1. Kraľengero 7:6-30

⁶O Šalamun ačhaďa the le Slupengeri Hala, so sas 22 metri džinďarďi the 13,5 metri buchľi. Anglal sas kerďi e slupengeri veranda.

⁷Ačhaďa the e hala, kaj sas o tronos a so pes vičinelas Sudcengeri Hala. Sas obthoďi le cedroskere kaštestar la phuvatar dži ko stropos.

⁸O palacis, andre savo bešelas o Šalamun, sas pre aver dvora pal e hala a sas ačhado avke sar the odi Sudcengeri Hala. Ačhaďa ajso palacis the prekal le Faraonoskeri čhaj, sava peske iľa romňake.

⁹Savore palaca, o hali the e bari dvora sas ačhade le nekfeder barune kvadrendar le zakladostar dži e strecha. O bara sas mištes oprikerde la pilaha angluňa the paluňa seratar.

¹⁰O zakladi sas le dragane bare barendar, so merinenas 4 metri the 3,5 metri.

¹¹Upral lende sas bara, so sas mištes oprikerde, the o kašta le cedrostar.

¹²O muri pašal e palaciskeri dvora sas ačhade trine šorendar le barune kvadrendar a pre lende sas jekh šoros le cedroskere hranolendar, avke sar sas ačhaďi e andruňi dvora the e hala andre le RAJESKERO Chramos.

¹³O Šalamun diňa te vičinel le Chiram andral o Tir.

¹⁴Ov sas o čhavo la vdovakero andral o kmeňos Naftali a leskero dad, savo sas andral o Tir, kerelas le brondzoha. O Chiram sas igen goďaver a džanelas te kerel savoro le brondzostar. Ov avľa ko Šalamun a chudľa te kerel savore buča, so lestar kamelas.

¹⁵Ov kerďa le brondzostar duj slupi, so sas uče vaj 8 metri. O obvodos jekhe sluposkero sas 5,3 metri.

¹⁶Mek kerďa pro agor le slupenge o brondzune kriti, so sas uče 2,2 metri.

¹⁷O kriti upral o slupi sas šukares obthode le prephandle lancenca. Pre dojekh slupos sas efta lanci.

¹⁸Kerďa duj šori granatoskere phaba le brondzostar pašal o prephandle lanci, so zagaruvenas o kritos upral o slupos. Kavke kerďa the pro dujto slupos.

¹⁹O sluposkere kriti sas kerde le brondzostar sar o kvitki ľaľije, so sas uče 1,8 metros.

²⁰Pro soduj kriti, so sas thode pro slupi, sas duj šel (200) phaba a sas rozthode andro duj šori pašal lende.

²¹O Chiram diňa te ačhavel o slupi angle angluňi dvora le chramoskeri. Oleske pro juhos diňa nav Jachin a dujtoneske pro severos Boaz.

²²O upruno agor le slupengero dičholas avri sar o ľaľije. Avke sas e buči pro slupi dokerďi.

²³O Chiram kerďa le brondzostar igen bari okruhlo nadrža. Le jekhe agorestar ke aver merinďa 4,4 metri, sas uči 2,2 metri a lakero obvodos sas 13,2 metri.

²⁴Pašal o agor sas kerde šukar brondzune ruži andro duj šori – po deš ruži pro 44 centimetri. O ruži sas kerde jekhetane la nadobaha le brondzostar.

²⁵E nadoba sas thoďi pro dešuduj (12) brondzune biki. Trin biki dikhenas pro severos, trin pro zapados, trin pro juhos a trin pro vichodos. E nadrža ačhelas pre lende a lengere buľa sas maškaral.

²⁶E sera pre nadrža sas thuľi 7,5 centimetri a lakero agor dičholas avri sar e phundraďi ľaľija. Rešľolas andre 40 000 ľitri paňi.

²⁷Mek kerďa deš brondzune verdanora. Dojekh verdanoro sas džinďardo 1,8 metros, buchlo 1,8 metros the učo 1,3 metros.

²⁸O verdanoro sas kerdo avke: Kerde rami a andro rami thode o brondzune bľachi.

²⁹Pre ola bľachi the pro rami sas avrirandle o ľevi, o biki the o cherubi. Upral the telal o ľevi the biki sas figimen o brondzune venci.

³⁰Pre dojekh verdanoro sas brondzune kereki the tički. Pre leskere štar rohi sas o rameni, so ľikerenas e nadoba. O rameni sas obthode le brondzune vencenca.