LUKA 15:1-16

¹Ndipo anyakupimisa mtsonkho na anyakuphonya adakochezana kuti adzamubve.

²Na tenepo afalizeu na apfundzisi wa mtemo akhang'ung'udzika acimbati: “Munthu omweyu ambatambira anyakuphonya acidya nawo pabodzi.”

³Tsono Jezu adawatsikira matereya aciti:

⁴“Penu m'bodzi wa imwepo ana mabira yace dzana, ndipo m'bodzi n'kutaika, kodi angasiye lini mtsalamo yanango makumi mapfemba na mapfembayo aciyenda kukanyang'ana m'bodziyo mpaka kumuwona?

⁵Ndipo iye akamuwona ambam'kupika paphewa aciyenda naye kumui adakondwa.

⁶Ndipo iye akafika kumuiko an'kacemera axamwali na anyapafupi wace aciwawuza kuti: 'Abale wangu mbatikondwe thangwe bira wangu akhadataika ndamuwona.'

⁷Ndiri kukuwuzani cadidi kuti n'psibodzi-bodzi kuti kudzulu kun'dzakondwedwa na thangwe ra kukhumbula kwa munthu m'bodzi wakuphonya, kuposa makumi mapfemba na apfemba wakulungama omwe an'funika lini kuti akhumbule.”

⁸Ayai ni mkazinyi omwe ana kobiri khumi za ndzaya, ikataika ibodzi, iye angasaye kugasa m'bvuniko acipsaira m'mnyumbamo aciinyang'ana bwino-bwino mpaka kuiwona?

⁹Ndipo iye akaiwona, ambacemera azixamwali na anyapafupi wace aciwawuza kuti: “Bwerani tikondwe, thangwe kobiri yangu ikhadataika ndaiwona.”

¹⁰Na tenepo ndiri kukuwuzani kuti anjo wa Mulungu ambakondwa na thangwe ra munthu m'bodzi nyakuphonya akakhumbula.

¹¹Ndipo iye adalewa pomwe kuti: “Munthu m'bodzi akhana wanace awiri.

¹²Na tenepo m'ng'onoyo adawuza babaceyo kuti: “Baba! Ndipaseni utaka bwangu.” Ndipo iye adawagawira utakabo.

¹³Pomwe zidapita ntsiku zing'ono-ng'ono, mwana m'ng'ono ule adalongedza bzinthu bzacebzo aciyenda kudziko la kutali. Ndipo adakamala kumwaza utaka bwacebo bwentse makhalidwe yace yakhali yapezi-pezi.

¹⁴Pomwe iye adamala kumwaza utaka bwacebo, kudziko limwero kudawoneka njala ikulu kwene-kwene. Na tenepo iye adayamba kubonera na thangwe ra kusaya cakudya .

¹⁵Ndipo iye adayanya ubale kuna munthu m'bodzi wa mudziko limwerire. Na tenepo iye adamutuma kuti ayende kumunda kwace ambakamunyire nkhumba gaga.

¹⁶Ndipo iye ankhafuna kumbadyambo gaga omwe zikhadya nkhumbazo. Tsono pakhalibe munthu omwe akhamupasa cinthu.