2मेकोमी परमप्रभु यावे आ ङोंइती मार मरिम्शो बाक्मे, मेको पवा बाक्त। मिनु इस्राएली आन कली पाप पपाइक्ब नेबात आ तौ येरोबाम आ लांम गाक्माक्त। मिनु मेकोमी येरोबाम आ लां मप्रोना बाक्त। १राजा १२:२८-३०
3मोपतीके परमप्रभु यावेमी इस्राएली आन कली तशा गाइक्ता बाक्त। मिनु मेकोमी मेको आन कली शुश खेयप अराम ङा पिप हजाएल नु मेको आ तौ बेन-हादाद आस गुइमी गेमी बाक्त। २राजा १०:३२
4तन्न येहो-अहाजमी परमप्रभु यावे कली पुना बाक्त। मिनु परमप्रभु यावेम मेको आ पुंइशो नेना बाक्त। मारदे हना अराम ङा पिपमी इस्राएली आन कली दिप्शा श्येत गेशो तवा बाक्त। उत्पत्ती १६:१३
5मिनु परमप्रभु यावेमी इस्राएली आन कली प्रोंइब का योव़ङा बाक्त। मिनु मेकोपुकी अरामी आन गुइ रे ब्रोंइमा बाक्त। मिनु इस्राएली ङोंइती ङा खोदेंशो पा आन आन खिंम बाक्चा तामे बाक्त। २राजा १४:२७
6तन्न मेकोपुकीमी इस्राएली आन कली पाप पपाइक्ब येरोबाम आ पाप पतीके मप्रोंइथु, पना पन बाक्मा बाक्त। मिनु मूर्ति पाइश्शो थाम यो सामरीयाम बाक्स ङा बाक्स दुम्माक्त। १राजा १६:३३
7येहो-अहाज के ५० जना शारा ङोइक्ब, १० ओटा बग्गी नु १० हजार खोइलीम गाक्ब लडाइ पाइब ङा लाक्शा अर्को मारेइ मलीशो बाक्माक्त। मारदे हना अरु आन कली अराम ङा पिपम साइश्शा, खप ङा फुरक खोदेंशो सेल्शो बाक्माक्त।
8येहो-अहाज आ पशो अरु गेय, मेको आ पशो नेल्ल नु आ सक्ति दोदेंशो बाक्मे, मार, मेको इस्राएल ङा पिप आन इतिहासम ब्रेक्शो मबाक्बा ङा?
9मिनु येहो-अहाज बेक्माक्त। मिनु मुरपुकीम मेको कली आ किकी पिपी नु सामरीयाम थिम्मे बाक्त। मिनु मेको आ पा ङा आ तौ योआश पिप दुम्माक्त।
10मिनु येहो-अहाज आ तौ योआश सामरीयाम इस्राएल ङा पिप दुम्माक्त। मेना योआश यहूदा ङा पिप दुम्शो ३७ बर्स दुम्शो बाक्माक्त। मिनु इस्राएल ङा पिप योआशमी १६ बर्स सासन पवा बाक्त। यहूदा ङा पिप नु इस्राएल ङा पिप आस नें खाल का ङा बाक्त।योआश नु येहो-आश नें का बाक्ब, येहो-आश कली योआश यो देंशो बाक्त।