1O Galata ŋic mutucne! Ŋoŋe mozi maŋ bâsifuc eŋarewec? Jesu Kristo maripoŋko qakicne ere hawari ŋaza ŋowatuc epe ʒâŋe fâri‐ŋeŋiczi honembiŋ i!
2Wiac mocjahare wio‐ŋarepe nazaniŋ: Mâro rombiŋ i weniŋuc ehuc rombiŋ? Sâcmutâc dâŋ reŋkehuc rombiŋ, me miti manarâ mamanasiŋhec ehuc rombiŋ?
3Maŋmutuc wemocte eŋgopieŋ? Mârore hata fuŋkerâ âtembiŋzi juju raŋɋare hatao raʒiŋgopieŋ me?
4Wiac fekicne sâko i maŋgâŋ fua‐ŋarewec me? — jâmbomac fârimâc ewecko.
5Mâro ŋarehuc wiac tâpirihec ŋoŋerao eekac, eki sâcmutâc dâŋ rereŋte me mamanasiŋ‐ŋeŋicte eŋareekac me?
6Abraham e iŋuc hâcne ecnekicne. E Anutu manasiŋkeme kiŋfâsâc mucnewec.
7Irec ʒiŋuc mananiŋ: Mamanasiŋhec jaŋe Abrahamte ɋâricfâc fârine.
8Ŋic qâpuc jaŋe Anutu manasiŋkepie kiŋfâsâc bacjopaocmu, irec hâcne mârâc jaha manasuhuc Abrahamte Biŋebiaŋ dâŋ ʒiŋuc mume miti papiao qâreŋkembiŋ: “Qâpuc guru jaŋe gore jambuŋko raʒi‐fâreniŋmu.”
9Irec hâcne, Abrahamzi mamanasiŋ hata âtewec ijaha âteniŋmuzi ere jambuŋko raʒiniŋmu.
10Â sâcmutâc dâŋte giezi fosiŋ‐jeŋic eha juniŋmu jaŋe ine sâwechec eniŋmu. Ʒiŋuc hâcne qâreŋkekicne fokac: “Sâcmutâc birio dâŋ forakac i moc mi qâsuazo. Moc e qâsuaocmuzi sâwec hotâckeocmu.”
11Sâcmutâc dâŋte maŋnao juhuc Anuturao kiŋfâsâc eene mi fokac, i dâŋ ʒizi mujaŋgeŋkekac: “Mamanasiŋte erâ biaŋkekicnezi juju hotâckeocmu.”
12Sâcmutâc dâŋko ine mamanasiŋte moc mi mukicne. Ine ʒiŋuc mukicne: “Giene bafâreocmuzi juju hotâckeocmu.”
13Dâŋqâreŋ moc ʒiŋuc fokac: “Ŋic jâcko ɋetic‐jopakicne jaŋe sâwecte biŋe.” Eme Kristo e nâŋâcnere iŋuc hâcne erâ sâwec hotâckewec, ehuc sâcmutâc dâŋte sâwec i bâsue‐nârewec.
14Eme irec Jesu Kristore erâ Abrahamte jambuŋzi ŋicne ŋicne jaŋerao sâcne raocmu. Eme Mâro biŋe qânârekicne ine mamanasiŋhec erâ ronaŋmu.
15Âgofâc, no wiac omanao sâc hehuc mupe: Ŋic moczi hâmohuc merâfâc‐ticne biŋe qajareocmu, i moczi qâsuarâ fainao dâŋ moc mi ʒuhuckeocmu.
16Eme miti merâfâc i Abraham â ɋâric‐ticne biŋe qajactekicne hâcne. Ɋâricfâc‐ticne bocjaha jaŋere mi mukicne, mocjahare mukicne, Kristo hâcne.
17No kecʒiŋucte mukopac: Anutuzi mârâc jaha miti merâfâc irec biŋedâŋ muwec, ehame ʒâhecko jara 430 tarame sâcmutâc dâŋ mufuawec, eme sâcmutâc dâŋ ʒâhec mufuakicne izi wemocko biŋedâŋ mârâc mukicne qame wahaocmu.
18Miti merâfâc i sâcmutâc dâŋte erâ rorone eme muzac ine biŋedâŋte erâ rorone i arictac ezac. Anutuzi ine miti merâfâc i katucmâc‐ticnere erâ Abraham biŋe qacnewec.
19Hâc, eme sâcmutâc dâŋ wemocte mukicne? I qaqatarare mufuakicne, erâ fofo sanaŋ foocte mâcne, Abrahamte ɋâric biŋedâŋ rune fuame rârieocte mukicne. Sâcmutâc dâŋ i aŋelo miczi mukicne â ŋicwirec ere meo râekicne.
20Ŋicwirec moczi ŋic mocjahare mâcne, bocjaha jaŋere qâqâhâc domaocmu. Anutu eki ine mocjaha.
21Eme sâcmutâc dâŋzi Anuture biŋedâŋ âkehockeocmu me? Iŋuc aricne. Sâcmutâc dâŋzi ŋicmaŋ mi heɋâreocmu. I eene eme muzac, ine jâmbomac sâcmutâc dâŋte erâ kiŋfâsâc ee i fuazac.
22Ŋic mâmâc sasawa sâqocnere niŋgiŋko jueŋgopeneŋ, fuŋne‐nâŋec iŋuc hâcne miti papiao mufuakicne. Eme irec hâcne Jesu Kristo manasiŋkehuc mitihec erâ biŋedâŋte fârine ronaŋmu, i sawa fokac.
23Judaŋic nâŋâc mârâc jaha mamanasiŋ tâmiric juhapene sâcmutâc dâŋzi kâpâcwâru bacnâpome nigiŋko fokuhapene mamanasiŋte biŋedâŋzi fua tâcnewec.
24Eme irec sâcmutâc dâŋzi bâbâtiŋ‐nâŋec erâ Kristorao râec‐nâpowec, i mamanasiŋhec erâ kiŋfâsâc enaŋte iŋuc ekicne.
25Nâŋâc mamanasiŋte hata fuame i âtepene bâbâtiŋte niŋgiŋ tâcnewec.
26Eme ŋoŋe Kristo Jesu manasiŋkeŋgopieŋte ʒeŋgoma Anuture naru motecfâc embiŋ juŋgopieŋ.
27Miti Opâ rua‐ŋarehuc Kristorao ʒuhuc‐ŋopakicne ŋoŋe mâmâc sasawa Kristozi ŋaqi‐ŋeŋic ehame hepie huwec.
28Eme irec Judaŋic â Grikŋic, fekicne â wahakicne, ŋic â ŋokac, bârâwiŋ juju i tarame ŋoŋe mâmâc sasawa Kristo Jesurao sâc mocjaha embiŋ.
29Ŋoŋe Kristore biŋe embiŋzi Abrahamte ɋâricfâc fârine juŋgopieŋ, erâ biŋedâŋte sâcko merâfâc‐ticne bajuniŋmu.
