1गे अरु आन कली दोस गेचा दाक्बपुकी, नेनीने, सु बाक्तीनी हना यो, दोस गेचा मदुम्ब, दे तुइक्तीन। दोस गेतीनी हना, दोसी दुम्नीनी, मारदे हना दोस गेबपुकी दोस ताइब आन पशो गेय खोदेंशोन पशो बाक्नीम, दे रुपीन। मत्ती ७:२; यूहन्ना ८:७; याकूब ४:१२
2परमप्रभु यावेमी मरिम्शो गेय पाइब आन कली ठीक निसाफ पशा, सजाइ गेब, दे तुइक्नय।
3गे अरु आन कली दोस गेशा, गे चहिं खाल का ङा पाइतीनी हना “गो परमप्रभु यावे आ सजाइ रे ब्रोंइचा ताइनीकी” दे मिम्नीनी?
4मिनु गे परमप्रभु यावेमी मुर आन कली दाक्तीके, फाल्तीके नु आ गे लेत्नीनी कों, दे रिम्तीके कली आइक्च मिम्नीनी? परमप्रभु यावेमी “आन थुं आं गे लेत्नीमी कों” दे रिम्शो मतुइक्नीनी? २पत्रुस ३:९,१५
5इन थुं परमप्रभु यावे गे मलेत्तीके परमप्रभु यावे आ गाइश्शो तेम्नीनी। मिनु आ ठीक निसाफ पची नाक्त शुश सजाइ ताइनीनी।
6परमप्रभु यावेमी मुर आन पशो कोव़शा, दोदेंशो पामे मोदेंशो पाइब। येरमीया ३२:१९; मत्ती १६:२७; २कोरिन्थी ५:१०
7सुमी परमप्रभु यावे आ राज्य माल्शा, रिम्शो गेय पना पन बाक्नीमी नु गेना हना यो ब्रोंइचा माल्नीमी, मेको गेना हना यो परमप्रभु यावे नु बाक्चा ताइनीम।
8तन्न आंम कली ला मिम्बपुकी, थमा लोव़ मटीबपुकी, जोल लोव़ थमा सुइक्बपुकी परमप्रभु यावे आ गाइश्शो चुरशो ताइनीम। २थिस्सलोनिकी १:८
9मरिम्शो पाइबपुकी हिंशा बाक्शा, शुश श्येत जाइनीम। नेल्ल आन क्येङा ङोंइती यहूदी सजाइ ताइनीम। मिनु ग्रीक यो सजाइ ताइनीम।
10रिम्शो पाइबपुकी परमप्रभु यावे आ राज्य जाक्शा, मान तशा, आन थुं नाइश्शा बाक्चा ताइनीम। ङोंइती यहूदी आन कली मोदेंशो दुम्ब। मिनु ग्रीक आन कली यो मोदेंशो दुम्ब।
11मारदे हना परमप्रभु यावेमी मुर आन कली आइक्च जात, ठेयब जात मतिल्थु ठीक निसाफ पाइब। २इतिहास १९:७; प्रेरित १०:३४; कलस्सी ३:२५; १पत्रुस १:१७
12परमप्रभु यावे आ अरेशो लोव़ मतुइक्थु, पाप पाइबपुकी मेको आन मतुइश्शोमीन जाम्शा लाइनीम। परमप्रभु यावे आ अरेशो लोव़ तुइश्शा यो पाप पाइबपुकी मेको लोव़मीन निसाफ पचा पुंइसीनीम।
13परमप्रभु यावे आ अरेशो लोव़ नेंशा ला मुर ठीक मदुम्नीम। आ देंशो पशा ला ठीक दुम्नीम। ब्यवस्था ६:२५; मत्ती ७:२१; याकूब १:२२
14मोपतीके अर्को रागी ङा मुरपुकीमी परमप्रभु यावे आ अरेशो लोव़ मतुइक्ताक्म हना यो, मार पचा दुम्बा, मार पचा मदुम्बा, दे तुइश्शा, गेय पाइनीमी, मेको आन आगामी अरेशो लोव़ बाक्ब। प्रेरित १०:३५
