8तन्न मार देंशो बाक्त हना “मेको लोव़ इं नेक्था, इ थुं नु इ शोव़मी बाक्ब” देंशो बाक्त। मेको थमा सुइक्तीक लोव़ कली शेंनीकी।
9मिनु गेपुकीमी “येसु प्रभु बाक्ब” देंशा इन थुंमी “परमप्रभु यावेमी मेको कली बेक्शो रे सेंताक्व” दे थमा सुइक्तीनी हना, गे ब्रोंइचा ताइनीनी। मत्ती १०:३२; २कोरिन्थी ४:५
10मुरुमी मेको थमा सुइश्शा, ठीक दुम्नीम। मिनु सु सुमी “येसु आं प्रभु बाक्ब” दे मुर आन ङोंइती देंबा, मेको ब्रोंइचा ताइनीम, दे तुइक्नय।
11मिनु परमप्रभु यावे आ लोव़मी “सु सुमी मेको कली थमा सुइक्नीमी, मेको मुने मदोक्नीम” दे ब्रेक्शो बाक्ब। यसैया २८:१६
12परमप्रभु यावेम नेल्ल आन कली कोव़ब। यहूदी नु अर्को रागी ङा मुर नेल्ल आन कली कांइचीक मिम्ब। मेको आन कली प्रभु का बाक्ब। मेको कली प्रभु देंब आन कली आसीक गेशा, रिम्शो पाइब। प्रेरित १०:३४-३५; प्रेरित १५:९
13सु सुमी प्रभु आ नें थिशा “प्रोंइयीनी” दे पुंइबा, मेको कली प्रोंइब दे ब्रेक्शो बाक्ब। योएल ३:५
14मेको कली थमा मसुइक्बपुकीमी “प्रोंइयीनी” दे पुंइने चाप्नीमी ङा? आ पर्बम मनेंशो कली थमा सुइक्ने चाप्नीमी ङा? सुइ शेंब मबाक्त हना, मेको लोव़ नेंने चाप्नीमी ङा?