Roum 10:8-14

⁸A sikia, tana saa, Krais tsun fatabin en tana mat, ana ka te tsue iny e Moses tovei, “U vegiau ten Gov to pana manyi ana fokinai tsumi onot rom ma natiny a ka te tsue iny e Gov. Ami onot rom ma tsue tsuk iny a ka te tsue iny e Gov, ana mi fakei bus a ka to koma mami an fakats tsumi te tsue iny Ya.” An vegiau ten Gov to ayei, te rof non tsumi ma faason Tsunia, Tsunia te onot non ma kat fatavaroiny mami te faason romi Tsunia, an vegiau to ayei te favaanan iny romam tsumi na taa Roum.

⁹Ka te favaanan ronyo tsumi tovei: Tan nainy te tsue pokaa rom anyi matar a fokinai fiisen men sen tsun fakats tana man nana ka to, “Jisas Ayei na Tsunaun faman tsonyo,” ai to te faamainy fatsian rom anyi na ka to, “Gov fatoto fatabiny e Jisas vou na mat Tsunia,” Gov nai saup fatabin marom anyi tan aveto tsumanyi ana Ya te kat fatavaroiny manyi,

¹⁰tana saa, a mes ma faamainy famainy e Gov te fatoto fatabiny e Jisas tana mat, ai Gov te kat fatavaroiny a mes to ayei matan Ya; an ayei ma tsue pokaa tana mesapan, Jisas a Tsunaun tsunia, ana Ayei saup fatabiny towa tana fo aveto.

¹¹Fei te nat finy rora na man nana ka to ayei ei? Vegiau Ten Gov te tsue fi nei, “Nainy te faaman non e sei na mes ten Jisas ee, ayei gim non ma nai rejiaf on nats.”

¹²Tovei, Vegiau Ten Gov te tsue na ka, “E sei na mes ee,” ara onot ror ma natiny a ka tovein man: Gov kat fatavaroiny non a taa Jiu ana vainy sikia ma taa Jiu kan tan senviir sanaan tsun to aya, tana saa, a Tsunaun Jisas Ayei na isen tsun a Tsunaun to te tagaa ot iny non a vainy faavot, ai tan nainy te sing non e sei na mes ee ana ayei te rangats a Tsunaun Jisas tan tu fifaakouts, Ayei faakouts fatsian non a mes to ayei tan mamatsiny nainy kainon to tsunia sei.

¹³Ara natiny ror Ya, Vegiau Ten Gov te tsue kan iny senviir ka to ayei, “Nainy te sing non a mes tana Tsunaun ana ya te rangats Ya, ‘Tsunaun, saup fatabin vame tan saraa kamits tsonyo me na fo aveto tsonyo,’ Tsunaun kat non ya.”

¹⁴Kainon ito tana ka te see tsue iny ronyon man, te gim non ma onot vaarik tsuri ma fikoo ri te rangats a Tsunaun ma saup fatabin rari Ya onot non te faamainy rori Krais. Sai tsuri te gim ror ma onot vaarik ma faaman ten Krais, onot ror ma nongoiny Vurungan Rof nane Krais. Sai tsuri te gim ror ma onot vaarik ma nongoiny Vurungan Rof nane Krais, onot non tan ta mes ma nak rari, ma favaanan of rarin Vurungan Rof nane Krais,