1. King 7:6-30

⁶Iwe, Salomon a aüetä eu utten ür, langataman ükükün fik me limu fiit, nge chölapan faik me limu fiit. Mi wor eu kengkangan me fän mesan a wor üran, a pwal wor osun.

⁷Salomon a pwal aüetä eu ut fän iten ewe lenien motun king, iei ewe utten kapwüng, ewe ia a eäni kapwüng ie. Iwe, a papeni ngeni ewe irä setar seni fan tori won.

⁸Nge püsin imwan a nom lükisökürün ewe utten kapwüng, a wewefengen förün me ei ut. Salomon a pwal aüetä eu imw a wewefengen me ei ut fän iten nöün Farao we fefin a pwülüeni.

⁹Ekei imw meinisin ra för seni fau mi mürina, ra fal lon aükük o ngerenger lepekir me lon, pwal lepekir me lükün. Iwe, ra aea ekewe fau won longolongun ekewe imw tori aser, pwal won tittin ewe leni lükün me tittin ewe leni mi watte.

¹⁰Iwe, ekewe longolong ra för seni fau mi mürina o watte ükükün langatamen ekoch engol me ruu fiit, nge ekoch engol me limu fiit.

¹¹Nge won ekewe longolong a wor fau mi mürina ra fal lon aükük, pwal irälap seni ewe irä setar.

¹²Iwe, tittin ewe leni watte mi nom pwelin lükün ewe imwen king a wor ülüngat sässärin fau mi fal, pwal eu sässär seni ewe irä setar. Pwal tittin ewe leni mwen imwen ewe Samol mi Lapalap me kengkangan ra för lon ei sokun lapalap.

¹³Iwe, ewe king Salomon a titi Huram seni Tirus.

¹⁴Huram nöün eman fefin mi mä pwülüan seni ewe ainangen Naftali, nge saman eman re Tirus. Ätei eman mi sile angang ngeni piras, a fokun tipachem me silelap me sipeöch le föri sokopaten angang ngeni piras. Iwe, a feito ren ewe king Salomon o föri an kewe angang meinisin.

¹⁵Iwe, Huram a föri ruofoch ür seni piras, ükükün tekian efoch me efoch rüe me fisu fit, nge ükükün öün engol me walu fiit. Malülün ewe ür ükükün ülüngat inis, nge lon a pwang.

¹⁶A pwal föri ruu leton seni piras, pwe repwe nom won ekewe ür. Nge tekian eu me eu kewe leton ükükün fisu esop fiit.

¹⁷A afouta ekewe leton ngeni sein mi nut, füpa sein mi nut nge eu leton.

¹⁸A pwal föri uluulun apel o apacheretä lon ruu tettel won pwelin ewe sein mi nut, pwe repwe pwölüela letonen ewe ür. Iwe, a föri iei usun ngeni pwal ewe eu leton.

¹⁹Iwe, letonen ekewe ür ra usun lapalapen pön kiop, ükükün tekiar wonu fit.

²⁰Ekewe leton mi nom asen ekewe ür ra nom won eu leni mi kukumos ren ewe sein mi nut. Nge mi wor ruupükü uluulun apel lon ruu tettel pwelin eu me eu leton.

²¹Iwe, Huram a aüetä ekewe ruofoch ür mesen kengkangen ewe imwenfel. Ewe efoch a aüetä me ör o aita ngeni Jakin, nge pwal ewe efoch a aüetä me efeng o aita ngeni Poas.

²²Ekewe leton mi usun lapalapen pön kiop ra nom asen ekewe ür. Iei usun angangen ekewe ür a wes.

²³Mürin, Huram a föri eu sepien koluk mi fokun watte seni piras. Iwe, a kumosumos, nge chölapan seni epek tori epek ükükün engol me limu fiit, alololun ükükün fisu esop fiit, nge pwelin won aaman ükükün faik me limu fiit.

²⁴Iwe, pwelin ünükün fän aamen ewe sepien koluk a wor ruu telin uluulun pamkin mi förunusfengen me ewe sepien koluk.

²⁵Ewe sepien koluk a nom won engol me ruoman uluulun ätemwänin kow, ülüman ra sape ngeni efeng, ülüman ra sape ngeni lotou, ülüman ra sape ngeni ör, nge ülüman ra sape ngeni ötiu. Iwe, ewe sepien koluk a nom wor, nge wänükür a sorolong fan.

²⁶Malülün ewe sepien koluk ükükün ülüngat inis, nge aaman a usun chök aamen eu kap, usun chök epö pön kiop mi mas. Iwe, masouen ewe sepi ina epwe ükükün engol ngeröü kalon koluk.

²⁷Huram a pwal föri engol kuruma seni piras. Langatamen me chölapen efoch me efoch ükükün wonu fiit, nge tekian ükükün rüanü esop fit.

²⁸Iei usun lapalapen förün ekewe kuruma: Mi wor lepekir, ra katupulong lon mächän ekewe pwokuku.

²⁹Iwe, won lepekir kewe a wor liosun laion, ätemwänin kow me kerop. Nge won mächän ekewe pwokuku, pwal asen me fän ekewe liosun laion me ätemwänin kow a wor lapalapen mwäramwär mi fires.

³⁰Iteiten efoch me efoch kewe kuruma a wor fofoch willan seni piras me waaser seni piras. Nge won ekewe rüanü pwokuku mi wor peres fän ewe sepi seni piras. Ekei peres ra fout ngeni lapalapen mwärämwär mi fires.