1A taro Galesia, mot a kum longlong! Osi mo ra i sangsagor, ra i ulokolokor a nuknuki mot? A sa inanos talapor tar mot una minat anun o Iesu Karisito unin nanai kutus, i elar nami ra mot ut mot tama i.
2Mot in inanos iau: Mot utur ukai petlan a Tokodos na Nion? Uni mot mur a kum Warkurai, o uni mot nurnur una Wakak na Wasiso ra mot sa longoro i?
3Mot sa longlong! Mot turpasi nama dekdekin a Tokodos na Nion. Ilai ra mot nem na papam melet kut nama dekdeki mot ut?
4Pepetlai, a susut na ngunungut ra mot sa taramo tari, i utna oros mukut? Ka nuki lenra.
5Pepetlai, o God i tabor mot nama Tokodos na Nion ma i pam a kum utna na ukisin epotor tamot, uni mot mur a kum Warkurai anun a taro Juda, o uni mot nurnur una Wakak na Wasiso ra mot sa longoro i?
6A Buk Tabu i watungi un o Abaram lenri, “O Abaram i nurnur un o God, i mo ra o God i watungi a tene tokodos.”
7Mot in tasmani lena det ra det nurnur, det a kum nutnutun o Abaram.
8A Buk Tabu i sa wasiso mugu taru lena, o God in watung a taro ra awu sur a taro Juda lena det a kum tene tokodos uni det nurnur. O God i sa inanos mugu tar o Abaram una Wakak na Wasiso lena, “Un ui, din watung udan a taro tagun a kum gapman rop.”
9I lenkutkai ra uniri, det ra det nurnur din watung udan det, elar nami ra di sa watung udan tar o Abaram, a tene nurnur.
10Det ra det nuki lena, det in mur a kum Warkurai sur o God in watung det a kum tene tokodos, a dekdek na kankan anun o God i sa kis un det. Uni di sa tumus tari una Buk Tabu lena, “A dekdek na kankan anun o God i kis un det rop ra ka det mur sot pas a kum warkurai rop ra di sa tumus tari una Buk na Warkurai.”
11Katutaio in mur sot rop pas a kum Warkurai rop. I mo ra, i talapor lena, o God ken watung taio a tene tokodos, uni i mur a kum Warkurai. A Buk Tabu i watungi lenri, “Osi kut ra i nurnur, o God in watungi a tene tokodos ma in laun.”
12Osi ra i nuki lena in muri kut a kum Warkurai sur in tokodos uni, ke nurnur un o Karisito. A Buk Tabu i watungi lenri, “Osi ra in mur sot rop pas det, in laun uni i mur a kum Warkurai.”
13A kum Warkurai i ubek tar dat una dekdek na kankan anun o God. Ikut o Karisito i kul langolango pas dat gusun a kankan ra. I ut i tur keles dat, ra i rakon pas a dekdek na kankan. I elar nami ra di sa tumus tari una Buk Tabu lena, “Osi ra di ukete i netes unin nanai, a dekdek na kankan anun o God i kis uni.”
14O Karisito i kul langolango pas dat, sur o God in watung udan a kum kamkabo taro rop, elar nami ra i watung udan o Abaram, ma sur in pitar a Tokodos na Nion torom dat, ra dat nurnur un o Karisito Iesu, elar ut nama nun a liliman.
15A kum tistising, an watung a wasiso elelar una magirandat torom mot. Ra lako ru musano der liliman taru ma der sa pam tar tu kunubus, katutaio melet mo in pukus lar pasi.
16Lenkutkai ra, o God i sa uliliman taru torom o Abaram ma torom o nutunu. O God awu sur i watungi lena, “torom a kum nutnutunu.” Gunuk ra in watungi torom a kum nutnutunu, a kukuraino ra a susut na taro. Ikut i watungi lenri, “torom o nutunu,” a kukuraino lena ara musano kut, i a Karisito.
17Iri a kukurai ina nung a wasiso: O God i uliliman mugu taru torom o Abaram, nama kum utna ra in pam sot pasi ut. A kum Warkurai, ra det wanpat a wat na mar ma tulu noino kilalo numur, ka det pukus lar pas a liliman anun o God torom o Abaram.
18Pepetlai, mot nuki lena a etabor anun o God i wanpat torom dat uni dat mur a Warkurai? Awu! I kibino ut una nun a liliman. O God i uliliman nami torom o Abaram una nun a labino marmaris toromi.
19Sur asau ra o God i pitar a kum Warkurai? I pitari sur a taro det in tama lele anundet a kum sakino petutna. Di mur a kum Warkurai tuk a nutun o Abaram i wanpat, i ra o God i uliliman taru nami, o Karisito. Ra o God i pitar a kum Warkurai, i tulu ru a kum ensel nami torom o Moses, i ra i tur epotor tan a taro ma o God, sur o Moses in pitari torom det.
20Ikut ra o God i liliman torom o Abaram, katutaio i tur epotor tander. O God ara sot kut i wasiso.
21Pepetlai, a Warkurai ma a liliman anun o God der ebar etalai? Awu! Gunuk a Warkurai in pitar a nilaun tan a taro, det in tokodos umatan o God uni det mur a Warkurai.
22Ikut a Buk Tabu i watung puaso i lena, a taro rop una rakrakon bual, anundet a sakino petutna i ukarabus det. Lenra, det kut ra det nurnur un o Iesu Karisito det in los pas a etabor ra o God i liliman taru nami.
23Ra ka di ese i utmakai a nurnur un o Karisito torom dat, dat elar nama kum karabus una dekdekin a Warkurai. Ka dat langolango tuk o God i upuaso a nurnur un o Karisito torom dat.
24A Warkurai i elar kut nama tene tamtamabat torom dat, sur in ben dat torom o Karisito, sur dat in nurnur uni, ra o God in watung dat lena dat tokodos.
25Ikut uniri, dat sa nurnur, ra ka dat kis melet mo utuntudu ina kum Warkurai.
26Uniri mot rop a kum nutnutun o God, uni mot nurnur un o Karisito Iesu.
27Ra mot los a baptais, i ese i lena mot ara kut nam o Karisito, ma mot emar nam anun a nilaun.
28Una nurnur un o Karisito, a taro Juda ma a taro gisen det elar umatan o God, lenkutkai ra a kum tene ititula ma det ra awu sur a kum tene ititula, a kum musano ma a wardain. Uni mot rop mot ara mukut un o Karisito Iesu.
29Ra mot anun o Karisito, mot a kum nutnutun o Abaram, ma mot in rakon asau ra o God i liliman taru nami toromi.
