivu nawedi.
7Asaliya lavedi a yovo bi Islael lavedi a pani nawedi banina edi Maimaituwa a laukasaḡaiḡaiye bi maimaituwa ḡesaudi a laulauduneyedi bi gebogebo a voivoiyedi. Maimaituwa taunana wala Idip ḡalibonana ena waibadamo a miyamiya bi i kapotiyovodi.
8Islael lavedi wali dobu lavedi edi vaivai bi edi koikoitau a laulauduneyedi. Mba dobudi lavedi taudidi dolinemo Keinan dobunemo a miyamiyana Bada i kwavivaidi. Bi Islael lavedi a laulauduneyedina banina edi ḡaliḡalibona koikoitau a laulauduneyedi bi edi kauwa gebogebodi taudidi a kaikaiwatedi.
9Bi Islael lavedi gebogebo ḡesaudi kandavonemo a voivoiyedi bi Bada edi Maimaituwa matanemo mote i visu. Bi edi tauniḡa bi edi malagai keikeilikidiḡa edi anilaudune gabudi a ḡaledi.
10Tedi oya dabediḡa bi kai waguludiḡa maimaituwa waivinina Asela aluwina ai moito nawedi.
24Bi Asaliya ḡalibonana, Babilon, Kuta, Ava, Amat bi Sepaviam taunidiḡa lava i natomedi bi Sameliya noponemo taun matabudi nopodiḡa i waidubu nawedi.
25Bi tedi ḡome a tava bi a miyana mote Bada a laulauduneye, taunana aubaina laiyon i giukamaḡedi te ḡesaudi ai pekidi.
26Bi lava Asaliya ḡalibonana a giuwena gado, “Lava kuna nawedi Sameliya tauninemo kuna sivudi bi sa miyamiyana, mba dobuna ena maimaituwa bi ena vaivai mote a sibe, taunana aubaina laiyon i giukamaḡedi te sa waipekidi.”
27Asaliya edi ḡalibona i giuna gado, “Pilisi ḡemota ko giukamaḡe ya munaḡa Sameliyamo. Bi ḡome ya miya bi mba dobuna maimaituwana ena vaivai lava yai lovelovedi.”
28Taunana aubaina Pilisi ḡemota wala a panipani natomena Sameliyamo a giukamaḡe Betelmo bi lava ḡome i wailovelovedi te bainewa Maimaituwa sa lauduneye.
29Bi lava mabai Sameliyamo a tavatavaitedina yaḡolo te edi koikoitau a voivoiyedi. Bi Islael lavedi edi maimaituwa ḡesaudi wala a voivoiyedina anilauduneyedi gabudimo a sivudi bi a laulauduneyedi.
