1. Kraľengero 7:23-50

²³O Chiram kerďa le brondzostar igen bari okruhlo nadrža. Le jekhe agorestar ke aver merinďa 4,4 metri, sas uči 2,2 metri a lakero obvodos sas 13,2 metri.

²⁴Pašal o agor sas kerde šukar brondzune ruži andro duj šori – po deš ruži pro 44 centimetri. O ruži sas kerde jekhetane la nadobaha le brondzostar.

²⁵E nadoba sas thoďi pro dešuduj (12) brondzune biki. Trin biki dikhenas pro severos, trin pro zapados, trin pro juhos a trin pro vichodos. E nadrža ačhelas pre lende a lengere buľa sas maškaral.

²⁶E sera pre nadrža sas thuľi 7,5 centimetri a lakero agor dičholas avri sar e phundraďi ľaľija. Rešľolas andre 40 000 ľitri paňi.

²⁷Mek kerďa deš brondzune verdanora. Dojekh verdanoro sas džinďardo 1,8 metros, buchlo 1,8 metros the učo 1,3 metros.

²⁸O verdanoro sas kerdo avke: Kerde rami a andro rami thode o brondzune bľachi.

²⁹Pre ola bľachi the pro rami sas avrirandle o ľevi, o biki the o cherubi. Upral the telal o ľevi the biki sas figimen o brondzune venci.

³⁰Pre dojekh verdanoro sas brondzune kereki the tički. Pre leskere štar rohi sas o rameni, so ľikerenas e nadoba. O rameni sas obthode le brondzune vencenca.

³¹Upral o verdanoro tel e nadoba sas okruhlo ramos, so avelas avri upral le verdanorestar 45 centimetri a džalas tele 22 centimetri. A pašal leste sas avrirandle o šukar veci. O bľachi sas hranate a na okruhle.

³²Tel o verdanoreskere bľachi sas štar kereki, so sas 66 centimetri uče, a lengere tički sas prichudle pro verdanoro.

³³Sas kerde avke sar o kereki pro verdana andro mariben. O tički, o rafiki, o špici the o ložiska sas kerde le brondzostar.

³⁴Pro rohi sas štar ručki, so sas kerde jekhe kotorestar le verdanoreha.

³⁵Upral o verdanoro sas obruba uči 22 centimetri a tel o verdanoro sas rameni, so ľikerenas savoro. O rameni, o bľachi the o verdanoro sas jekhe kotorestar.

³⁶Pro bľachi the rameni kerďa všadzik cherubi, ľevi, palmi a pašal savoro o venci.

³⁷Avke kerďa deš jednake verdanora, so sas jednakones džinďarde the bare.

³⁸Kerďa the deš nadobi le brondzostar – jekh pre dojekh verdanoro. Dojekh nadoba sas buchľi 1,8 metros a rešľolas andre 800 ľitri paňi.

³⁹Pandž verdanora thoďa pre južno sera a pandž pre severno sera le chramoskeri. E igen bari nadrža thoďa pre vichodno sera.

⁴⁰O Chiram paľis kerďa lavora, lopati the čarore. Avke dokerďa e buči, so kerelas prekal o Šalamun pre le RAJESKERO Chramos.

⁴¹Kerďa: o duj slupi; o kriti le brondzostar, so thoďa pro upruno agor le slupenge a sas šukares obthode le prethode lancenca;

⁴²400 granatoskere phaba le brondzostar, so sas thode pro duj prephandle lanci;

⁴³deš verdanora the deš nadobi, so sas pre ola verdanora;

⁴⁴e igen bari nadrža a tel late dešuduj biken;

⁴⁵o pira, o lopati the o čarore. Savore ola veci, so kerďa le Šalamunoske prekal le RAJESKERO Chramos, sas kerde le bľišťace brondzostar.

⁴⁶O Šalamun oda diňa te kerel andro čhikakere formi maškar o gava Sukkot the Caretan pašal o Jordan.

⁴⁷Savore veci sas ajci but, hoj o Šalamun o brondzos aňi na diňa te važinel.

⁴⁸O Šalamun diňa te kerel andre le RAJESKERO Chramos the aver sersamos: o somnakuno oltaris; o somnakuno skamind, pre savo pes thovelas o maro;

⁴⁹o deš somnakune momeľara – pandž ačhenas pre čači (pravo) sera a pandž pre baľogňi (ľavo) sera anglo Neksentneder Than; o somnakune kvitki, o lampi, o silava;

⁵⁰o čare, o čhurora, o kuča the o lopatki, so sas tiš kerde le somnakastar. The o somnakune čopi pro vudara andro Chramos.