Luka 15:1-16

¹Ngan di tooltool ke sodaningi pat, inbe di tooltool kapala yo ke yeingi noonoo mata nga, ngan timan tigaua le tigaliui Yesu, inbe titar talngadi ye betanga ki.

²Le nga di Paresi tiye di pannoongoo ke ger ke Maro tikamata le tikap malmal panga a tiwete mur ye nen, “Ai, tool ni nga yelei a iye di tooltool ke yeingi noonoo tigauagaua, inbe iye di tikan so nga?”

³Motong la Yesu ikatte betanga atu pang di nen,

⁴“Kumata le ang tina ngan atu asara ki yo edi sipsip ngan 100, bong be atu ilene nga, ngan ole iyege di sipsip ki yo 99 ngan sila tiyepe sokorai ye ni kidi yo be tikanen ye i, inbe ila la ipa a isere tani yo ilene i le lo ipuske.

⁵Ye kene yo be la isere sipsip ki tani ilene in le ipuske nga, ngan ole lon ponana kaiye le ole ikauu a itaru lo poopoonoo, inbe itaure a imulu a ila pang malala ki.

⁶Ngan ye kene yo ila pombe rumu ki nga, ngan ole ikiu di tooltool ki, inbe di tooltool yo tiyepe potai ye rumu ki nga, ngan man tigaua, inbe iwete pang di nen, ‘Kaman a man ayang lod ponana, yesoo sipsip kiau atu yo ilene i, in apuske a akauu mulu oo.’ ”

⁷Motong la Yesu iyei ne, “Awete pang nen, lo ponana yo nen ngan gaongo leu ben yo iken ye malala ke Maro ngo. Kumata le tool atu ke yeingi noonoo be iportaka lono pang Maro ye dada dook tiap ki yo iyei nga, ngan Maro iye di bangabangana ki ole lodi ponana ye mai san. Ngan moolmool, di tooltool yo 99 nga, ngan ole lodi ponana ye di lapau, bong o lodi ponana ye di mata tiap, yesoo di ngan tooltool noonoodi le taukadi urata yo be tiportak lodi nga.”

⁸Motong la Yesu ikatte betanga san mulu pang di nen, “Kumata be garup atu in pat ki silba sangaul atu, bong be atu ilene rumu ki nga, ngan ole iyei belei? Ole ilanga sul ki a be ikamata ni ye, inbe ikaua narong a isoraia rumu lono ki, inbe matan sarai dook le lo ipuske pat ki tani mulu.

⁹Ye kene yo be isere pat ki tani ilene in le ipuske nga, ngan ole ikiu di tooltool ki, inbe di tooltool yo tiyepe potai ye rumu ki nga, ngan man tigaua, inbe iwete pang di nen, ‘Kaman a man ayang lod ponana, yesoo pat kiau atu yo ilene i, in apuske a akauu mulu oo.’ ”

¹⁰Motong la Yesu iyei ne, “Awete pang nen, lo ponana yo nen ngan gaongo leu ben yo iken ye malala ke Maro ngo. Kumata le tool atu ke yeingi noonoo be iportaka lono pang Maro ye dada dook tiap ki yo iyei nga, ngan Maro iye di bangabangana ki ole lodi ponana ye mai san.”

¹¹Motong la Yesu ikatte betanga san mulu nen, “Tool atu in natunu tamoto ru.

¹²Ngan natunu tamoto yo kase in iwete pang tamana nen, ‘Tamak, au i lok be kupoto so kiong nga le paru a nen kop yo kiau ngan pau.’ Motong la tamadi ipoto so ki tina ngan le paru, inbe ikap pang di natunu.

¹³“Le nga tiyepe le mooloo tiap, inbe natunu kase tani in iyawar so ki tina ngan pang di tooltool a tiyimi be ikap pat ye. Motong la ikap pat ki, inbe ila be la iyepe ye tana mai atu yo iken ni mooloo san i. Inbe igiri pat ki tina ngan ye dada dook tiap ki yo iyei nga.

¹⁴Ngan igiri pat ki tina ngan a imot, inbe pitolo maiyoko pombe ye tana mai tani yo iyepe ye in le imot, le isere so yo be ikani i.

¹⁵Le nga tool tani in ila la itoro malala taunu atu be iyei urata panga. Ngan le tool ke malala tani in iwete panga be la matan kala di ga ki, a nen ngan ipakan di.

¹⁶Ila, ngan ikamata ooroo puana kulini yo di ga tikan nga, ngan lono be ikap a ikan lapau, yesoo bong tool sa ikap kaningi panga be ikan tiap.