Luk 15:1-16

¹Te takis sabo bidi dabe dede, dwai kolesaga ebo bage me, augwali hauwa Jisas pageba asali, agai ola mabo po odainu hagede yali.

²Tama te Farisi bidi hani dabe me, te Juda dabego bomo yai po koneani bidi dabe me, augwaligo hagelabo po weyu, te po wai, “E bidigo te dwai sę ebo we bidi pagebo dao, augwali hodobo beba pelama, nai tugi pabo dao,” wali.

³Augwaligo te po obaso, tama Jisasgo augwalibolo e po begelama pusuyu, te po wai,

⁴“Dage tomode bidi mego te kibu sipsip bidi sese nogo a naga te 100 elalubadi, tama te sipsip me deli hagabaso, te bidigo mena sę yaibawe? Te kibu sipsip page bidi agai te bidalubo sipsip te tubo nai sabo madide osogo taga pelama, tama te hagawai sipsip gegegi paibao, nono ebo menio, bugagia gegebo.

⁵Gegegi pelama, subaso, teda dwagi yai homu eyu, te kibu sipsip nagede auwasa paibao.

⁶Tama pelama, aga beba sabolama, aga hani bidi dabe me, abagi dabe me i olama, deliba sisinama, augwalibolo te po waibao, ‘Ena dali dwagi yai homu yao. Eno kibu sipsip hagawai. Te eno gegelama, eno salio. Dagego ena dali dwagi yai homu yao,’ te sipsip page bidigo te po waibao.

⁷Eno dagebolo obao, te tiwai te doloba pai we bidi hauwa olo bidibadi, teda dagalude te ensel dabe dwagi yai homu ebo dao. Tialima, dwai sę ebo bidi me deli aga homu begelama, te aga dwai sę yali tudiba mubaso da, teda te dagalude ensel dabego te moni dwagi yai homu pemene mu yaibao,” Jisasgo te po wali.

⁸Jisasgo te po me wali, “Me ma, we mego mone ge nogo si elalubadi, te mone ge me deli te be tomode hagabaso, tama te wego magi sę yaibawe? Te wego sole domonama, te hagawai masigi te be tomode gegebo gagalaibao. Tama agai te be hogomu poalama, te pobele bage dabe deliba sisiniyu, gegaibao, nono ebo menio, bugagia gegebo.

⁹Gegelama, subaso, teda dwagi yai homu eyu, aga hani dabe me, abagi dede me i olama, deliba sisinama, augwalibolo te po waibao, ‘Ena dali dwagi yai homu yao. Ena hagawai masigi ma sali,’ te wego te po waibao.

¹⁰Eno dagebolo obao, dwai sę ebo bidi me deli aga homu begelama, dwai sę tudiba sąbaso da, teda Godigo ensel bidi dabe augwali dwagi yai homu mu ebo dao, te wego te hagawai masigi ge gegelama ma sali gilama tiwai,” Jisasgo te po wali.

¹¹Te Jisasgo te we bidi dabebolo po me weyu, te po wai, “Te bidi mego ogwa si bidali.

¹²Tama te i badu bidigo aga ayabolo te po wali, ‘Aya, nago doado bage dobayao. Eno nosali saibao homu yali doado bage enabolo megi tama mao,’ te nosali sabo hagela ebo homu elama, te po wali. Te i badu bidigo te po olama, aga ayago aga doado bage tigidali aga ogwa sibolo dobolama, mani.”

¹³“Te dwasianu bidama, i badu bidigo aga sali doado bage munama, tama gasa bidigo abelama, te i badu bidibolo masigi dabe mani. Tama te i badu bidi aga doado bagede sai mone tigidali selama, gasa digibulu tǫba mu pelama, bidigi pai. Tede bidibadi, aga dwai dwai haniani sę eyu, hagoma homu ebo kolesaga elama, aga mone tigidali besela sąnama dolama tagalalio.

¹⁴Tama aga mone tigidali sia sali. Masigi sia selama, tama te sogo te tǫde moni nasi yali. Tama te gesi bidi nai meni yai bidi bidali.

¹⁵Nai meni baso, aga tede bidali tǫ page bidi me deli pageba pali, tubo nai sabo sę emainu yai. Tama te tǫ page bidigo te gesi bidi aga giba tagala palali, te aga kibu tonalubo sę emainu yai.

¹⁶Tama te gesi bidi moni nasi baso, agai te homu yali, ‘Eno te kibu dabego tubo ni du dabe tugi sogo da, teda usu igi da,’ wali. Tialima, bidi mego agabolo tubo nai mabe.”