1Solomon me wia nanmwarkien Israel pwon,
2eri, iet sapwellime lapalap akan: Samworo: Asaraia nein Sadok
3Sounnting kan en tehnpaso: Eliorep oh Ahisa, nein Sisa pwutak ko Sounapwalih palien pwuhk: Seosopat nein Ahilud
4Kaun lapalap en karis kan: Penaia nein Sehoiada Samworo kan: Sadok oh Apaiadar
5Kaunen kepinahn wehi kan: Asaraia nein Nadan Sounkaweid: samworo Sapud nein Nadan
6Me kin apwalih ladu kan en tehnpaso: Ahisar Me kin apwalih doadoahk idihd kan: Adonairam nein Apda
7Solomon pilada ohl ehk riemen pwe re en wia kepinahn wehi kan nan Israel. Re pahn ale konot en nanmwarki oh tohn tehnpese sang nan ar wehi, emenemen ohl kin pwukoahki sounpwong ehu nan ehu sounpar.
8Me pahn sansal pah iei eden lapalap ehk riemen pwukat oh wehi kan me re apwalih: Penuhr: sahpw nahnahn Epraim
9Pendeker: kahnimw kan en Makas, Saalpim, Ped Semes, Elon, oh Ped Anan
10Penesed: kahnimw kan en Aruppod oh Soko oh sapwen Eper koaros,
11Penapinadap, me pwoudiki Tapahd, sapwellimen Solomon serepein: nan sapwen Dor pwon
12Paana nein Ahilud: kahnimw kanen Taanak, Mekiddo, oh sahpw koaros limwahn Ped Sean, limwahn kisin kahnimw Saredan, palieir en kisin kahinmw Sesreel, lellahng kahnimw Apel Mehola oh kahnimw Sokmeam
13Penkeper: kahnimw Ramod nan Kilead, oh wasahn kousoan tikitik kan nan Kilead me wia sapwen peneineien Sair, kadaudok en Manase, oh sapwen Arkop nan Pasan, me patpene koaros wiahda kahnimw laud weneisek, me kelpene oh mete prons me wia ewen kehlo
14Ahinadap nein Iddo: wehin Mahanaim
15Ahimas, me pwoudiki Pasemad, emen sapwellimen Solomon serepein: sapwen Napdali
16Paana nein Usai: sapwen Aser oh kisin kahnimw Pealod
17Seosopat nein Parua: sapwen Isakar
18Simei nein Ela: sapwen Pensamin
19Keper nein Uri: sapwen Kilead, meSihon, nanmwarkien mehn Amor oh Ok, nanmwarkien mehn Pasan kaunda Likin me ehk riemen pwukat, pil mie emen kepina me kaunda wehio pwon.
20Aramas en Suda oh Israel uhdahn tohto duwehte pihk en oaroahr; re kin mwengemwenge oh niminim sakau, oh pereperen.
21Sapwellimen Solomon wehi iangahki wehi koaros sang Pillap Iupreitis lellahng Pilisdia oh lel irepen Isip. Re wia sapwellime aramas oh kin pwainohng daksis erein eh ieias.
22Uwen konot me Solomon kin anahne ehuehu rahn iei ehd en pilawa kaselel 150 oh ehd en kohn idihd 300;
23kou en nan kehl 10, kou en nansapw 20, oh sihpw 100, pil iangahki soangen tie kan, oh soangen menpihr kan.
24Solomon kaunda sahpwo pwon ni palikapi en Pillap Iupreitis, sang Tipsa ni Iupreitis lellahng palikapi ni kahnimw Kasa. Nanmwarki koaros ni palikapi en Iupreitis kin mi pahn sapwellime manaman, oh e kin meleilei ong wehi kan koaros me mi limwah.
25Erein eh ieias, aramas koaros nan Suda oh Israel ahneki mour mwahu, ehuehu peneinei mie pein arail mwetin wain oh tuhke pik.
26Solomon sapwellimaniki kisin kehl pahkid ong sapwellime oahs akan me kin tangahki tehnwere werennansapw en mahwen oh weren sounpei oahs nenriakid.
27Sapwellime kepina ehk riemeno, emenemen kileldiong en patohwanda konot me anahnepe mie ong Nanmwarki Solomon oh ong koaros me kin iang kepin konot nan tehnpaso; re kin patohwanda soahng koaros me anahnepe mie.
28Emenemen kepina pil kin patohwanda eh pwais en parli oh kenen mahn mwenge, ong wasa kan me anahne, ong oahs mehn mahwen kan oh mahn akan me kin wia doadoahk.
29Koht ketikihong Solomon erpit oh koahiek me sohte emen iang ahneki, oh loalokong me laud mehlel oh sohte kak sosohngdi.
30Solomon erpit sang ohl loalokong ko en palimese de ohl loalokong ko en Isip.
31Ih me keieu loalokong nanpwungen ohl koaros: loalokong sang Edan mehn Esra, oh Eman, Kalkol, oh Darda, nein Mahol, oh sapwellime ndand ahpw lohkseli wasa koaros ong wehi kan me mi limwah.
32E wiahda lepin padahk audapan silikid oh koul tohtohsang kid.
33E kin mahsanih duwen tuhke oh wahntuhke kan, sang sidar kan en Lepanon lel isop me kin wosada ni kehl kan; e kin mahsanih duwen mahn, menpihr, kieil, oh mwahmw.
34Nanmwarki kan wasa koaros nan sampah kin karonge sapwellime erpit oh kin kadarala aramas pwe re en kin iang rong.
