Luka 15:1-16

¹Nisɔnkɔmiralailu ni kojuukɛla gbɛrɛilu tɛrɛ ye nala ka ie tolo malɔ Isa la.

²Farisilu ni sariya karanmɔɔilu ka wo yen ka a fɔ ie da kɔrɔ Isa ma ko: «A ragbɛ! Cɛ wo ye kojuukɛlailu ramirala, fo ka damunun kɛ fɛ kelen dɔ.»

³Wo rɔ, Isa ka sanda la ie yɛ ko:

⁴«Ni saa kɛmɛ kɛra mɔɔ kelen bolo ai rɔ yan, saa kelen wa tunun, yon tɛ sɔn ka saa bikɔnɔndɔ ni kɔnɔndɔ to waa rɔ, ka wa saa tununni kelen pe ɲinin diya haan ka a yen?

⁵A wa saa tununni wo yen, a ri sewa. A ri a ta ka a la a kan ma ka na a ri.

⁶A wa se a la lu ma, a ri a fɔ a terilu ni a siiɲɔɔnilu yɛ ko: ‹An ye sewa. N na saa tununni tɛrɛ, kɔni n da a ɲinin ka a yen.›

⁷«A ragbɛ! Wo ɲa kelen ma, kojuukɛla kelen pe wa tubi, wo ye sewa ko ba le ri Alla wara. Wo sewa ka bon paaon, ka tamin telenba mɔɔ bikɔnɔndɔ ni kɔnɔndɔ ta kan, mɛnilu mako tɛ tubi ko ma.»

⁸Isa ko: «Ni wodigbɛ tan kɛra muso do bolo, kelen wa tunun a ma bon kɔndɔ, a ri nfen kɛ? A tɛ wuli wa, ka fitina lamɛlɛn ka bon kɔndɔ firan, ka wodi wo ɲinin a ɲa jɛrɛ jɛrɛ ma wa, haan ka a yen?

⁹Ni a ka a yen, a ri a terilu kili, a ni a siiɲɔɔnilu, ka a fɔ ie yɛ ko: ‹An ye sewa. N da n na wodigbɛ yen, mɛn tununni tɛrɛ n ma.›»

¹⁰Isa ko: «A ragbɛ! Wo ɲa kelen ma, kojuukɛla kelen pe wa tubi, Alla la mɛlɛkailu ri sewa.»

¹¹Isa fanan ko: «Dencɛ fila tɛrɛ ye cɛ do bolo.

¹²Lon do rɔ, den doomanni ka a fɔ a fa yɛ ko: ‹N fa, i ye i la nanfulu bɛɛ rafara, ka n ta fan di n ma sisen.› Cɛ wo ka a la nanfulu rafara a den fila tɛma, ka a dencɛ doomanni ta fan di a ma.

¹³Wo cɛ tun ma mɛn bakɛ, den wo ka a bolofen bɛɛ ta ka wa taama rɔ jamana jan do rɔ. A se mɛn kɛni ye, a ma foyi kɛ fo manamanaya. A tora wo la haan ka a bolofen bɛɛ tiɲan.

¹⁴«Nba, kɔfɛ, kɔnkɔ fitina donda jamana wo rɔ, ka a tɛrɛn kanberen na wodi ra ban fewu. A la damunun dɛsɛra. Wo gbɛlɛyara a ma kosɛbɛ.

¹⁵Wo rɔ, a ka baara ɲinin ye mɔɔ do fɛ. Wo ka a ta ka a lawa waa rɔ a la kosɛilu gbɛngbɛn diya.

¹⁶Ka a to waa rɔ ye, kɔnkɔ gbara a la kojuuya, haan ka kosɛilu la damunun fen sɔsɔ fara damun loo bila a la. Hali wo, mɔɔ si ma a sɔ damunun dɔ.