15मेको मुर आन थुंमी अरेशो लोव़ ब्रेक्सीशो बाक्ब, दे कोंइनीम। मेको आन थुंमी आन पशो आ पर्बम रिम्शो बाक्ब देय मरिम्शो बाक्बा सांकछी गेब। रोमी १:३२
16मिनु परमप्रभु यावे आ निसाफ पची नाक्त मुर आन ख्रुइश्शा पशो कली निसाफ पाइब। आं शेंशो ग्येरपाइक्तीक लोव़ परमप्रभु यावेमी येसु ख्रीस्त आ पतीकेमी निसाफ पाइब। लूका ८:१७
17मिनु गे “गो यहूदी ठेयब जात नकी। परमप्रभु यावे आ अरेशो ताइतक, आ योव़शो मुर नकी” दे मिम्नीनी।
18परमप्रभु यावे आ दाक्शो तुइक्नीनी, मार पचा दुम्बा, मार पचा मदुम्बा तुइक्नीनी। मारदे हना गे अरेशो लोव़ शेंसीशो बाक्नीनी,
19इन थुंमी “गो जोक्ब नङ, गो मिक्च मताइब आन कली लां कोंइब नङ। छिङछिङम बाक्ब आन कली बत्ती दाब नङ। मत्ती १५:१४
20हेंथे गाक्ब आन कली रिम्शो लां कोंइब नङ। मशेंसीशो आन कली शेंब नङ, गो अरेशो लोव़ जोक्ब तुइक्ब बाक्नुङ” दे मिम्नीनी।
21तन्न अर्को आन कली शेंशो, आंम कली मशेंसीनीनी। खुइ मपचा दे शेंनीनी। तन्न गे खुइ पाइनीनी। भजन संग्रह ५०:१६-२१; मत्ती २३:२,४
22मुर आन मीश मलाइक्चा, दे शेंनीनी, तन्न लाइक्नीनी। मूर्ति कली तशा, ग्रांग्रा दीनीनी, तन्न मन्दीर रे मूर्ति खुइ पा लाइक्नीनी।
23परमप्रभु यावे आ अरेशो लोव़ रिम्शो बाक्ब देंनीनी, तन्न इन मटितीकेमी परमप्रभु यावे कली आइक्च सेल्नीनी।
24इन मोदेंशो पशो आ पर्बम “अर्को रागी ङा मुरपुकीमी परमप्रभु यावे आ नें आ पर्बम शुक्शी पाइनीम” दे ब्रेक्शो बाक्ब। यसैया ५२:५
25गे ख्रोइक्तीक चिनु ख्रोइश्शा, परमप्रभु यावे आ आ अरेशो लोव़ टीतीनी हना, रिम्शो दुम्ब। तन्न ख्रोइक्तीक चिनु ख्रोइश्शा आ अरेशो मटीतीनी हना, गे ख्रोइक्तीक चिनु मख्रोइश्शो खोदेंशो दुम्नीनी।
26ख्रोइक्तीक चिनु मख्रोइश्शो, तन्न परमप्रभु यावे आ ठीक पतीक नेल्ल पाइब हना, मेको ख्रोइक्तीक चिनु ख्रोइश्शो खोदेंशो बाक्ब। गलाती ५:६
27मेको अर्को रागी ङा ख्रोइक्तीक चिनु मख्रोइश्शो मुरपुकीमी यहूदी आन क्येङा आंमा आन थुं रे ठीक पाइनीम। मिनु निसाफ दुम्ची ना परमप्रभु यावे कली मटीब यहूदी आन कली दोस गेनीम।
28रांमी ख्रोइक्तीक चिनु ला बाक्शा, परमप्रभु यावेमी योव़शो यहूदी मदुम्नीम। येरमीया ४:४
29मार पा यहूदी दुम्नीम देंशा हना, मार पचा दुम्बा, मार पचा मदुम्बा, मेको तुइश्शा, परमप्रभु यावे आ सोक्तीम थुंम ख्रोइक्तीक चिनु ख्रोइश्शा ला परमप्रभु यावे आ मुर दुम्नीम। मेको आन कली मुरपुकीमी ठेयब मसेल्नीम। तन्न परमप्रभु यावेमी नेल्ल तुइश्शा “रिम्शो पाइतीनी” देंब। ब्यवस्था ३०:६; फिलिप्पी ३:३; कलस्सी २:११
