2 KING TAUDIA 13:2-10

²Iehoahasa ese Lohiabada ena vairanai ia kara dika. Ia ese Ieroboama Nebata ena kara dika, unai dekena amo Israela taudia ia hakererea kara dikana, ia karaia noho. Unai kara dika ia rakatania lasi momokani.

³Unai dainai Lohiabada be Israela dekenai ia badu momokani, bona ia ese Hasaele, Suria ena king, bona Benehadada, Hasaele ena natuna edia siahu henunai Israela ia atoa nega daudau.

⁴Vadaeni Iehoahasa ese Lohiabada ia noia, bona Lohiabada ese ia kamonai henia, badina be Israela taudia edia hisihisi ia itaia, Suria king ese ia dagedage henidia ena hisihisi.

⁵Unai dainai, Lohiabada ese Israela dekenai hamauria tauna ta ia henia, bona idia ese Suria taudia dekena amo idia heau mauri. Vadaeni Israela taudia be edia ruma dekenai idia noho, guna idia noho hegeregerena.

⁶To gau tamona, idia ese Ieroboama ena iduhu taudia edia kara dika, Israela taudia idia hakererea kara dikana be idia rakatania lasi, to idia do karaia noho. Bona hahine dirava koikoi, Asera, ena laulau be do Samaria dekenai ia gini noho.

⁷Iehoahasa be mai ena tuari oreana badana lasi, to hosi guia taudia 50 sibona, bona kariota 10, bona aena dekenai idia raka taudia 10,000 sibona. Badina be Suria ena king ese Israela tuari taudia oredia ia hadikaia ore, ia moidia, uiti kwadia gabuna ena momoru bamona idia ia halaoa.

⁸Iehoahasa ena kara orena, iena kara ibounai, bona iena kara goadadia, be Israela ena King Edia Sivarai Buka lalonai idia torea vadaeni.

⁹Vadaeni Iehoahasa ia mase, bona Samaria dekenai idia guria. Iena gabu dekenai, iena natuna Iehoasa ese king dagi ia abia.

¹⁰Ioasa, Iuda ena king ena lohia lagani namba 37 lalonai Iehoasa, Iehoahasa ena natuna ese Israela ia naria hamatamaia, Samaria dekenai. Iehoasa ese lagani 16 lalonai Israela ia naria, Samaria dekenai.