1Ó, tumen nagoďaver Galaťanale! Ko tumen diliňarďa andre? Se avke žužes tumenge sas oda avriphendo, sar muľa o Ježiš Kristus pro kerestos – avke sar te oda dikhľanas tumare jakhenca!
2Ča oda tumendar kamľomas te džanel: Či chudľan le Devleskere Duchos, bo kerenas pal o zakonos? Abo vašoda, hoj šunďan o evaňjelium a pačanďiľan?
3So, našaďan e goďi? Chudľan te dživel le Duchoha, ale akana kamen te dokerel andre peskeri zor?
4Kajci but precerpinďan hijaba? Ale oda čačes nane hijaba!
5Se džanen, hoj o Del tumen del peskere Duchos a kerel maškar tumende o zazraki. Či oda kerel, bo doľikeren o zakonos, abo vašoda, hoj šunďan o evaňjelium a pačanďiľan?
6Dikhen pro Abraham: “Pačanďiľa le Devleske a rachinelas pes leske oda vaš o spravodľišagos.”
7Vašoda, džanen, hoj ola, save pačan, hine o čhave le Abrahamoskere.
8Le Devleskero Lav džanelas imar anglal, hoj o Del pačabnaha ospravedlňinel le Nažiden, vašoda vakerďa o evaňjelium angloda le Abrahamoske: “Andre tu ena požehňimen savore narodi.”
9O Abraham pačanďiľa a sas požehňimen; avke the savore, save pačan, hine požehňimen, sar sas ov.
10Bo savore, save dživen pal o zakonos, hine tel o prekošiben. Bo hin pisimen: “Prekošlo hin sako, ko na kerel savoro, so hin pisimen andro zakonos a na doľikerel oda.”
11Kade dikhas, hoj anglo Del na ela ospravedlňimen ňisavo manuš prekal o zakonos, bo “o čačipnaskero manuš dživela le pačabnastar.”
12Ale o zakonos nane le pačabnastar. Bo hin pisimen: “Ča oda, ko doľikerela o prikazaňja, dživela.”
13O Kristus amen cinďa avri andral o prekošiben, so hin le zakonostar, bo ov korkoro ačhiľa prekošlo vaš amenge. Bo hin pisimen: “Prekošlo hin sako, ko hino figimen pro kašt.”
14Vašoda, hoj le Abrahamoskero požehnaňje te avel prekal o Kristus pro Nažidi, a hoj te chudas le pačabnaha le Duchos, avke sar phenďa o Del.
15Phralale, phenava tumenge priklados: Te pes duj manuša pre varesoste dovakeren a keren e zmluva, ta ňiko imar oda našťi čerinel, aňi našťi ke oda vareso dothovel.
16O Del diňa lav le Abraham the leskere potomkos. Na phenďa “the leskere potomkenge,” sar te vakerďahas pal o but džene, ale phenďa pal jekh: “The tire potomkos”, savo hin o Kristus.
17Kamav oleha te phenel kada: O Del kerďa le Abrahamoha zmluva a diňa les lav, hoj la doľikerela. O zakonos, so sas dino pal štar šel the tranda (430) berša, našťi prephagel e zmluva the oda lav, so o Del diňa.
18Bo te o ďeďictvos hin le zakonostar, na uľahas pal o lav, so diňa o Del. No diňa oda le Abrahamoske sar daros prekal peskero lav.
19Akor pre soste sas o Zakonos? Sas dino prekal o aňjela the prekal le Mojžišoskero vast pre oda, hoj te sikavel o bini, medik na avela le Abrahamoskero potomkos, pal savo o Del diňa lav.
20Ale na kampel, hoj vareko te ačhel maškaral, te hin ča jekh dženo. A o Del hin jekh.
21Ta akor, sar? Či o zakonos pes ačhavel pre le Devleskere lava, so diňa? Na, šoha (ňikda) na! Bo te o manuša chudlehas ajso zakonos, so len šaj diňahas dživipen, ta akor sako, ko les doľikerďahas, uľahas ospravedlňimen.
22Ale le Devleskero Lav phenel, hoj calo svetos hino tel e binoskeri zor; avke o daros, pal soste o Del diňa lav, chudena ola, save pačan andro Ježiš Kristus – a ča prekal o pačaben.
23Ale angloda sar avľa o pačaben, o zakonos amen phandľa sar andre bertena, medik pes na sikaďa o pačaben.
24O zakonos sas sar oda, ko amen bararelas avri a avke amen ľidžalas ko Kristus, hoj te avas ospravedlňimen prekal o pačaben.
25Ale kanastar avľa o pačaben, imar na kampel, hoj o zakonos amen buter te bararel avri,
26bo prekal o pačaben andro Ježiš Kristus san savore o čhave le Devleskere.
27Tumen savore, save san bolde andro Kristus, urďan pre tumende le Kristus.
28Imar akana nane aňi Židos, aňi Grekos; imar nane aňi otrokos abo slobodno; aňi murš vaj džuvľi – bo tumen savore san jekh andro Ježiš Kristus.
29A te san le Kristoskere, akor san o potomki le Abrahamoskere the o ďeďiča, a oda prekal o lav, so diňa o Del.
