لُكِ 15:1-16

¹لْشْ ندٍ، دُوتِ مَشِلِيٍ نُن يُنُبِتْييٍ بِرِن نُ عٍ مَكْرّقٍ عِسَ رَ عٍ شَ عٍ تُلِ مَتِ عَ رَ.

²قَرِ سّنِيٍ نُن سّرِيّ كَرَ مْشْيٍ نَشَ سٌ عَ مَقَلَقٍ، عٍ نُ عَ قَلَ، «يِ شّمّ يُنُبِتْييٍ رَ سّنّمَ، عَ مَن عَ دّفٍمَ عٍ شْنيِ.»

³نَ كُي، عِسَ نَشَ يِ تَالِ وْيّنيِ مَسٍن عٍ بّ،

⁴«شَ مِشِ ندٍ نَ وٌ يَ مَ، يّشّي كّمّ نَ نَشَن يِ رَ، كٍرٍن قَ لْي عٍ تَفِ، عَ مُ يّشّي تٌنفٌ سٌلٌمَنَانِ نُن سٌلٌمَنَانِ لُمَ عٍ دّ مَدٌندٍ، عَ سِفَ نَ كٍرٍنيِ قٍندٍ هَن عَ سَ عَ تٌ؟

⁵عَ نَ عَ تٌ، عَ حّلّشِنمَ نّ كِ قَنيِ، عَ عَ سَ عَ تُنكِيٍ مَ.

⁶عَ نَ سٌ عَ شْنيِ، عَ عَ شَنُنتٍنيِيٍ نُن عَ دْشْبٌورٍيٍ شِلِمَ نّ، عَ عَ قَلَ عٍ بّ، ‹وٌ قَ، وٌن بِرِن شَ سّيوَ، بَرِ مَ ﭑ بَرَ ﭑ مَ يّشّي تٌ، نَشَن نُ بَرَ لْي!›

⁷نَ كُي، ﭑ شَ عَ قَلَ وٌ بّ، سّيوّ فبٌمَ نّ عَرِيَننَ يُنُبِتْي تُوبِشِ كٍرٍن شَ قٍ رَ، دَنفِقٍ تِنشِنتْي تٌنفٌ سٌلٌمَنَانِ نُن سٌلٌمَنَانِ رَ نَشٍيٍ هَيِ مُ تُوبِ مَ.»

⁸«شَ عَ سَ لِ فبٍتِ كْبِرِ كٌلٍ قُ نَ فِنّ ندٍ يِ رَ، كٍرٍن قَ لْي عَ يِ، عَ مُ لَنثُي رَدّشّمَ شّ، عَ بَنشِ مَكْ، عَ نَ كْبِرِ كٌلٍ قٍن هَن عَ عَ تٌ؟

⁹عَ نَ عَ تٌ، عَ عَ شَنُنتٍنيِيٍ نُن عَ دْشْبٌورٍيٍ شِلِمَ نّ، عَ عَ قَلَ عٍ بّ، ‹وٌ قَ، وٌن بِرِن شَ سّيوَ، بَرِ مَ ﭑ بَرَ ﭑ مَ فبٍتِ كْبِرِ كٌلٍ تٌ نَشَن نُ بَرَ لْي ﭑ مَ!›

¹⁰نَ كُي، ﭑ شَ عَ قَلَ وٌ بّ، سّيوّ نَ عَلَ شَ مَلٍكّيٍ شْنيِ يُنُبِتْي كٍرٍن فبَنسَن تُوبِقٍ مَ.»

¹¹عِسَ مَن نَشَ عَ مَسٍن، «شّمّ ندٍ نُ نَ، دِ شّمّ قِرِن نُ نَشَن يِ رَ.

¹²عَ شَ دِ قِرِن ندٍ نَشَ عَ قَلَ عَ بَبَ بّ، ‹وٌن مَ دٍنبَيَ هَرِفٍ سّيتِ سٌ ﭑ يِ رَ، نَشَن لَنمَ عَ شَ قِندِ ﭑ فبٍ رَ.› نَ كُي، بَبّ نَشَ عَ هَرِفٍ عِتَشُن عَ شَ دِ شّمّ قِرِنيِيٍ مَ.»

¹³«عَ مُ بُ دِ قِرِن ندٍ نَشَ عَ شَ سٍ بِرِن مَلَن، عَ قَ بِيَاسِ حَمَنّ مَكُيٍ. عَ نَشَ عَ هَرِفٍ مَكَنَ مّننِ، قُيَنتٍيَ كُي.

¹⁴عَ بِرِن تٌ حْن، كَامّ قَن نَشَ سِن نَ حَمَنّ مَ عَ شْرْشْي رَ، سٍسٍ مُ لُ نَ دِ يِ رَ.

¹⁵عَ تٌ سِفَ وَلِ قٍندٍ نَاكَ ندٍ شْن، نَ نَشَ عَ شّي شْسّيٍ دّ مَدٌندٍ.

¹⁶وُرِ بٌفِ نَشَن نُ سٌمَ شْسّيٍ يِ، عَ تَن نُ وَ مَ نَ نَن دٌنقٍ، كْنْ مِشِ يٌ مُ تِن عَ كِدٍ ندٍ رَ.»