Luku 15:1-16

¹Nate ma꞉nda꞉na꞉ mo hande dakisi mani mu haemeke haliweki make mo hoke haliweki make paeyaoma꞉ Yesuma꞉ leeke pimanu opuluekema꞉ ipiki pa꞉ta꞉ a꞉pa mombelemekepate

²hande Pa꞉tisi haliwekima꞉ make mo hande Lo Pi walo haemeke haliwekima꞉ make kotoeki handaata꞉ pi la la pitolo hata꞉ ika꞉ kone alota꞉ Do halima꞉ta꞉ mo hoke haliweki handa꞉ mea꞉tiki pea ne kone homeke pa꞉ta꞉ netiki pitelememe laa lemeke handa

³Yesuma꞉ ika꞉ pi hombo peaaso onkoluma꞉ dupa leekeme.

⁴Iki pa꞉ta꞉ hala꞉ hali homekema꞉ ipika꞉ sipisipi ma꞉na꞉ titi 100 halia꞉pate homeke alu pia꞉ka꞉na꞉ta꞉ pa eki pilia꞉pe. Mo pa hala꞉ 99 sipisipi ma꞉na꞉ manuta꞉ ambu nalo haena꞉ mo hande alupia꞉ ekita꞉ ota꞉ handa꞉ uluekema꞉ weilu pelieke leekeme.

⁵Kutupa handa꞉ wiata꞉ ta꞉na꞉ma꞉ homolo hata꞉ hande sipisipi ma꞉na꞉ hopula꞉ mea

⁶peiyokona꞉ tia da pelieke. Kutupa ipika꞉ yankeke titi make ipika꞉ da wanda꞉hali make paeyao ipupe laa wi alota꞉ Hande alupia꞉ ma꞉na꞉ homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉e laa lelieke.

⁷I̱ma꞉ iki pa꞉ta꞉ ota꞉ pi alome. Koto tupa꞉ kone oli hepeni naneta꞉ pa mandane 99 hone ma꞉nda꞉ na la꞉ka꞉lapeke epeke tupa꞉ haleme wanda꞉hali pa꞉ta꞉ ta꞉na꞉ma꞉ make homelemepate pa mo hoke hali homekema꞉ hone la꞉ka꞉lea꞉ka꞉na꞉ta꞉ kota꞉ oli hepeni naneta꞉ ota꞉ ta꞉na꞉ tiekema꞉ homilimikie laa leekeme.

⁸Kutupa make wanda꞉ homeke ma꞉nda꞉ma꞉ ipika꞉ silipa mani kiki yaapo wia halia꞉pate homeke ma꞉nda꞉ alu paeya꞉ka꞉na꞉ta꞉ eki piliepe laa leekeme. Ipikana꞉ma꞉ta꞉ handa꞉ ulueke alo ola꞉pake ka꞉wata꞉ sisimei mea da panda꞉ kila bao weilieke.

⁹Kutupa hande mani siki handa꞉ wiata꞉ ipika꞉ yankeke make ipika꞉ da wanda꞉hali make paeyao ipupe laa wi alota꞉ Hande alupia꞉ mani homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉ pipe laa lelieke. Koto ekina꞉ I̱ma꞉ iki pa꞉ta꞉ ota꞉ pi dupa alome.

¹⁰Koto tupa꞉ kone hoke hali homekema꞉ Koda꞉ pa꞉ta꞉ hone ma꞉nda꞉ la꞉ka꞉lea꞉ka꞉na꞉ta꞉ kota꞉ oli Koda꞉na꞉ enisolo manuma꞉ koto ekina꞉ta꞉ ta꞉na꞉ tiekema꞉ homilimikie laa leekeme.

¹¹Kutupa Yesuma꞉ pi ma꞉nda꞉ alo hata꞉ alota꞉ Hali homeke ma꞉nda꞉ ipika꞉ eiyeke yaapo ame̱le̱ haemekepate

¹²mo wetepe wekima꞉ ateke pa꞉ta꞉ alota꞉ Apa꞉o I̱ma꞉ wetepena꞉ naka꞉ anke teke mulu polo ala꞉ta꞉ ala꞉ta꞉ ame do kone telipa kuelena꞉e laa honke leekeme. Koto ekina꞉ hande atekema꞉ ipika꞉ ala꞉ta꞉ ala꞉ta꞉ mo weki yaapo pa꞉ta꞉ teli paeyekeme.

¹³Kutupa mo wetepe wekima꞉ta꞉ nate tepomanu haota꞉ ipika꞉ mieke ekita꞉ ma꞉nda꞉ma꞉ hambena꞉ laata꞉ koto mani mea da mina꞉pa꞉lao da yu ma꞉nda꞉ papate hayeke da nane peekeme. Koto nane puata꞉ na tiaake haumanu pitolo hata꞉

¹⁴ipika꞉ mani paeyao batiki pu hayekeme. Kotoeki pu paeyao haena꞉ta꞉ koto kenke pa꞉ta꞉ tea꞉ ki tieke epeeketa꞉ mo wekita꞉ ala꞉ta꞉ ma꞉nda꞉ na miniki pa hayekeme.

¹⁵Koto ekina꞉ mo da nane hayeke hamoko hali ma꞉nda꞉ pa꞉ta꞉ ti lao haluekema꞉ peekepate mo hali tiekema꞉ ipika꞉ e poko hayeke yu nane ipika꞉ ma꞉na꞉manu handeteke halo pena꞉ tapaeyekeme.

¹⁶Kutupa mo wekita꞉ mo ma꞉na꞉ manuma꞉ nemeke pato ambuku manuta꞉ ipika꞉ weleke haena꞉yeke noluekema꞉ taapeekepate hali ma꞉nda꞉ma꞉ ipiki pa꞉ta꞉ ne ma꞉nda꞉ a꞉nda꞉ na haleekeme.