6बेथ-लेबाओथ नु शारूहेन मेको आन के बाक्तीक नेल्ल पा १३ ओटा सहर नु गाउंपुकी बाक्तेक्म।
7ऐन, रिम्मोन, एथेर नु आशान। मेको आन के बाक्तीक नेल्ल पा ४ ओटा सहर नु मेकेर ङा गाउंपुकी बाक्तेक्म। मेको आन एर ओंथ ङा गाउं नेल्ल बालाथ-बेर, दक्खिन गे ङा रामाह सम्म बाक्तेक्म।
8मेको सिमियोन आ थर ङा खिं खिं ङा मुर कोव़शा, मेको सहर नेल्ल आन एर ओंथ ङा गाउं बालाथ-बेएर नु नेगेब ङा रामाह सम्म बाक्ब।
9मेको सिमियोन आ खिं खिं ङा मुर आन रागी बाक्त। मिनु मेको आन रागी यहूदा आ खिं खिं ङा मुर आन रे पा तशो बाक्तेक्म। मारदे हना यहूदा थर आन रागी माल्शो क्येङा यो शुश बाक्माक्त। मोपतीके सिमियोन आ खिं खिं ङा मुरपुकीमी मेको आन रागी यहूदा आन रागीमी ताम्तेक्म।
10मिनु नोले योव़ङमेनु, जबूलून आ खिं खिं ङा मुरपुकीमी आन रागी ताम्तेक्म। मेको आन सांद सारीद सम्म बाक्त। उत्पत्ती ४९:१३
11मिनु पच्छिम गे मरलाह सम्म लशा, दब्बेशेत लाक्शा, योकनाम आ नेक्था ङा खोला सम्म जाक्दीत्त।
12सारीद रे पा लशा, पूर्ब नां दाप्तीक गे किस्लोथ-ताबोर रागी रे दाबेराथमी ग्रूशा याफीया सम्म ङोइश्शा लशो बाक्त।
13मेकेर रे मेको पूर्ब गे लशा, गाथ-हेफेर नु एथ-कासीन सम्म जाक्दीश्शा, यो रिम्मोन सम्म ग्रूशो बाक्त। मेको सांद नेआह सम्म जाक्दीश्शो बाक्त।
14मिनु मेको सांद हन्नातोन उत्तर गे लशा, हिरशा इफ्ताह-एल ङा दिंममी जाक्दीश्शा नुप्शो बाक्त।
15मेको सांद आगाम कात्ताथ, नहालाल, शिम्रोन, इदलाह नु बेथलेहेम यो बाक्तेक्म। मेको आन के बाक्तीक नेल्ल पा १२ ओटा सहर नु मेकेर ङा गाउंपुकी बाक्तेक्म। न्यायाधीस १:३०
16जबूलून आ खिं खिं ङा मुर आन सहर नु गाउंपुकी एकोन बाक्तेक्म।
17मिनु नोले योव़ङमेनु, इस्साकार आ खिं खिं ङा मुरपुकीमी आन रागी ताम्तेक्म।
18मेको आन सहर तेको तेको बाक्तेक्म देंशा हना, येज्रेल, केसुल्लोथ नु शुनेम, २राजा ४:८
19हाफ्राइम, शीओन नु अनाहारथ,
20रब्बीत, किश्योन नु एबेस,
21रेमेथ, एन-गन्नीम, एन-हददाह नु बेथ-पस्सेस बाक्तेक्म।
22मेको सांद ताबोर, शहसूमा नु बेथ-शेमेश सम्म जाक्दीश्शा, यर्दनमी नुप्शो बाक्त। मेको आन के बाक्तीक सहर नेल्ल पा १४ ओटा सहर नु मेकेर ङा गाउंपुकी बाक्तेक्म।